అల్లూరి సీతారామరాజు జిల్లాలోని గూడెంకొత్తవీధి మండలం ధారకొండ పంచాయతీ పరిధిలో మూడు గ్రామాలకు చెందిన ప్రజలు తమ దీర్ఘకాలిక సమస్యను పరిష్కరించుకునేందుకు అసాధారణ ఐక్యతను ప్రదర్శించారు. సరైన రహదారి సౌకర్యం లేక కొండలు, వాగులు దాటాల్సిన పరిస్థితి ఎదుర్కొంటున్న తరుణంలో, ఇటీవల తడకపల్లి గ్రామానికి చెందిన గర్భిణి ప్రసవ నొప్పులతో బాధపడుతూ డోలీలో ఎనిమిది కిలోమీటర్ల దూరం ఆసుపత్రికి తరలించబడిన సంఘటన వారిని తీవ్రంగా కలచివేసింది. ఈ ఘటనతో చలించిపోయిన గ్రామస్థులు, ప్రభుత్వ సహాయం కోసం వేచి చూడకుండా సొంతంగా చొరవ తీసుకున్నారు. ఇంటింటికీ రూ. 200 చొప్పున చందా పోగుచేసి, అందరూ కలిసి శ్రమదానం ద్వారా రాత్రికి రాత్రే రాతికట్టు వారధిని నిర్మించారు. ఈ తాత్కాలిక వంతెనతో ప్రస్తుతం బైకులు, జీపులు, ట్రాక్టర్లు సునాయాసంగా రాకపోకలు సాగిస్తున్నాయి. నిత్యావసర వస్తువులు తెచ్చుకోవడం, ఆసుపత్రికి వెళ్లడం వంటి అవసరాలు తీరాయి. అయితే, ఈ తాత్కాలిక పరిష్కారం భవిష్యత్తుకు సరిపోదని గ్రామస్థులు స్పష్టం చేస్తున్నారు. గతంలో భారీ వర్షాలకు కొట్టుకుపోయిన కాలువ స్థానంలో శాశ్వత వంతెనను, పక్కా రహదారిని నిర్మించాలని ప్రభుత్వాన్ని అభ్యర్థిస్తున్నారు. తమ కష్టాలను అర్థం చేసుకొని త్వరగా బ్రిడ్జిని మంజూరు చేయాలని కోరుతున్నారు.
మరిన్ని ఆంధ్రప్రదేశ్ వార్తల కోసం ఇక్కడ క్లిక్ చేయండి.