రష్యాలోని సైబీరియా ప్రాంతమైన ఇర్కుట్స్క్‌లో.. తీవ్రమైన న్యుమోనియాతో 28 ఏళ్ల ల్యాబ్ టెక్నీషియన్ మరణించింది. ఈ ఘటన భయాందోళనలకు కారణమైంది. ప్లేగు నివారణ పరిశోధనా కేంద్రంలో ప్రమాదకరమైన వ్యాధికారక క్రిమి కారణంగా ఇన్ఫెక్షన్ సోకడం వల్లే ఆమె అనారోగ్యానికి గురై ఉండవచ్చని మెడికల్ రిపోర్ట్స్ సూచిస్తున్నాయి. ఆ మహిళతో ప్రత్యక్షంగా లేదా పరోక్షంగా సంబంధం కలిగి ఉండవచ్చని భావిస్తున్న దాదాపు 200 మందిని వైద్య పర్యవేక్షణలో, ఐసోలేషన్లో ఉంచారు.
ఈ ఘటన ఇర్కుట్స్క్ సమీపంలోని షెలెఖోవ్ పట్టణంలో జరిగింది. అక్కడ సదరు మహిళ ప్లేగు నిరోధక పరిశోధనా సంస్థలో పనిచేసేది. నివేదికల ప్రకారం, ఆమె తన మరణానికి ముందు, ఆ సంస్థలో పనిచేస్తుండగా సజీవ జీవ పదార్థం ఉన్న ఒక టెస్ట్ ట్యూబ్‌ను ప్రమాదవశాత్తు పగలగొట్టానని వైద్య సిబ్బందికి చెప్పింది.
ఆ తర్వాత ఆమెకు ‘కారణం తెలియని’ తీవ్రమైన న్యుమోనియా సోకడంతో ఆమెను ఆసుపత్రిలో చేర్చారు. ఆమె పరిస్థితి వేగంగా క్షీణించడంతో, గురువారం (అక్టోబర్ 1) మరణించే ముందు ఆమెను వెంటిలేటర్‌పై ఉంచారు. ఆమె న్యుమోనిక్ ప్లేగు బారిన పడి ఉండవచ్చనే భయాలను నివేదికలు రేకెత్తించాయి, అయినప్పటికీ ఆమె అనారోగ్యానికి లేదా మరణానికి ప్లేగు కారణమని రష్యన్ అధికారులు అధికారికంగా ధృవీకరించలేదు.
ప్రయోగశాల ఉద్యోగితో ప్రత్యక్షంగా లేదా పరోక్షంగా సంబంధం కలిగి ఉన్నారని భావిస్తున్న కనీసం 197 మందిని ఐసోలేషన్లో ఉంచారు. వారిలో 100 మందికి పైగా ఆసుపత్రి వార్డులలో పర్యవేక్షణలో ఉన్నారు. ముందుజాగ్రత్త చర్యల్లో భాగంగా, అధికారులు షెలెఖోవ్ జిల్లా ఆసుపత్రిలో క్వారంటైన్ వార్డు ఏర్పాటు చేశారు. సమీపంలోని ఒక ప్రసూతి కేంద్రంపై ఆంక్షలు విధించారు. అధికారులు ఈ కేసుకు సంబంధించిన పరిస్థితులపై దర్యాప్తు చేస్తున్నారు. వైరస్ వ్యాప్తిని నివారించేందుకు ముమ్మరంగా ప్రయత్నాలు చేస్తున్నారు.
కొన్ని మీడియా నివేదికలు ఈ అనుమానిత సంక్రమణను ప్లేగు వ్యాధికి కారణమయ్యే బాక్టీరియా అయిన యెర్సినియా పెస్టిస్‌తో ముడిపెట్టడం మరింత ఆందోళన కలిగించింది. కానీ మహిళ మరణానికి కారణమైన వ్యాధికారకం ఏదనే విషయంలో ప్రస్తుతానికి స్పష్టత లేదు.
న్యుమోనిక్ ప్లేగు అనేది బ్యూబోనిక్ ప్లేగు కన్నా భిన్నమైనది. ఎందుకంటే ఇది ప్రధానంగా ఊపిరితిత్తులను ప్రభావితం చేస్తుంది. ఇది శ్వాసకోశ తుంపరల ద్వారా సోకిన వ్యక్తి నుంచి మరొక వ్యక్తికి వ్యాపిస్తుంది. అందువల్ల ఒకవేళ ఈ వ్యాధి వ్యాపిస్తే.. ఇది ప్రజారోగ్యానికి తీవ్రమైన ముప్పుగా పరిణమించే ప్రమాదం ఉంది.
అమెరికా వ్యాధి నియంత్రణ, నివారణ కేంద్రాల ప్రకారం.. అకస్మాత్తుగా జ్వరం రావడం, తలనొప్పి, నీరసం, శ్వాస తీసుకోవడంలో ఇబ్బంది, ఛాతీ నొప్పి, దగ్గు వంటి శ్వాసకోశ సమస్యలు దీని లక్షణాలు. రోగుల నుంచి నీళ్ల విరేచనాలు లేదా రక్తం కలిసిన శ్లేష్మం కూడా రావచ్చు. ప్రపంచ ఆరోగ్య సంస్థ ప్రకారం.. చికిత్స ఆలస్యమైతే ప్లేగు ప్రాణాంతకం కూడా కావచ్చు. కానీ వ్యాధిని సకాలంలో గుర్తించి, సరైన యాంటీబయాటిక్స్‌తో చికిత్స చేస్తే నయం చేసే అవకాశం ఉంది.