మెస్సీ ఆల్‌టైమ్ రికార్డును బద్దలు కొట్టిన ఎంబాప్పే.. గోల్డెన్ బూట్ రేసులో కొత్త ట్విస్ట్!

FIFA World Cup 2026: జులై 18న (శనివారం) జరిగిన థర్డ్ ప్లేస్ ప్లేఆఫ్ మ్యాచ్‌లో ఫ్రాన్స్ జట్టు ఇంగ్లాండ్ చేతిలో ఓడిపోయినప్పటికీ, ఆ జట్టు కెప్టెన్ కిలియన్ ఎంబాప్పే (Kylian Mbappe) సరికొత్త ప్రపంచ రికార్డుతో చరిత్ర సృష్టించాడు. గ్రౌండ్ లో రెండు గోల్స్ సాధించడంతో ఫిఫా ప్రపంచకప్ 2026 గోల్డెన్ బూట్ రేసులో లియోనెల్ మెస్సీని వెనక్కి నెట్టి అగ్రస్థానానికి చేరుకున్నాడు. 

మెస్సీ వరల్డ్ రికార్డుని బ్రేక్ చేసిన ఎంబాప్పే: 
ఇంగ్లాండ్‌తో జరిగిన ఈ మ్యాచ్‌కు ముందు కిలియన్ ఎంబాప్పే, లియోనెల్ మెస్సీ ఇద్దరూ చెరో 8 గోల్స్‌తో సమానంగా ఉన్నారు. అయితే శనివారం నాటి మ్యాచ్‌లో ఎంబాప్పే సెకండ్ హాఫ్ లో అద్భుతమైన ప్రదర్శనతో రెండు గోల్స్ (48వ, 66వ నిమిషాల్లో) సాధించి, ఈ టోర్నీలో తన మొత్తం గోల్స్ సంఖ్యను 10కి చేర్చాడు. తద్వారా 8 గోల్స్‌తో ఉన్న మెస్సీ కంటే రెండు గోల్స్ ఆధిక్యంలోకి దూసుకెళ్లాడు. అంతేకాకుండా, ప్రపంచకప్ చరిత్రలోనే అత్యధిక గోల్స్ చేసిన ఆల్‌టైమ్ లీడింగ్ స్కోరర్‌గా ఎంబాప్పే సరికొత్త చరిత్ర సృష్టించాడు. ఇప్పటి వరకు ప్రపంచకప్‌లలో 21 గోల్స్‌తో అగ్రస్థానంలో కొనసాగుతున్న మెస్సీ రికార్డును బ్రేక్ చేసి, ఎంబాప్పే తన మొత్తం ప్రపంచకప్ గోల్స్ సంఖ్యను 22కి పెంచుకున్నాడు. మెస్సీ 33 మ్యాచ్‌ల్లో 21 గోల్స్ చేయగా, 27 ఏళ్ల ఎంబాప్పే కేవలం 22 మ్యాచ్‌ల్లోనే ఈ మైలురాయిని అందుకున్నాడు.  

గోల్డెన్ బూట్ రేసులో ఉత్కంఠ: 
ఫ్రాన్స్ జట్టు టోర్నమెంట్ ప్రస్థానం ముగియడంతో ఎంబాప్పే ప్రస్తుత రికార్డు 10 గోల్స్, 4 అసిస్ట్‌లతో ముగిసింది. అయితే అర్జెంటీనా లెజెండ్ లియోనెల్ మెస్సీకి ఇంకా ఒక మ్యాచ్ ఆడే ఛాన్స్ ఉంది. ఇవాళ (ఆదివారం) అర్ధరాత్రి స్పెయిన్‌తో జరగబోయే ఫిఫా ప్రపంచకప్ 2026 గ్రాండ్ ఫైనల్‌లో మెస్సీ బరిలోకి దిగుతున్నాడు. ఈ మ్యాచ్‌లో మెస్సీ కనుక రెండు లేదా అంతకంటే ఎక్కువ గోల్స్ సాధిస్తే ఎంబాప్పేను అధిగమించి లేదా సమం చేసి గోల్డెన్ బూట్ గెలుచుకునే ఛాన్స్ ఉంది. దీంతో ఈ రేసు ఫుట్‌బాల్ అభిమానుల్లో తీవ్ర ఉత్కంఠను రేపుతోంది.

త్రిల్లర్ మ్యాచ్‌లో ఇంగ్లాండ్ విజయం: 
వ్యక్తిగతంగా ఎంబాప్పే రికార్డుల వేట కొనసాగించినప్పటికీ, కాంస్య పతకం (మూడో స్థానం) కోసం జరిగిన ఈ మ్యాచ్‌లో ఫ్రాన్స్ 4–6 తేడాతో ఇంగ్లాండ్ చేతిలో ఓడిపోయింది. బుకాయో సాకా సాధించిన అద్భుతమైన హ్యాట్రిక్ గోల్స్, చివరి నిమిషంలో జుడ్ బెల్లింగ్‌హామ్ చేసిన గోల్ సాయంతో ఇంగ్లాండ్ మూడో స్థానాన్ని కైవసం చేసుకుని కాంస్య పతకాన్ని ముద్దాడింది. ఏదేమైనా, మ్యాచ్ ఓడిపోయినా ప్రపంచకప్ చరిత్రలోనే అత్యంత విజయవంతమైన స్ట్రైకర్‌గా ఎంబాప్పే నిలిచిన తీరు ఈ మ్యాచ్‌కే హైలైట్‌. 

Kylian Mbappé now LEADS the Golden Boot race heading into tomorrow’s World Cup Final 🌍👀 pic.twitter.com/ymil2Ph555

— Prime Video Sport UK (@primevideosport) July 18, 2026