టాలీవుడ్ తారలంతా కలిసి మైదానంలో దిగి సందడి చేసిన అరుదైన, అద్భుతమైన ఘట్టాల్లో 1993 నాటి విశాఖపట్నం మ్యాచ్ ఒకటి. అప్పటి తరం తారల మధ్య ఉన్న స్నేహబంధాన్ని, సేవా దృక్పథాన్ని ఈ మ్యాచ్ మరోసారి అభిమానులకు గుర్తుచేస్తుంది. 1993లో విశాఖపట్నం పోర్ట్ రోడ్లో ఉన్న ఇందిరా ప్రియదర్శిని స్టేడియంలో జరిగిన ఆ ఛారిటీ మ్యాచ్ టాలీవుడ్ చరిత్రలో ఒక మధురమైన జ్ఞాపకం. ఒక స్థానిక ఛారిటీ సంస్థకు ఫండ్స్ సేకరించేందుకు మన టాలీవుడ్ స్టార్స్ అంతా కదిలి వెళ్లారు. ఈ మ్యాచ్కు సంబంధించిన ఫోటోలు ఇప్పటికీ సోషల్ మీడియాలో వైరల్ అవుతుంటాయి. ముఖ్యంగా ఆ సమయంలో మెగాస్టార్ చిరంజీవి, హాస్య బ్రహ్మ బ్రహ్మానందం మధ్య ఉన్న క్లోజ్ బాండింగ్ ఆ ఫోటోల్లో స్పష్టంగా కనిపిస్తుంది. అలాగే విక్టరీ వెంకటేష్, అప్పటి స్టార్ హీరోయిన్ రోజా కూడా ఈ మ్యాచ్లో పాల్గొని సందడి చేశారు. ఎటువంటి ఇగోలు లేకుండా స్టార్స్ అంతా ఒకచోట చేరి ఆడిన ఆ మ్యాచ్ అప్పటి అభిమానులకు కన్నుల పండుగే. అయితే టాలీవుడ్ తారలు క్రికెట్ ఆడి నిధులు సేకరించడం కేవలం 1993కే పరిమితం కాలేదు. అదొక సత్సంప్రదాయంగా ఆ తర్వాత కూడా దశాబ్దాల పాటు కొనసాగింది. సమాజానికి ఏ ఆపద వచ్చినా.. మా (MAA) అసోసియేషన్కి నిధులు అవసరమైనా హీరోలంతా బ్యాట్లు పట్టుకుని గ్రౌండ్లోకి దిగారు.
1999లో కార్గిల్ యుద్ధ సమయంలో సైనికుల కుటుంబాలను ఆదుకోవడానికి, అలాగే ఉమ్మడి ఆంధ్రప్రదేశ్లో వరదలు, తుఫాన్లు వచ్చినప్పుడు టాలీవుడ్ ఇండస్ట్రీ ఆధ్వర్యంలో భారీ స్థాయిలో క్రికెట్ మ్యాచ్లు నిర్వహించారు. ఇవి కేవలం ఆటగా మాత్రమే కాకుండా, విరాళాలు సేకరించడానికి ఒక గొప్ప ప్లాట్ఫామ్గా నిలిచాయి. ఈ పరంపరలో అత్యంత భారీ స్థాయిలో జరిగిన క్రికెట్ ఈవెంట్ మేము సైతం. 2014లో హుద్హుద్ తుఫాను ఉత్తరాంధ్రను అతలాకుతలం చేసినప్పుడు, బాధితులను ఆదుకోవడానికి టాలీవుడ్ మొత్తం ఏకమైంది. చిరంజీవి, బాలకృష్ణ, నాగార్జున, వెంకటేష్ దగ్గర్నుంచి నేటి తరం స్టార్లైన ఎన్టీఆర్, రామ్ చరణ్, అల్లు అర్జున్, ప్రభాస్ వరకు అంతా క్రికెట్ ఆడి కోట్లాది రూపాయల విరాళాలు సేకరించి ప్రభుత్వానికి అందజేశారు.
ఆ తర్వాత కాలంలో ఈ క్రికెట్ ఫీవర్ సెలబ్రిటీ క్రికెట్ లీగ్తో మరింత ప్రొఫెషనల్గా మారింది. వెంకటేష్, అఖిల్ లాంటి వారు ‘తెలుగు వారియర్స్’ టీం ద్వారా టాలీవుడ్ సత్తాను జాతీయ స్థాయిలో కూడా చాటుతూ వస్తున్నారు. మొత్తంగా చూసుకుంటే సిల్వర్ స్క్రీన్ మీద ప్రేక్షకులను రంజింపజేసే మన హీరోలు, రియల్ లైఫ్లోనూ తాము రియల్ హీరోలమే అని ఈ క్రికెట్ మ్యాచ్ల ద్వారా ఎన్నోసార్లు నిరూపించుకున్నారు. వినోదాన్ని పంచుతూనే సామాజిక బాధ్యతను నెరవేర్చడంలో టాలీవుడ్ ఎప్పుడూ ముందుంటుంది అనడానికి 1993 నాటి వైజాగ్ మ్యాచ్ నుంచి ‘మేము సైతం’ వరకూ జరిగిన ఈవెంట్లే సజీవ సాక్ష్యాలు. మైదానంలో వారు పంచుకున్న చిరునవ్వులు, చేసిన అల్లరి, ఆడిన ఆట.. ఇవన్నీ కేవలం ఆటగాడికి సంబంధించినవి కావు, ఆపదలో ఉన్నవారికి సాయం చేయాలన్న వారి విశాల హృదయానికి ప్రతీకలు.
మరిన్ని సినిమా వార్తల కోసం ఇక్కడ క్లిక్ చేయండి.