విమానం, ఫ్లైట్ లేకుండా కాలినడకన భారతదేశం నుండి అమెరికా చేరుకోవాలని మీరు ఎప్పుడైనా కలగన్నారా? ఇప్పుడు, ఆ కల నిజం కావచ్చు. రోజుకు కేవలం 15 కిలోమీటర్లు నడిస్తే చాలు.. 20 ఏళ్లలో భారతదేశం నుండి అమెరికా చేరుకోవచ్చని సూచిస్తూ ఒక ప్రత్యేకమైన నడక మార్గం సోషల్ మీడియాలో వైరల్ అవుతోంది. వాయుమార్గ దూరం సుమారు 16,000 కిలోమీటర్లు అయినప్పటికీ, వైరల్ అవుతున్న ఈ మార్గంలో అనేక దేశాలు, పర్వతాలు, అడవులు, రోడ్లు ఉండటం వల్ల, మొత్తం నడక దూరం గణనీయంగా పెరుగుతుంది. దీనిని చూసి వినియోగదారులు ఆశ్చర్యపోతూ, మీరు కూడా కాలినడకన అమెరికాకు వెళ్ళవచ్చు! అని అంటున్నారు. ఈ మార్గం సోషల్ మీడియా ప్లాట్ఫారమ్లలో వేగంగా షేర్ చేయబడుతోంది. ఒక వినియోగదారుడు గూగుల్ మ్యాప్స్, వివిధ ట్రావెల్ బ్లాగ్ల ఆధారంగా ఈ మొత్తం మార్గాన్ని రూపొందించారు.
ఈ ప్రయాణ మార్గం ఎలా ఉంటుంది?:
ఈ నడక ప్రయాణం భారతదేశం నుండి మొదలై పాకిస్థాన్, అఫ్గానిస్థాన్, ఉజ్బెకిస్థాన్, కజకిస్థాన్ మీదుగా రష్యాలోని అత్యంత తూర్పు ప్రాంతానికి చేరుకోవాలి. అక్కడి నుండి అమెరికాలోని అలాస్కా రాష్ట్రం కనిపిస్తుంది. రష్యా, అమెరికా మధ్య కేవలం 80 నుండి 90 కిలోమీటర్ల సముద్ర దూరం (బేరింగ్ జలసంధి) మాత్రమే ఉంది. శీతాకాలంలో ఉష్ణోగ్రతలు బాగా తగ్గి ఈ సముద్రం గడ్డకట్టినప్పుడు, దానిపై నడిచి అమెరికాలోకి ప్రవేశించవచ్చని ఈ వైరల్ పోస్ట్ చెబుతోంది.
భారత్ నుండి అలాస్కా వరకు సుమారు 1,10,000 కిలోమీటర్ల కంటే ఎక్కువ దూరం ఉంటుంది.ఒక వ్యక్తి రోజుకు విరామం లేకుండా 15 కిలోమీటర్లు నడిస్తే ఈ మొత్తం ప్రయాణాన్ని పూర్తి చేయడానికి సుమారు 20 ఏళ్ల సమయం పడుతుందని అంచనా. ఇన్ని దేశాల గుండా వెళ్లడానికి వీసా పొందడం దాదాపు అసాధ్యం. ముఖ్యంగా రష్యా-అమెరికా సరిహద్దుల్లో కఠినమైన నిబంధనలు ఉంటాయి. సైబీరియా వంటి ప్రాంతాల్లో మైనస్ 50 డిగ్రీల చలిలో నడవడం ప్రాణాపాయం.
ఏళ్ల తరబడి అడవులు, ఎడారులు, మంచు పర్వతాల గుండా వెళ్లేటప్పుడు ఆహారం, రక్షణ దొరకడం చాలా కష్టం అవుతుంది. భౌగోళికంగా భూమిపై మార్గం ఉన్నప్పటికీ, పైన పేర్కొన్న కారణాల వల్ల ఇది కేవలం ఒక కాన్సెప్ట్, థియరీ మాత్రమే. సాహస యాత్రికులు కూడా ఇలాంటి మార్గాన్ని ఎంచుకోవడం చాలా అరుదు. కానీ, ఈ వీడియో మాత్రం నెట్టింట తెగ చక్కర్లు కొడుతోంది.