Jani Master: ప్రముఖ డాన్స్ కొరియోగ్రాఫర్ జానీ మాస్టర్పై తెలుగు ఫిల్మ్ ఇండస్ట్రీ ఎంప్లాయీస్ ఫెడరేషన్ కీలక నిర్ణయం తీసుకుంది. ఆయనపై సహాయ నిరాకరణ (Non-Cooperation) కొనసాగించాలని ఫెడరేషన్ తమ అనుబంధ సంఘాల జనరల్ సభ్యులకు స్పష్టమైన ఆదేశాలు జారీ చేసింది. ఈ మేరకు సెప్టెంబర్ 26, 27 తేదీల్లో జరిగిన ఆల్ ఇండియా ఫిల్మ్ ఎంప్లాయీస్ కాన్ఫెడరేషన్ (A.I.F.E.C.) సమావేశంలో ఈ అంశంపై సుదీర్ఘంగా చర్చించినట్లు ఫెడరేషన్ తన లేఖలో పేర్కొంది. గతంలో జరిగిన పరిణామాలపై ఫెడరేషన్ నాయకులందరితో సమగ్రంగా చర్చించి, ఫెడరేషన్ సభ్యుల ప్రయోజనాలను కాపాడటానికి, వారికి ఎలాంటి అన్యాయం జరగకుండా ఉండేందుకే జానీ మాస్టర్పై నాన్-కోఆపరేషన్ నిర్ణయం తీసుకున్నట్లు వివరించింది. A.I.F.E.C. సమావేశంలో కూడా తెలుగు ఫిల్మ్ ఇండస్ట్రీ ఎంప్లాయీస్ ఫెడరేషన్ తీసుకున్న ఈ నిర్ణయానికి పూర్తి మద్దతు లభించిందని తెలిపింది. ఫెడరేషన్ తీసుకున్న ఈ నిర్ణయాన్ని అనుబంధ సంఘాలు, నాయకులు, సభ్యులందరూ తప్పనిసరిగా పాటించాలని సూచించింది. వ్యక్తిగత స్వార్థం, స్వలాభం కోసం ఫెడరేషన్ నిర్ణయాలను ఎవరైనా ఉల్లంఘిస్తే ఉపేక్షించేది లేదని హెచ్చరిస్తూ, జానీ మాస్టర్పై సహాయ నిరాకరణను కచ్చితంగా అమలు చేయాలని ఆదేశించింది.
