Gold In Bag: అలిపిరిలో దొరికిన బంగారం బ్యాగ్.. సీసీటీవీ పరిశీలించిన అధికారులు..
తిరుమల అలిపిరి తనిఖీ కేంద్రం వద్ద మర్చిపోయిన ఒక బంగారం కలిగిన బ్యాగును టీటీడీ విజిలెన్స్, సెక్యూరిటీ సిబ్బంది చాకచక్యంగా వ్యవహరించి బాధితుడికి సురక్షితంగా అప్పగించారు. తిరుమలకు కాలినడకన వెళ్లే భక్తుల ప్రవేశ ద్వారమైన అలిపిరి వద్ద సోమవారం ఉదయం సుమారు 11:35 గంటలకు భద్రతా తనిఖీలు జరుగుతున్న సమయంలో ఈ సంఘటన చోటుచేసుకుంది. హైదరాబాద్కు చెందిన భక్తుడు మహేష్ అక్కడి భద్రతా తనిఖీల సమయంలో అనుకోకుండా తన వద్ద ఉన్న ఒక బ్యాగును చెక్పాయింట్ వద్దే మర్చిపోయి ముందుకెళ్లాడు.
అక్కడే విధులు నిర్వర్తిస్తున్న టీటీడీ విజిలెన్స్ సిబ్బంది వెంటనే అప్రమత్తమై ఆ యజమాని బ్యాగును స్వాధీనం చేసుకున్నారు. దానిని తెరిచి పరిశీలించగా అందులో సుమారు 100 గ్రాముల బరువు కలిగిన విలువైన బంగారు ఆభరణాలు ఉన్నట్లు గుర్తించారు. వెంటనే రంగంలోకి దిగిన అధికారులు అలిపిరి ప్రాంతంలోని సీసీటీవీ దృశ్యాలను పరిశీలించడం ప్రారంభించారు. సీసీ పుటేజీ ఆధారంగా బ్యాగును మర్చిపోయిన వ్యక్తి హైదరాబాద్కు చెందిన భక్తుడిగా గుర్తించారు.
అప్పటివరకు తాను బంగారం ఉన్న బ్యాగును మర్చిపోయిన విషయాన్ని కూడా సదరు భక్తుడు గుర్తించకపోవడం గమనార్హం. అధికారులు సీసీటీవీ ద్వారా భక్తుడి ఆచూకీ కనిపెట్టి, ఆయనను వెంటనే విజిలెన్స్ కార్యాలయానికి పిలిపించారు. ఆ 100 గ్రాముల బంగారు ఆభరణాల బ్యాగును భద్రంగా ఆయనకు అందజేశారు. తన విలువైన బంగారాన్ని ఏమాత్రం పొరపాటు లేకుండా తిరిగి అందించినందుకు సదరు భక్తుడు ఎంతో సంతోషం వ్యక్తం చేశారు. టీటీడీ యాజమాన్యానికి, విజిలెన్స్, సెక్యూరిటీ సిబ్బందికి ప్రత్యేక ధన్యవాదాలు తెలిపారు. సిబ్బంది ప్రదర్శించిన నిజాయితీ, సమయానుకూల అప్రమత్తత ,అంకితభావంతో కూడిన సేవాభావాన్ని భక్తుడు మహేష్ ఎంతగానో అభినందించారు. టీటీడీ భద్రతా విభాగం సమర్థవంతంగా పనిచేసి శ్రీవారి భక్తుడికి పెద్ద ఉపశమనం కలిగించింది.
