ఇటీవలి కాలంలో మధుమేహం (డయాబెటిస్), అధిక రక్తంలో చక్కెర (హై బ్లడ్ షుగర్) సమస్యలు వేగంగా పెరుగుతున్నాయి. సాధారణంగా ఈ సమస్య గుండె, మూత్రపిండాలు, కళ్ల ఆరోగ్యంపై ప్రభావం చూపుతుందని చాలా మంది భావిస్తారు. అయితే ఆరోగ్య నిపుణుల ప్రకారం, అధిక రక్త చక్కెర స్థాయిలు చర్మం, జుట్టు ఆరోగ్యాన్ని కూడా తీవ్రంగా ప్రభావితం చేస్తాయి. రక్తంలో చక్కెర స్థాయిలు ఎక్కువ కాలం నియంత్రణలో లేకపోతే, శరీరంలోని రక్త ప్రసరణ వ్యవస్థ దెబ్బతింటుంది. దీంతో చర్మం, వెంట్రుకల కుదుళ్లకు అవసరమైన పోషకాలు సరిగా అందక అనేక సమస్యలు తలెత్తే అవకాశం ఉంటుంది.
అధిక రక్త చక్కెర చర్మంపై ఎలాంటి ప్రభావం చూపుతుంది?
అమెరికన్ డయాబెటిస్ అసోసియేషన్ ప్రకారం, రక్తంలో చక్కెర స్థాయిలు ఎక్కువగా ఉన్నప్పుడు చర్మ కణాలకు తగినంత పోషణ అందదు.
- చర్మం పొడిబారడం
- తరచూ దురద రావడం
- చర్మ ఇన్ఫెక్షన్లు పెరగడం
- గాయాలు నెమ్మదిగా మానడం
- చర్మం రంగులో మార్పులు రావడం
జుట్టు ఆరోగ్యంపై ఎలా ప్రభావం చూపుతుంది?
అధిక రక్త చక్కెర వల్ల వెంట్రుకల కుదుళ్లకు సరైన రక్తప్రసరణ జరగదు.
- జుట్టు బలహీనంగా మారడం
- అధికంగా జుట్టు రాలడం
- కొత్త జుట్టు పెరుగుదల మందగించడం
- జుట్టు నాణ్యత తగ్గిపోవడం
వంటి సమస్యలు ఎదురయ్యే అవకాశం ఉంటుంది.
ఈ లక్షణాలు కనిపిస్తే వెంటనే పరీక్ష చేయించుకోండి
రక్తంలో చక్కెర స్థాయిలు పెరిగినప్పుడు కొన్ని సాధారణ లక్షణాలు కనిపిస్తాయి. వాటిని నిర్లక్ష్యం చేయకూడదు.
- తరచుగా దాహం వేయడం
- తరచూ మూత్రవిసర్జన
- కారణం లేకుండా బరువు తగ్గడం
- అధిక అలసట
- చూపు మసకబారడం
- పునరావృతమయ్యే చర్మ ఇన్ఫెక్షన్లు
- గాయాలు ఆలస్యంగా మానడం
- అధికంగా జుట్టు రాలడం
ఈ లక్షణాలు కనిపిస్తే వెంటనే రక్తంలో చక్కెర పరీక్ష చేయించుకోవడం మంచిది.
చర్మం, జుట్టును ఆరోగ్యంగా ఉంచాలంటే ఏమి చేయాలి?
మధుమేహం ఉన్నవారు లేదా అధిక రక్త చక్కెర సమస్యతో బాధపడేవారు కొన్ని జాగ్రత్తలు తీసుకోవాలి.
పోషకాలు అధికంగా ఉండే ఆహారాన్ని తీసుకోవాలి. తీపి పదార్థాలు, అధికంగా ప్రాసెస్ చేసిన ఆహారాలను తగ్గించాలి.
రోజూ కనీసం 30 నిమిషాల పాటు వ్యాయామం చేయడం ద్వారా రక్తంలో చక్కెర స్థాయిలను నియంత్రించవచ్చు.
శరీరాన్ని హైడ్రేటెడ్గా ఉంచడం వల్ల చర్మ ఆరోగ్యం మెరుగుపడుతుంది.
రోజుకు 7-8 గంటల నిద్రతో పాటు ఒత్తిడిని తగ్గించుకోవడం కూడా చాలా ముఖ్యం.
డాక్టర్ సూచించిన మందులను క్రమం తప్పకుండా తీసుకోవాలి. అలాగే రక్తంలో చక్కెర స్థాయిలను తరచూ పరీక్షించుకోవాలి.