సడెన్గా చిరుత ఎదురైతే ఏం చేయాలి..? ఇలా చేస్తే మీ వైపు అసలే రాదు..
చిరుత కళ్లముందు కనిపిస్తే మొదట చేయవలసిన పని భయపడకుండా ప్రశాంతంగా ఉండటం. చిరుతను చూసి అరుస్తూ పరుగెత్తితే, అది మిమ్మల్ని వేటగా భావించి వెంబడించే ప్రమాదం ఉంది. నెమ్మదిగా వెనక్కి కదులుతూ చిరుత కదలికలపై ఒక కన్నేసి ఉంచండి. ఎలాంటి ఆకస్మిక కదలికలు చేయకండి. మీ చేతులను పైకెత్తి, మీ జాకెట్ను లేదా మరేదైనా వస్త్రాన్ని వెడల్పుగా పరచి నిలబడండి. దీనివల్ల మీరు పరిమాణంలో పెద్దగా కనిపిస్తారు. చిరుత వెనకడుగు వేసే అవకాశం ఉంది. ఇతరులతో కలిసి ఉన్నప్పుడు అందరూ దగ్గరగా ఒకే సమూహంగా నిలబడండి. సాధారణంగా గుంపుగా ఉన్న మనుషుల జోలికి రావడానికి చిరుతలు సాహసించవు.
ప్రయాణాలు – సమయాల్లో జాగ్రత్తలు: మీ ప్రాంతంలో చిరుత సంచారం ఉన్నట్లు తెలిస్తే, బైక్లపై ప్రయాణించడం పూర్తిగా మానుకోండి. కారులో ప్రయాణించడమే అత్యంత సురక్షితం. తెల్లవారుజామున, సాయంత్రం వేళల్లో లేదా రాత్రి పూట ఒంటరిగా బయటకు వెళ్లడం, వాకింగ్కు వెళ్లడం ఆపేయండి. అత్యవసరమైతే ఇద్దరు ముగ్గురితో కలిసి వెళ్లండి. పొదలు, అడవి లాంటి నిర్మానుష్య రోడ్ల వైపు వెళ్లొద్దు.
పిల్లలు, పెంపుడు జంతువులు: చిరుత మీ వైపు వస్తుంటే, కంగారుపడకుండా గట్టి స్వరంతో, ధీమాగా మాట్లాడండి. దాన్ని భయపెట్టడానికి చిన్నగా శబ్దాలు చేయండి. కానీ దానిపై రాళ్లు విసరడం లేదా రెచ్చగొట్టడం లాంటివి అస్సలు చేయకూడదు. మీరు పిల్లలతో ఉన్నప్పుడు చిరుత కనిపిస్తే, వెంటనే వారిని ఎత్తుకుని మీ ఒడిలో ఉంచుకోండి. వారిని అరుస్తూ పరుగెత్తనివ్వద్దు. అలాగే మీ పెంపుడు జంతువులను అదుపులో ఉంచండి, ఎందుకంటే చిరుత చూపు వాటిపై పడే అవకాశం ఎక్కువ.
ఒకవేళ అది వెనక్కి తగ్గుతుంటే, దానికి వెళ్లడానికి తగినంత స్థలాన్ని ఇవ్వండి. చిరుత అక్కడి నుంచి వెళ్ళిపోగానే వెంటనే సురక్షిత ప్రాంతానికి చేరుకోండి. చుట్టుపక్కల వారిని అప్రమత్తం చేయండి. అయితే చిరుతను చూడటానికి జనాలు గుంపులు గుంపులుగా పోగవ్వకుండా చూసుకోవాలి. జనం ఎక్కువైతే చిరుత భయంతో దాడి చేసే ప్రమాదం పెరుగుతుంది.
మీ ప్రాంతంలో చిరుత కదలికలు కనిపిస్తే వెంటనే అటవీ శాఖ అధికారులకు లేదా స్థానిక పోలీసులకు కచ్చితమైన సమాచారం అందించండి. వారు వచ్చే వరకు వారి సూచనలు పాటించండి. సొంతంగా చిరుతను పట్టుకోవడానికి ప్రయత్నించడం, సెల్ఫీలు, ఫోటోలు లేదా వీడియోలు తీయడానికి దాని దగ్గరకు వెళ్లడం ప్రాణాంతకం కాగలదు. చిరుతపులి కూడా ఒక వన్యప్రాణి. మనం ప్రశాంతంగా, తెలివిగా, జాగ్రత్తగా ప్రవర్తిస్తే ఎలాంటి ప్రమాదాలు జరగకుండా మనల్ని మనం కాపాడుకోవచ్చు.
