ఫోల్డబుల్‌ ఫోన్‌ కాదు.. మరో మోడల్ డెవలప్ చేస్తున్న సామ్‌సంగ్..! తెలిస్తే షాకవ్వాల్సిందే

స్మార్ట్‌ఫోన్లను రోల్ చేసే రోజులు దగ్గరలోనే ఉన్నాయి. సామ్‌సంగ్ సంస్థ తన గెలాక్సీ జెడ్ సిరీస్‌లో భాగంగా రోలబుల్ ఫోన్లను తీసుకురావడానికి సిద్ధమైంది. టాబ్లెట్ లాంటి భారీ స్క్రీన్ అనుభవాన్ని ఇచ్చే ఈ కొత్త టెక్నాలజీ గురించి ఇండస్ట్రీలో జరుగుతున్న చర్చలు ఏంటి? సామ్‌సంగ్ ఎందుకు ఈ దిశగా అడుగులు వేస్తోంది?

ఫోల్డబుల్ స్మార్ట్‌ఫోన్ల విభాగంలో ప్రపంచాన్ని శాసిస్తున్న సామ్‌సంగ్, ఇప్పుడు తదుపరి తరం టెక్నాలజీ వైపు అడుగులు వేస్తోంది. ఫోల్డబుల్ ఫోన్ల తర్వాత అత్యంత కీలకమైన ‘రోలబుల్ డిస్‌ప్లే’ టెక్నాలజీపై ఈ దక్షిణ కొరియా దిగ్గజం దృష్టి సారించింది. తాజా నివేదికల ప్రకారం, సామ్‌సంగ్ తన మొదటి రోలబుల్ స్మార్ట్‌ఫోన్‌ను 2028 మొదటి అర్ధభాగంలో వాణిజ్యపరంగా మార్కెట్లోకి తీసుకురావాలని ప్రణాళికలు సిద్ధం చేస్తోంది. ‘గెలాక్సీ జెడ్ స్లైడ్’ (Galaxy Z Slide) పేరుతో రాబోతున్న ఈ పరికరం, స్మార్ట్‌ఫోన్, టాబ్లెట్ అనుభవాన్ని ఒకే చోట అందించనుంది.

అద్భుతమైన టెక్నాలజీ

సామ్‌సంగ్ ఎలక్ట్రానిక్స్ మరియు సామ్‌సంగ్ డిస్‌ప్లే సంయుక్తంగా అభివృద్ధి చేస్తున్న ఈ రోలబుల్ స్మార్ట్‌ఫోన్‌లో అత్యంత అధునాతన ఓలెడ్ (OLED) ప్యానెల్‌ను ఉపయోగించనున్నారు. లీకైన సమాచారం ప్రకారం, ఈ ఫోన్ సాధారణ స్మార్ట్‌ఫోన్ సైజు నుండి అవసరాన్ని బట్టి ఏకంగా 10-ఇంచుల భారీ డిస్‌ప్లేగా విస్తరించనుంది. ఇది 16:9 యాస్పెక్ట్ రేషియోతో ఉండటమే కాకుండా, సుమారు 440 పిపిఐ (ppi) పిక్సెల్ సాంద్రతను కలిగి ఉంటుందని మార్కెట్ పరిశోధనా సంస్థలు అంచనా వేస్తున్నాయి. ఈ కొత్త డిజైన్ ద్వారా వినియోగదారులు వీడియో ప్లేబ్యాక్, మల్టీటాస్కింగ్‌ను మునుపెన్నడూ లేని స్థాయిలో ఆస్వాదించవచ్చు.

ఆధిపత్యమే లక్ష్యం

ప్రస్తుతం ఫోల్డబుల్ ఫోన్ల మార్కెట్‌లో ఇతర చైనా బ్రాండ్ల నుంచి గట్టి పోటీ ఉన్నప్పటికీ, సామ్‌సంగ్ తన పట్టును నిలుపుకుంటోంది. రోలబుల్ టెక్నాలజీని వాణిజ్యపరంగా విజయవంతం చేయడం ద్వారా, భవిష్యత్ స్మార్ట్‌ఫోన్ మార్కెట్‌లో కూడా తన అగ్రస్థానాన్ని సుస్థిరం చేసుకోవాలని కంపెనీ భావిస్తోంది. గతంలో సిఈఎస్ (CES) వంటి వేదికలపై ‘ఫ్లెక్స్ హైబ్రిడ్’, ‘రోలబుల్ ఫ్లెక్స్’ వంటి కాన్సెప్ట్ డిస్‌ప్లేలను ప్రదర్శించిన సామ్‌సంగ్, ఇప్పుడు వాటిని వినియోగదారులకు అందుబాటులోకి తెచ్చే దిశగా అడుగులు వేస్తోంది.

2028లో మొదటి మోడల్ విడుదలైన తర్వాత, 2030 నాటికి రెండో తరం రోలబుల్ ఫోన్‌ను కూడా తీసుకురావాలని కంపెనీ లక్ష్యంగా పెట్టుకుంది. ఈ విప్లవాత్మక మార్పుతో స్మార్ట్‌ఫోన్ల రూపం పూర్తిగా మారిపోయే అవకాశం ఉంది. ఇప్పటివరకు రోలబుల్ ఫోన్లు కేవలం కాన్సెప్ట్‌లుగానే మిగిలిపోయిన నేపథ్యంలో, సామ్‌సంగ్ దీనిని రియాలిటీలోకి తీసుకువస్తే అది టెక్ ప్రపంచంలో ఒక చారిత్రక ఘట్టం కానుంది.