Queen 2: బాలీవుడ్లో లేడి ఓరియెంటెడ్ కథలతో ప్రత్యేక గుర్తింపు తెచ్చుకున్న చిత్రాల్లో ‘క్వీన్’ ఒకటి. కంగనా రనౌత్ కెరీర్ను మరో స్థాయికి తీసుకెళ్లిన ఈ సినిమా విడుదలై దాదాపు 13 సంవత్సరాలు గడిచిన తర్వాత, ఇప్పుడు దాని సీక్వెల్ ‘క్వీన్ 2’పై ఆసక్తికర అప్డేట్ వచ్చింది. ఎంతోకాలంగా అభిమానులు ఎదురుచూస్తున్న ఈ చిత్రం షూటింగ్ పూర్తయినట్లు తెలుస్తుండటంతో సోషల్ మీడియాలో దీనిపై చర్చ మొదలైంది. షూటింగ్ ముగిసిన సందర్భంగా కంగనా రనౌత్, దర్శకుడు వికాస్ బహల్తో కలిసి నిర్వహించిన సెలబ్రేషన్స్కు సంబంధించిన వీడియో కూడా వైరల్గా మారింది. ఇటీవల విడుదలైన ‘భారత్ భాగ్య విధాత’ సినిమాతో మరోసారి ప్రేక్షకులను ఆకట్టుకున్న కంగనా రనౌత్, ప్రస్తుతం తన తదుపరి ప్రాజెక్టులపై పూర్తి దృష్టి పెట్టారు. అందులో అత్యంత ప్రతిష్టాత్మకంగా భావిస్తున్న ‘క్వీన్ 2’ షూటింగ్ విజయవంతంగా పూర్తయినట్లు సమాచారం. ఈ సందర్భంగా చిత్రబృందం కేక్ కట్ చేసి వేడుకలు కూడా జరుపుకుంది. వైరల్ అవుతున్న వీడియోలో కంగనా దర్శకుడు వికాస్ బహల్కు కేక్ తినిపిస్తూ కనిపించడం అభిమానులను ఆకట్టుకుంటోంది.
2013లో విడుదలైన ‘క్వీన్’ సినిమా బాక్సాఫీస్ వద్ద ఘన విజయం సాధించడంతో పాటు, కంగనా నటనకు ప్రశంసలు దక్కాయి. ఒక మామూలు యువతి డేరింగ్ ప్రయాణాన్ని చూపించిన ఈ చిత్రం విమర్శకుల ప్రశంసలతో పాటు ప్రేక్షకుల మన్ననలను కూడా అందుకుంది. ఇప్పుడు అదే కథకు కొనసాగింపుగా రూపొందుతున్న ‘క్వీన్ 2’పై కూడా భారీ అంచనాలు నెలకొన్నాయి. షూటింగ్ పూర్తయిన నేపథ్యంలో త్వరలోనే పోస్ట్ ప్రొడక్షన్ పనులు ప్రారంభం కానున్నట్లు తెలుస్తోంది. అయితే సినిమా విడుదల తేదీపై చిత్రబృందం ఇప్పటివరకు ఎలాంటి అధికారిక ప్రకటన చేయలేదు. ఇండస్ట్రీ వర్గాల అంచనా ప్రకారం ఈ చిత్రం 2027లో ప్రేక్షకుల ముందుకు వచ్చే అవకాశం ఉంది. ఇదిలా ఉండగా, ‘క్వీన్ 2’తో పాటు కంగనా రనౌత్ మరో సూపర్ హిట్ ఫ్రాంచైజీ ‘తను వెడ్స్ మను’ మూడో భాగంలో కూడా నటించనున్నట్లు ప్రచారం సాగుతోంది. ఇందులో ఆమె మరోసారి ఆర్. మాధవన్తో స్క్రీన్ షేర్ చేసుకోనున్నారని సమాచారం. అయితే ఈ ప్రాజెక్ట్కు సంబంధించిన అధికారిక వివరాలు ఇంకా వెలువడలేదు. దీంతో కంగనా అభిమానులు ఆమె రాబోయే రెండు చిత్రాల కోసం ఆసక్తిగా ఎదురుచూస్తున్నారు.
Kangana from last day of #Queen2 set with Vikas Bahl #KanganaRanaut pic.twitter.com/sY7BE7BIND
— Kangana Updates (@KR_Insta2) June 30, 2026