ROKO: క్రికెట్ లవర్లకు పండుగలాంటి వార్త వెలువడింది. వెస్టిండీస్‌తో జరిగిన వన్డే సిరీస్ ముగిసిన తర్వాత భారత స్టార్ బ్యాటర్లు విరాట్ కోహ్లీ, రోహిత్ శర్మ మళ్లీ ఎప్పుడు బరిలోకి దిగుతారా అని అభిమానులు ఎంతో ఆత్రుతగా ఎదురుచూస్తున్నారు. కేవలం వన్డే ఫార్మాట్‌‌లోనే కొనసాగుతున్న ఈ ఇద్దరు దిగ్గజాలు నవంబర్ నెలలో భారత జెర్సీలో మైదానంలో సందడి చేయనున్నారు. వచ్చే నెలలో జరగబోయే న్యూజిలాండ్ పర్యటనలో ఈసారి 3 వన్డేలు కాకుండా ఏకంగా 5 వన్డేల సిరీస్‌లో ఈ ఇద్దరు స్టార్ ప్లేయర్లు ఆడబోతున్నారు.
వెస్టిండీస్ సిరీస్‌లో పరుగుల విధ్వంసం
ఇటీవల ముగిసిన వెస్టిండీస్ వన్డే సిరీస్‌ను భారత్ 2-1 తేడాతో కైవసం చేసుకుంది. ఈ సిరీస్‌లో విరాట్ కోహ్లీ, రోహిత్ శర్మ తమ క్లాసిక్ బ్యాటింగ్‌తో అభిమానులను అలరించారు. కోహ్లీ తొలి మ్యాచ్‌లో అజేయంగా 139 పరుగులు సాధించగా, మొత్తంగా 168 పరుగులు చేశాడు. మరోవైపు కెప్టెన్ రోహిత్ శర్మ రెండో మ్యాచ్‌లో సెంచరీ (101), మూడో మ్యాచ్‌లో 92 పరుగులు చేసి సిరీస్‌లో ఏకంగా 225 పరుగులు సాధించాడు. యంగ్ కెప్టెన్ శుభ్‌మన్ గిల్ డబుల్ సెంచరీ, సెంచరీతో 334 పరుగులు చేసి ప్లేయర్ ఆఫ్ ది సిరీస్గా నిలిచాడు.
న్యూజిలాండ్‌లో వన్డే సమరం ఎప్పటినుంచంటే?
భారత జట్టు త్వరలో న్యూజిలాండ్ పర్యటనకు వెళ్లనుంది. అక్కడ టీమిండియా టీ20లు, వన్డేలు, టెస్టుల సిరీస్ ఆడనుంది. అక్టోబర్ 22, 2026 నుంచి మొదలయ్యే 5 టీ20ల సిరీస్ తర్వాత, నవంబర్ 1 నుంచి 5 వన్డేల భారీ సిరీస్ ప్రారంభమవుతుంది. టీ20లకు వీడ్కోలు పలికినందున విరాట్, రోహిత్‌లు నేరుగా నవంబర్ 1న జరిగే మొదటి వన్డే నుంచే మైదానంలోకి దిగుతారు. కివీస్ గడ్డపై చాలా కాలం తర్వాత ఈ ఇద్దరు దిగ్గజాలు వన్డే సిరీస్ ఆడనుండటం విశేషం.
న్యూజిలాండ్ వన్డే సిరీస్ షెడ్యూల్
భారత్, న్యూజిలాండ్ మధ్య తొలి వన్డే నవంబర్ 1న ఆక్లాండ్ వేదికగా జరుగుతుంది. రెండో వన్డే నవంబర్ 7న వెల్లింగ్టన్‌లో, మూడో వన్డే నవంబర్ 10న హ్యామిల్టన్‌లో నిర్వహిస్తారు. చివరి రెండు వన్డేలు మౌంట్ మౌంగనుయ్ మైదానంలో నవంబర్ 13, నవంబర్ 15 తేదీలలో జరగనున్నాయి. ఈ వన్డే సిరీస్ ముగిసిన తర్వాత నవంబర్ 19 నుంచి రెండు మ్యాచ్‌ల టెస్టు సిరీస్ ప్రారంభమవుతుంది.
పాత జ్ఞాపకాలను తిరగరాయనున్న దిగ్గజాలు
విరాట్ కోహ్లీ న్యూజిలాండ్ గడ్డపై చివరిసారిగా ఫిబ్రవరి 2020లో వన్డే సిరీస్ ఆడాడు. రోహిత్ శర్మ జనవరి 2019 తర్వాత కివీస్ దేశంలో వన్డే మ్యాచ్ ఆడలేదు. కెరీర్ చివరి దశలో ఉన్న ఈ ఐకానిక్ జోడీని మళ్లీ న్యూజిలాండ్ పిచ్‌లపై చూడటానికి అభిమానులు ఆసక్తిగా ఎదురుచూస్తున్నారు. 2027 ప్రపంచకప్ లక్ష్యంగా సాగుతున్న ఈ ఇద్దరు దిగ్గజాలకు ఈ 5 వన్డేల సిరీస్ ఎంతో కీలకం కానుంది.
మరిన్ని క్రీడా వార్తల కోసం ఇక్కడ క్లిక్ చేయండి..