IND vs ENG 3rd ODI: రోహిత్-కోహ్లీ భవిష్యత్తుపై ప్రశ్న.. హ్యారీ బ్రూక్ సమాధానం ఇదే!
Harry Brook Reacts to questions on Rohit Sharma Future: భారత్, ఇంగ్లండ్ మధ్య లార్డ్స్ వేదికగా జరగనున్న మూడో వన్డే సిరీస్ విజేతను నిర్ణయించనుంది. మ్యాచ్కు ముందు జరిగిన మీడియా సమావేశంలో ఇంగ్లండ్ కెప్టెన్ హ్యారీ బ్రూక్ను రోహిత్ శర్మ, విరాట్ కోహ్లీ భవిష్యత్తుపై ప్రశ్నించగా.. ఎలాంటి వివాదాస్పద వ్యాఖ్యలు చేయకుండా తెలివిగా స్పందించాడు. ఇంగ్లండ్ పర్యటన రోహిత్, కోహ్లీలకు చివరిదని వస్తున్న వార్తలపై స్పందిస్తూ.. ‘రోహిత్ గురించి ఏమి చెప్పారో నాకు తెలియదు. రోహిత్, విరాట్ ఇద్దరూ ఎన్నో సంవత్సరాలుగా అద్భుతమైన క్రికెట్ ఆడుతున్నారు. వారు ఇప్పటికీ ఆటలో కొనసాగుతుండటం చూడటం చాలా ఆనందంగా ఉంది’ అని చెప్పి ఆ అంశాన్ని అక్కడితో ముగించాడు.
అనంతరం ఇంగ్లండ్ విజయాల్లో జో రూట్ పాత్ర గురించి బ్రూక్ మాట్లాడుతూ.. ప్రస్తుతం వన్డే క్రికెట్లో తమ జట్టు ఇంకా నేర్చుకునే దశలోనే ఉందని అంగీకరించాడు. ‘జో రూట్ దాదాపు 200 వన్డేలు ఆడినా ఇప్పటికీ కొత్త విషయాలు నేర్చుకోవడానికి ప్రయత్నిస్తుంటాడు. అతడు ఇంగ్లండ్ చరిత్రలోనే అత్యుత్తమ బ్యాటర్. అతని నుంచి మేం కూడా చాలా నేర్చుకుంటున్నాం’ అని బ్రూక్ పేర్కొన్నాడు. ఇటీవల మూడు వన్డే ఇన్నింగ్స్ల్లో వరుసగా 111, 76, 99 స్కోర్లతో రూట్ అజేయంగా నిలవడం విశేషం.
జో రూట్ కార్డిఫ్లో జరిగిన రెండో వన్డేలో 99 పరుగులతో నాటౌట్గా నిలిచి ఇంగ్లండ్కు విజయాన్ని అందించాడు. దీంతో ఇంగ్లండ్ రూట్పై ఎక్కువగా ఆధారపడుతోందా? అనే ప్రశ్నకు బ్రూక్ సమాధానమిచ్చాడు. ‘అవును.. ఇటీవల వన్డేలు, టెస్టుల్లో మేము రూట్పైనే ఎక్కువగా ఆధారపడుతున్నాం. అతడు స్ట్రైక్ రొటేట్ చేస్తూ ఆడుతుంటే.. బ్యాటింగ్ ఇంత సులభంగా ఉంటుందా అని అనిపిస్తుంది. క్రికెట్ చరిత్రలోనే అత్యుత్తమ స్ట్రైక్ రొటేటర్లలో రూట్ ఒకడు. మా జట్టులోని ప్రతి బ్యాటర్ అతడి ఆట నుంచి ఏదో ఒకటి నేర్చుకోవాలి’ అని చెప్పాడు. మరోవైపు కొత్త ఓపెనర్ జేకబ్ బెతెల్ పేలవ ఫామ్లో ఉన్నప్పటికీ బ్రూక్ పూర్తి మద్దతు తెలిపాడు. ‘కేవలం రెండు ఇన్నింగ్స్ల ఆధారంగా ఒక ఆటగాడిని అంచనా వేయలేం. ప్రపంచంలోనే అత్యుత్తమ బౌలర్లను ఎదుర్కొంటున్నాడు. త్వరలోనే పెద్ద ఇన్నింగ్స్ ఆడతాడని నమ్ముతున్నాను’ అని విశ్వాసం వ్యక్తం చేశాడు.
