Kiran Abbavaram: ఫ్లాప్ ఇచ్చినా తగ్గేదేలే.. రిస్క్ అని తెలిసినా డైరెక్షన్ వైపు అబ్బవరం..
నటుడిగా, రచయితగా గుర్తింపు తెచ్చుకున్న కిరణ్ అబ్బవరం ఇటీవల ‘తిమ్మరాజుపల్లి టీవీ’ చిత్రంతో నిర్మాతగా మారారు. ఈ సినిమాపై రిలీజ్కు ముందు భారీ అంచనాలు ఉన్నప్పటికీ, థియేటర్లలో ఆశించిన ఫలితాన్ని అందుకోలేకపోయింది. పబ్లిక్ టాక్ ప్రతికూలంగా రావడంతో నిర్మాతగా కిరణ్కు ఫ్లాప్ తప్పలేదు. అయితే, ఈ ఫలితం తన తదుపరి సినిమాలపై పడకుండా కిరణ్ జాగ్రత్త పడుతున్నారు.
తాజాగా ఆయన దర్శకుడిగా మారి ‘రియాలిటీ’ అనే చిత్రాన్ని తెరకెక్కించబోతున్నారు. నిజ జీవిత సంఘటనలు, మనుషుల ఆధారంగా రూపొందుతున్న ఈ సినిమా షూటింగ్ మే చివరి వారం నుంచి ప్రారంభం కానుంది. ఇప్పటికే ఈ చిత్రానికి సంగీత దర్శకుడు భీమ్స్ సిసిరోలియో ఆధ్వర్యంలో మ్యూజిక్ సిట్టింగ్స్ కూడా జరుగుతున్నాయి. ప్రస్తుత తరం హీరోల్లో సిద్దూ జొన్నలగడ్డ, నవీన్ పోలిశెట్టి వంటి వారు కథా రచనలో పాలుపంచుకుంటున్నప్పటికీ, దర్శకత్వం వైపు వెళ్లడం లేదు. కేవలం విశ్వక్ సేన్ మాత్రమే దర్శకుడిగా రాణిస్తుండగా, ఇప్పుడు కిరణ్ అబ్బవరం కూడా అదే బాటలో పయనిస్తున్నారు. ‘ఎస్ఆర్ కళ్యాణమండపం’ చిత్రంతో రచయితగా తన సత్తా చాటిన కిరణ్, ఇప్పుడు దర్శకుడిగా ఏ మేరకు మెప్పిస్తారో చూడాలి. ఈ ‘రియాలిటీ’ చిత్రం కూడా ఇదే ఏడాది విడుదల కానుందని సమాచారం.
