నా రిటైర్మెంట్ ఎప్పుడో నాకే తెలుసు.. రోహిత్పై ఆగని రూమర్లు: బీసీసీఐ మీటింగ్‌లో అసలేం జరిగింది?

Rohit Sharma Retirement: భారత క్రికెట్‌లో ఒక ఆటగాడు తోటి ప్లేయర్లతో కలిసి బాల్కనీలో కూర్చున్నా, లేదా కుటుంబ సభ్యులు ఐపీఎల్ మ్యాచ్‌కు వచ్చినా.. ఆఖరికి ఏదైనా రియాలిటీ షోలో కనిపించినా దానిని రిటైర్మెంట్ సంకేతంగా భావించడం పరిపాటిగా మారింది. రోహిత్ శర్మ విషయంలోనూ ప్రస్తుతం అదే జరుగుతోంది. శుభ్‌మన్ గిల్ వన్డే కెప్టెన్‌గా బాధ్యతలు చేపట్టినప్పటి నుంచి రోహిత్ భవిష్యత్తుపై రకరకాల పుకార్లు షికారు చేస్తున్నాయి. కానీ ఇంగ్లాండ్ పర్యటనలో లార్డ్స్ మైదానంలో ప్రదర్శతో హిట్ మ్యాన్ అద్భుత ఫామ్‌లో కొనసాగుతున్నాడు. బయట వస్తున్న విమర్శలపై స్పందిస్తూ శబ్దాలు (నాయిస్) లేకపోతే అందులో మజా ఉండదని రోహిత్ ఆ వార్తలని కొట్టిపారేశాడు. 

బీసీసీఐ రివ్యూ మీటింగ్ సంచలనం.. సెలెక్టర్ల ఒత్తిడి నిజమేనా?: 

రోహిత్ శర్మ రిటైర్మెంట్‌పై ఇటీవల ముంబైలో జరిగిన బీసీసీఐ రివ్యూ మీటింగ్‌లో చర్చ జరిగినట్లు వార్తలు రావడం వాతావరణాన్ని మరింత వేడెక్కించింది. బోర్డులోని ఒక సెలెక్టర్ రోహిత్‌ను రిటైర్ అవ్వాలని కోరినట్లు, దానికి హిట్ మ్యాన్ తీవ్ర అసంతృప్తి వ్యక్తం చేసినట్లు, ఆ తర్వాత పెద్దల జోక్యంతో సర్దుమనిగిందంటూ రకరకాల వర్షన్లు ప్రచారంలోకి వచ్చాయి. చీఫ్ సెలెక్టర్ అజిత్ అగార్కర్ ఈ మీటింగ్‌కు హాజరుకాకపోవడంపై కూడా అనేక అంచనాలు వెలువడ్డాయి. కానీ బీసీసీఐ కార్యదర్శి దేవజిత్ సైకియా స్పందిస్తూ అసత్య ప్రచారాలను నమ్మవద్దని, ఆధారాలు లేని వార్తలను వ్యాప్తి చేయవద్దని స్పష్టం చేశారు.

వడాపావ్ మానేసి పక్కా ఫిట్‌నెస్.. కంబ్యాక్ కోసం తీవ్ర శ్రమ: 

11,000 పైగా వన్డే పరుగులు, మూడు డబుల్ సెంచరీలు, ఛాంపియన్స్ ట్రోఫీ, టీ20 వరల్డ్ కప్ వంటి చారిత్రాత్మక విజయాలను భారత్‌కు అందించిన రోహిత్ శర్మ, తన రిటైర్మెంట్ నిర్ణయం ఎప్పుడు తీసుకోవాలో నిర్ణయించుకునే హక్కును సంపాదించుకున్నాడు. రిటైర్ అవ్వడానికి తాను ఇంకా రెడీగా లేనని అతని చర్యలే నిరూపిస్తున్నాయి. రోహిత్ తనకు ఎంతో ఇష్టమైన వడాపావ్‌ను కూడా త్యాగం చేసి, బరువు తగ్గి మైదానంలో మరింత వేగంగా కదిలేందుకు తీవ్రంగా శ్రమిస్తున్నాడు. డొమెస్టిక్ క్రికెట్ ఆడేందుకు సైతం ఆసక్తి చూపిస్తూ అంతర్జాతీయ స్థాయిలో రాణించాలనే కసి తనలో ఇంకా ఉందన్నాడు. 

జైస్వాల్ సిద్ధమే.. రోహిత్‌ను బలవంతంగా తప్పించాలా?: 

భారత క్రికెట్ భవిష్యత్తు కోసం యశస్వి జైస్వాల్ వంటి యువ కిరణాలు సిద్ధంగా ఉన్న మాట వాస్తవమే, సెలెక్టర్లు కూడా 2027 వన్డే ప్రపంచకప్ దృష్టిలో పెట్టుకుని ప్రణాళికలు రచించడంలో తప్పులేదు. కానీ ఉత్తమ ఫామ్, ఫిట్‌నెస్‌తో ఉన్న రోహిత్ శర్మను బలవంతంగా బయటకు పంపడం సరైన పద్ధతి కాదని క్రీడా పండితులు పేర్కొంటున్నారు. జైస్వాల్‌ను జట్టుతో పాటు ప్రయాణింపజేస్తూ, తగినన్ని లిస్ట్-ఎ మ్యాచ్‌లు ఆడిస్తూ వారసుడిగా తీర్చిదిద్దడం సెలెక్టర్ల బాధ్యత. అంతే తప్ప ప్రతి మ్యాచ్‌నూ రోహిత్ కు రిటైర్మెంట్ పరీక్షగా మార్చడం సరికాదు. ఆటగాడిగా తాను వైదొలగాలని భావించిన రోజు హిట్ మ్యాన్ స్వయంగా ఆ నిర్ణయాన్ని ప్రకటించనున్నాడు.