సాధారణంగా చలికాలంలోనే చర్మం పగులుతుందని, దద్దుర్లు వస్తాయని మనం భావిస్తుంటాం. అయితే వేసవిలో సూర్యుని నుండి వెలువడే అతినీలలోహిత (UV) కిరణాలు వేడి గాలి చర్మంలోని సహజ సిద్ధమైన తేమను హరించివేస్తాయి. వేసవిలో చర్మ సమస్యలకు ప్రధాన కారణం శరీరంలో నీటి శాతం తగ్గడం (Dehydration). మనం తగినంత నీరు తాగనప్పుడు శరీరం లోపలి నుండి పొడిబారిపోతుంది. దాని ప్రభావం మన ముఖం చర్మంపై స్పష్టంగా కనిపిస్తుంది.
సబ్బుల అతి వినియోగం..
వేసవి తాపం నుండి ఉపశమనం పొందడానికి చాలామంది రోజుకు రెండు మూడు సార్లు స్నానం చేస్తుంటారు. ఈ క్రమంలో అధికంగా సబ్బులు లేదా రసాయనాలు కలిగిన బాడీ వాష్లను ఉపయోగించడం వల్ల చర్మంలోని సహజ నూనెలు తొలగిపోతాయి. ఇది చర్మం పై పొరను బలహీనపరిచి మొటిమలు దద్దుర్లు రావడానికి కారణమవుతుంది. అలాగే సన్స్క్రీన్ లేకుండా నేరుగా ఎండలోకి వెళ్లడం వల్ల హానికర కిరణాలు చర్మాన్ని దెబ్బతీసి, పగుళ్లు ఏర్పడేలా చేస్తాయి.
చర్మ సంరక్షణకు పాటించాల్సిన ముఖ్యమైన చిట్కాలు
శరీరాన్ని హైడ్రేటెడ్ గా ఉంచండి: చర్మం లోపలి నుండి మెరవాలంటే రోజంతా పుష్కలంగా నీరు త్రాగాలి. నీటితో పాటు మజ్జిగ, కొబ్బరి నీళ్లు పండ్ల రసాలు తీసుకోవడం వల్ల శరీరంలో తేమ శాతం తగ్గకుండా ఉంటుంది.
మాయిశ్చరైజర్ వాడకం: చర్మం పొడిబారకుండా ఉండటానికి రోజుకు ఒకటి లేదా రెండు సార్లు తేలికపాటి, నూనె లేని (Oil-free) మాయిశ్చరైజర్ను రాసుకోవాలి. ముఖ్యంగా స్నానం చేసిన వెంటనే చర్మం తేమగా ఉన్నప్పుడే దీనిని రాసుకుంటే మంచి ఫలితం ఉంటుంది.
సన్స్క్రీన్ తప్పనిసరి: ఇంటి నుండి బయటకు వెళ్లే ముందు కనీసం 20 నిమిషాల ముందే నాణ్యమైన సన్స్క్రీన్ రాసుకోవాలి. ఇది సూర్యరశ్మి నుండి రక్షణ కవచంలా పనిచేసి చర్మం కమిలిపోకుండా కాపాడుతుంది.
సహజమైన ఉత్పత్తులు: అధిక రసాయనాలు లేని సున్నితమైన సబ్బులను వాడటం మంచిది. సాధ్యమైనంత వరకు వేడి నీటితో కాకుండా చల్లని నీటితో స్నానం చేయడానికి ప్రయత్నించండి.
వేసవిలో చర్మంపై దద్దుర్లు రావడం సర్వసాధారణమే అయినా, పైన పేర్కొన్న చిన్న జాగ్రత్తలతో వాటిని సులభంగా నివారించవచ్చు. ఒకవేళ ఎన్ని ప్రయత్నాలు చేసినా చర్మం పొడిబారడం తగ్గకపోతే, అది ఇతర చర్మ వ్యాధులకు సంకేతం కావచ్చు, కాబట్టి వెంటనే వైద్యుడిని సంప్రదించడం శ్రేయస్కరం.
గమనిక: ఈ సమాచారం అంతర్జాతీయ చర్మవ్యాధి నిపుణుల అభిప్రాయాలు వైద్య నివేదికల ఆధారంగా రూపొందింది. ఇది కేవలం అవగాహన కోసం మాత్రమే. మీకు ఏదైనా తీవ్రమైన చర్మ సమస్యలు ఉంటే, సొంత వైద్యం చేసుకోకుండా నిపుణులైన డాక్టర్లను సంప్రదించండి.