మరణం ఎప్పుడూ
ఒక వీలునామా కాదు
ఏ పిరికితనమూ మరణ కాంక్షకి
శాశ్వత చిరునామా కాదు
అనేక భావోద్వేగాల మధ్య
తీవ్ర అంతర్గత ఒత్తిళ్ల మధ్య
అప్రయత్నంగా ఎవరైనా
తమ జీవితానికి తామే ఉరిశిక్ష వేసుకుంటే
అది కేవలం ఆత్మహత్యా సదృశ్యమే కాదు
చట్ట విరుద్ధమైన చర్య కూడా
ఈ చావు భయం శారీరకమే కాదు
అంతర్గతమూ కూడా
మృత్యువు పేరుతో సమాజానికి వేసిన
ఒక సామూహిక ప్రశ్న, ఓ నిశ్శబ్ద నిష్క్రమణ
ఒక్క క్షణం జీవితంలో ఓడిపోతే చాలు
దానికి శాశ్వత పరిష్కారం
మృత్యువు రూపంలో తొంగి చూస్తోంది
అపురూపంగా పెంచుకున్న ఈ ఆయుష్షు
ఇలా అర్ధాంతరంగా ముగిసిపోవడమంటే
అది ఓ ప్రచ్ఛన్న అంతర్గత యుద్ధమే
ప్రతి సమస్యకీ మరణమే
ఓ శాశ్వత పరిష్కారమైతే ఈ లోకంలో
ఏ జీవీప్రాణాలతో బతికి బట్టకట్టదు
ఓటమి భయంతో ఆత్మవిశ్వానికి దూరమౌతుంటే
విరిగిన మనసుకు మరణం వీలునామా కాదు
అది ఓ తాత్కాలిక, శాశ్వత విరామం మాత్రమే
రేపటి మీద ఆశతో బతకాలంటే
ఇవాళ్టి మీద భరోసాతో ముందడుగు వెయ్యడమే
మనిషికి చిరకాల స్వప్నం
ఈ నమ్మకంతోనే కాలాన్ని బతికిద్దాం
బతికినంత కాలంఓ చైతన్య జ్యోతిగా
వెలిగి నిలిచిపోదాం
– ఎన్.లహరి