MI vs CSK: ఐపీఎల్ 2026లో అత్యంత ఆసక్తికరమైన పోరుకు సమయం ఆసన్నమైంది. కాసేపట్లో (2026, ఏప్రిల్ 23) ముంబైలోని వాంఖడే స్టేడియంలో ఐదుసార్లు ఛాంపియన్లు అయిన ముంబై ఇండియన్స్, చెన్నై సూపర్ కింగ్స్ తలపడనున్నాయి. అయితే ఈ మ్యాచ్ కంటే ఎక్కువగా ఇప్పుడు అందరి దృష్టి ‘హిట్ మ్యాన్’ రోహిత్ శర్మ ఫిట్నెస్పైనే ఉంది. ఏప్రిల్ 12న జరిగిన మ్యాచ్లో రోహిత్ హ్యామ్స్ట్రింగ్ గాయానికి గురయ్యాడు. దీనివల్ల పంజాబ్ కింగ్స్, గుజరాత్ టైటాన్స్తో జరిగిన గత రెండు మ్యాచ్లకు దూరమయ్యాడు. ఇక బుధవారం నాడు జరిగిన ప్రాక్టీస్ సెషన్లో రోహిత్ సుమారు 25 నిమిషాల పాటు బ్యాటింగ్ చేస్తూ కనిపించాడు. బ్యాటింగ్ చేస్తున్నప్పటికీ, రోహిత్ భారీ షాట్లకు వెళ్లకుండా చాలా జాగ్రత్తగా ఆడాడు. మెడికల్ టీమ్ అతని కదలికలను నిశితంగా గమనించింది.
‘ఇంపాక్ట్ ప్లేయర్’గా వచ్చే ఛాన్స్?:
రోహిత్ శర్మను ఫీల్డింగ్ కష్టాల నుంచి తప్పించి, కేవలం బ్యాటింగ్ కోసం ‘ఇంపాక్ట్ ప్లేయర్’గా ఉపయోగించుకునే ఆలోచనలో MI మేనేజ్మెంట్ ఉంది. టాస్ పడే సమయానికి అతని ఫిట్నెస్ను బట్టి తుది నిర్ణయం తీసుకోనున్నారు. ఒకవేళ రోహిత్ ఆడకపోతే, క్వింటన్ డి కాక్తో కలిసి డానిష్ మలేవార్ ఓపెనింగ్ చేసే అవకాశం ఉంది.
►ALSO READ | Mitchell Starc: ఢిల్లీ క్యాపిటల్స్ కు కొత్త జోష్ : మిచెల్ స్టార్క్ ఎంట్రీతో గంతులేస్తున్నారు..
CSKపై రోహిత్ రికార్డులు!:
ఈ మ్యాచ్లో రోహిత్ శర్మ ఆడటం ముంబైకి చాలా కీలకం. ఎందుకంటే: CSKపై అతడికి అద్భుతమైన ట్రాక్ రికార్డు ఉంది. 31 మ్యాచ్ల్లో 913 పరుగులు సాధించాడు. ఒక్క ముంబై స్టేడియంలోనే చెన్నైపై 500కు పైగా పరుగులు చేశాడు.
హెడ్ టు హెడ్ రికార్డులు:
ముంబై ఇండియన్స్, చెన్నై సూపర్ కింగ్స్ మధ్య ఇప్పటి వరకు మొత్తం 39 మ్యాచ్లు జరిగాయి. అందులో ముంబై 21 మ్యాచులలో గెలవగా, చెన్నై మాత్రం 18 మ్యాచుల్లో విజయం సాధించింది. కానీ గత ఆరు మ్యాచ్ల్లో చెన్నై ఐదు గెలిచి ఆధిపత్యం ప్రదర్శించినప్పటికీ, 2025లో జరిగిన చివరి మ్యాచ్లో ముంబై 9 వికెట్ల తేడాతో ఘన విజయం సాధించింది. నేడు సొంత గడ్డపై మళ్ళీ అదే జోరును కొనసాగించాలని ముంబై భావిస్తోంది.