Abhishek Sharma : ఐపీఎల్ 2026లో సన్రైజర్స్ హైదరాబాద్ (SRH) యువ సంచలనం అభిషేక్ శర్మ ఆకాశమే హద్దుగా చెలరేగిపోతున్నాడు. ఢిల్లీ క్యాపిటల్స్తో జరిగిన 31వ మ్యాచ్లో 135 పరుగుల భారీ ఇన్నింగ్స్తో రికార్డులు సృష్టించిన ఈ కుర్రాడు, మ్యాచ్ అనంతరం చేసిన వ్యాఖ్యలు ఇప్పుడు సోషల్ మీడియాలో చర్చనీయాంశమయ్యాయి. అంత పెద్ద సెంచరీ బాదినప్పటికీ, తన ఆటలో ఇంకా లోపాలు ఉన్నాయని అభిషేక్ నిజాయితీగా ఒప్పుకోవడం అందరినీ ఆశ్చర్యపరిచింది.
ఢిల్లీపై అభిషేక్ విశ్వరూపం
సన్రైజర్స్ హైదరాబాద్, ఢిల్లీ క్యాపిటల్స్ మధ్య జరిగిన పోరులో అభిషేక్ శర్మ శివతాండవం చేశాడు. కేవలం 68 బంతుల్లోనే 135 పరుగులు బాదాడు. ఇందులో ఢిల్లీ బౌలర్లు ఎక్కడా అతడిని అడ్డుకోలేకపోయారు. అభిషేక్ మెరుపు ఇన్నింగ్స్ వల్ల ఎస్ఆర్హెచ్ నిర్ణీత 20 ఓవర్లలో 242 పరుగుల భారీ స్కోరు సాధించింది. సమాధానంగా ఢిల్లీ జట్టు 195 పరుగులకే పరిమితమై, 47 పరుగుల తేడాతో ఓటమి పాలైంది. ఈ విజయంతో ఎస్ఆర్హెచ్ పాయింట్ల పట్టికలో తన స్థానాన్ని మరింత మెరుగుపరుచుకుంది.
అభిషేక్ బయటపెట్టిన తనలోని లోపం
మ్యాచ్ గెలిచిన తర్వాత అభిషేక్ శర్మ మాట్లాడుతూ.. తనకు డెత్ ఓవర్లలో వేగంగా ఆడటం రావడం లేదని పేర్కొన్నాడు. “సాధారణంగా నేను పవర్ ప్లేలో ఆడి అవుట్ అవుతుంటాను. కానీ ఈ మ్యాచ్లో మొదటిసారి 20 ఓవర్ల పాటు క్రీజులో ఉన్నాను. ఇన్నింగ్స్ చివర్లో బౌలర్లు వేసే స్లో బంతులు, యార్కర్లను ఎదుర్కోవడంలో నేను ఇబ్బంది పడ్డాను. అందుకే చివరి 21 బంతుల్లో కేవలం 33 పరుగులు మాత్రమే చేయగలిగాను. దీనివల్ల నా స్ట్రైక్ రేట్ కూడా పడిపోయింది” అని అభిషేక్ వివరించాడు. ఇకపై డెత్ ఓవర్లలో బ్యాటింగ్ ఎలా చేయాలో ప్రత్యేకంగా శిక్షణ తీసుకుంటానని అతను చెప్పాడు.
ఆర్ అశ్విన్ ప్రశంసలు
అభిషేక్ శర్మలో ఉన్న ఈ నేర్చుకోవాలనే తపనను టీమిండియా వెటరన్ స్పిన్నర్ ఆర్ అశ్విన్ కొనియాడాడు. 135 పరుగులు చేసిన తర్వాత కూడా తన ఆటలో తప్పులను వెతుక్కుని, వాటిని సరిదిద్దుకోవాలనుకోవడం ఒక గొప్ప క్రీడాకారుడి లక్షణమని అశ్విన్ సోషల్ మీడియా వేదికగా మెచ్చుకున్నాడు. అభిషేక్ తన ఇన్నింగ్స్ ఆరంభంలో 25 బంతుల్లోనే 50 పరుగులు చేసి, 47 బంతుల్లోనే సెంచరీ మార్కును చేరుకున్నాడు. కానీ ఇన్నింగ్స్ చివర్లో హెన్రిక్ క్లాసెన్కు స్ట్రైక్ ఇచ్చే ప్రయత్నంలో నెమ్మదించాడని విశ్లేషకులు అభిప్రాయపడుతున్నారు.
ఆరెంజ్ క్యాప్ రేసులో టాప్
ప్రస్తుత ఐపీఎల్ 2026 సీజన్లో అభిషేక్ శర్మ పరుగుల వరద పారిస్తున్నాడు. ఇప్పటివరకు 7 మ్యాచ్లు ఆడిన అతను 53.83 సగటుతో 323 పరుగులు చేసి ఆరెంజ్ క్యాప్ రేసులో మొదటి స్థానంలో ఉన్నాడు. ఇందులో 27 సిక్సర్లు, 25 ఫోర్లు ఉన్నాయి. గతంలో క్రిస్ గేల్ పేరిట ఉన్న కొన్ని రికార్డులను కూడా ఈ సీజన్లో అభిషేక్ తిరగరాస్తున్నాడు. ఈ కుర్రాడి దూకుడు చూస్తుంటే త్వరలోనే టీమిండియాలో కీలక ఆటగాడిగా మారడం ఖాయంగా కనిపిస్తోంది.
మరిన్ని క్రీడా వార్తల కోసం ఇక్కడ క్లిక్ చేయండి..