నెల్లూరు జిల్లా రామాపురం గ్రామంలో నిర్వహించిన ‘పల్లె పండుగ 3.0’ కార్యక్రమంలో డిప్యూటీ సీఎం పవన్ కల్యాణ్ పాల్గొని మాట్లాడారు. సీఎం చంద్రబాబు సహకారంతో పంచాయతీరాజ్ వ్యవస్థను బలోపేతం చేసి గ్రామాలను స్వయం సమృద్ధి దిశగా నడిపిస్తున్నామని తెలిపారు. గత ప్రభుత్వ హయాంలో (2019-24) కేవలం 850 కిలోమీటర్ల సీసీ రోడ్లు మాత్రమే నిర్మిస్తే, కూటమి ప్రభుత్వంలో ఇప్పటివరకు ఏకంగా 9 వేల కిలోమీటర్ల మేర సీసీ రోడ్లు వేశామని, ఇందులో ఎస్సీ, ఎస్టీ కాలనీల్లోనే సుమారు 6 వేల కిలోమీటర్ల రోడ్లు ఉన్నాయని వెల్లడించారు.
గతంలో గ్రామాల్లో బ్లీచింగ్ పౌడర్ కొనే దిక్కులేని దుస్థితి ఉండేదని, నేడు పంచాయతీలే స్వయంగా తమకు అవసరమైన పనులు, ప్రణాళికలు రూపొందించుకునే స్థాయికి ఎదిగాయని అన్నారు. గత ప్రభుత్వంలో కేవలం 304 మినీ గోకులాలు నిర్మిస్తే, నేడు 30 వేలకు పైగా మినీ గోకులాలు నిర్మించామని, పల్లె పండుగ ద్వారా 13,326 పంచాయతీల్లో అభివృద్ధి పనులు జరిగాయని, ప్రస్తుతం 10 వేల కిలోమీటర్ల బీటీ రోడ్ల నిర్మాణం పురోగతిలో ఉందని పేర్కొన్నారు.
ఉదయగిరి ప్రాంతంలో వలసలను తగ్గించేందుకే ఇక్కడ పల్లె పండుగ 3.0ను ప్రారంభించామని, ఉదయగిరి కోటకు చేరుకునే రోడ్డు నిర్మాణానికి నిధులు మంజూరు చేసి కోటను ప్రముఖ టూరిజం హబ్గా అభివృద్ధి చేస్తామని ప్రకటించారు. రాబోయే రెండేళ్లలో పంచాయతీరాజ్ శాఖ ద్వారా రూ.1,30,000 కోట్ల భారీ వ్యయంతో వివిధ అభివృద్ధి పనులు చేపడతామని తెలిపారు. గ్రామాల్లో జరుగుతున్న అభివృద్ధి పనుల్లో నాణ్యత లోపిస్తే ప్రజలు నిర్మొహమాటంగా ప్రశ్నించాలని పిలుపునిచ్చారు.