H-FAST Raids: కల్తీగాళ్ల గుండెల్లో రైళ్లు.. హైదరాబాద్, రంగారెడ్డి జిల్లాల్లో H-FAST భారీ దాడులు..
భాగ్యనగరంలో ప్రజారోగ్యంతో చెలగాటమాడుతున్న కల్తీగాళ్లపై ఫుడ్ సేఫ్టీ అధికారులు మరోసారి ఉక్కుపాదం మోపారు. హైదరాబాద్, రంగారెడ్డి జిల్లాల పరిధిలో ఆహార కల్తీని అరికట్టేందుకు ఏర్పాటైన కమిషనర్ టాస్క్ ఫోర్స్ ‘H-FAST’ శనివారం భారీ ఆపరేషన్ నిర్వహించింది. నగరంలోని పలు ప్రాంతాల్లోని ఆరు ప్రధాన ఆహార తయారీ, విక్రయ సంస్థలపై అధికారులు ఏకకాలంలో ఆకస్మిక దాడులు జరిపారు. ఈ తనిఖీల్లో విస్తుపోయే నిజాలు వెలుగుచూడటంతో ఆయా సంస్థలకు చెందిన ఆరుగురు నిర్వాహకులను అధికారులు అదుపులోకి తీసుకున్నారు.
బొద్దింకలు, కీటకాల మధ్యే తినుబండారాల తయారీ
హైదరాబాద్, రంగారెడ్డి జిల్లాల్లోని ఐస్క్రీమ్ యూనిట్లు, బేకరీలు, మురుకుల (జంతికల) తయారీ కేంద్రాలతో పాటు బేగంబజార్లోని ఒక ప్రముఖ కిరాణా స్టోర్లో ఈ దాడులు జరిగాయి. ఈ సందర్భంగా తయారీ కేంద్రాల్లోని అపరిశుభ్ర వాతావరణాన్ని చూసి అధికారులు తీవ్ర ఆగ్రహం వ్యక్తం చేశారు. కనీస పెస్ట్ కంట్రోల్ (కీటకాల నివారణ చర్యలు) చేయకపోగా.. ఈగలు, కీటకాలు, బొద్దింకల మధ్యే నిర్వాహకులు ఆహార పదార్థాలను తయారు చేస్తున్నట్లు అధికారులు గుర్తించారు. అక్కడ పనిచేసే సిబ్బంది కనీసం హెయిర్ నెట్స్, గ్లౌజులు కూడా ధరించకుండానే తినుబండారాలను ప్యాక్ చేస్తున్న వైనం బయటపడింది. అంతేకాకుండా, ఎలాంటి వాటర్ టెస్టింగ్ (నీటి పరీక్షలు) చేయని అపరిశుభ్రమైన నీటితోనే ఐస్క్రీమ్లు, బేకరీ ఐటమ్స్ తయారు చేస్తున్నట్లు తేలింది.
వాడిన నూనెలే మళ్లీ మళ్లీ.. కృత్రిమ రంగుల కలకలం
ఈ తనిఖీల్లో ప్రజల ప్రాణాలతో ఎలా ఆడుకుంటున్నారో స్పష్టమైంది. ఒకసారి వాడిన వంట నూనెను (Used Cooking Oil) పదే పదే వేడి చేస్తూ, మురుకులు, బేకరీ పదార్థాల తయారీకి వాడుతున్నట్లు అధికారులు రెడ్ హ్యాండెడ్గా పట్టుకున్నారు. అలాగే ఆకర్షణీయంగా కనిపించడం కోసం తినుబండారాలలో ప్రమాదకరమైన కృత్రిమ రంగులను (Artificial Colours) విచ్చలవిడిగా వినియోగిస్తున్నట్లు గుర్తించి, ఆ రంగులను, వందల లీటర్ల వాడిన నూనెను సీజ్ చేశారు. వీటితో పాటు బేగంబజార్ కిరాణా దుకాణంలో భారీగా ఎక్స్పైరీ డేట్ (గడువు ముగిసిన) అయిన ఆహార ఉత్పత్తులు, నకిలీ బ్రాండ్ల పేరుతో అమ్ముతున్న ప్యాకెట్లను గుర్తించి స్వాధీనం చేసుకున్నారు.
ఎఫ్ఎస్ఎస్ఏఐ (FSSAI) లైసెన్స్ లేదు.. జైలుకు పంపేందుకు సిద్ధం
సమీక్షించిన ఆరు సంస్థలలో చాలా వాటికి కనీసం ఫుడ్ సేఫ్టీ అథారిటీ (FSSAI) నుంచి పొందాల్సిన చట్టబద్ధమైన లైసెన్స్లు కూడా లేవని, నిబంధనలకు విరుద్ధంగా దొంగచాటుగా యూనిట్లను నడుపుతున్నారని అధికారులు వెల్లడించారు. పట్టుబడిన ఆరుగురు నిందితులపై ఆహార భద్రతా చట్టం కింద కఠినమైన సెక్షన్లతో కేసులు నమోదు చేసి, చట్టపరమైన చర్యలకు రంగం సిద్ధం చేశారు.
డబ్బు సంపాదన ధ్యేయంగా పెట్టుకుని ప్రజల ఆరోగ్యంతో, ముఖ్యంగా అమాయక పిల్లలు తినే ఐస్క్రీమ్లు, బేకరీ ఫుడ్స్తో చెలగాటమాడితే ఎంతటి వారైనా సరే ఊపేక్షించేది లేదని అధికారులు హెచ్చరించారు. రాబోయే రోజుల్లో హైదరాబాద్, రంగారెడ్డి పరిసర ప్రాంతాల్లో H-FAST టాస్క్ ఫోర్స్ దాడులు మరింత ముమ్మరంగా కొనసాగుతాయని స్పష్టం చేశారు.
