మార్కెట్లో ప్రతిరోజూ కొత్త కంపెనీలు, కొత్త ఉత్పత్తులు వస్తున్నప్పటికీ కొన్ని భారతీయ బ్రాండ్లు మాత్రం శతాబ్దానికి పైగా తమ ఆధిపత్యాన్ని కొనసాగిస్తున్నాయి. టాటా, డాబర్, ప్యారచూట్, గోద్రేజ్, వీకో, బొరోలీన్, రూహ్ అఫ్జా, మైసూర్ శాండల్, కిర్లోస్కర్ వంటి బ్రాండ్లు తరతరాలుగా భారతీయ కుటుంబాల్లో భాగంగా మారాయి. నాణ్యత, విశ్వసనీయత, వినియోగదారుల నమ్మకమే వీటి విజయానికి ప్రధాన కారణం. అయితే ఇప్పుడు ఈ కంపెనీల గురించి కాస్త వివరంగా తెలుసుకునే ప్రయత్నం చేద్దాం..
ఏ కంపెనీ ఎప్పుడు ప్రారంభమైంది?
- టాటా గ్రూప్ను 1868లో జంషెడ్జీ టాటా స్థాపించారు. ఇది భారతదేశంలోనే అతిపెద్ద వ్యాపార సమూహాల్లో ఒకటి.
- డాబర్ కంపెనీని 1884లో డాక్టర్ ఎస్.కే. బర్మన్ కోల్కతాలో ప్రారంభించారు. ఆయుర్వేద ఉత్పత్తులతో ఈ సంస్థ ప్రయాణం మొదలైంది.
- గోద్రేజ్ గ్రూప్ను 1897లో అర్దేశీర్ గోద్రేజ్, పిరోజ్షా గోద్రేజ్ స్థాపించారు.
- రూహ్ అఫ్జాను 1907లో హకీమ్ హఫీజ్ అబ్దుల్ మజీద్ హమ్దర్ద్ సంస్థ ద్వారా రూపొందించారు.
- కిర్లోస్కర్ గ్రూప్ను 1888లో లక్ష్మణరావు కిర్లోస్కర్ స్థాపించారు.
- మైసూర్ శాండల్ సోప్ను 1916లో మైసూర్ ప్రభుత్వ ఆధ్వర్యంలో ప్రారంభించారు. చందన నూనెతో తయారయ్యే ఈ సబ్బు ప్రపంచవ్యాప్తంగా ప్రసిద్ధి చెందింది.
- టీవీఎస్ గ్రూప్ను టి.వి. సుందరం అయ్యంగార్ 1911లో ప్రారంభించారు.
- బొరోలీన్ను 1929లో జీ.డి. ఫార్మాస్యూటికల్స్ వ్యవస్థాపకుడు గౌర్మోహన్ దత్త ప్రారంభించారు.
- ప్యారచూట్ కొబ్బరి నూనె బ్రాండ్ను మారికో 1948లో మార్కెట్లోకి తీసుకొచ్చింది. (ఇది కూడా 100 ఏళ్లు పూర్తి చేయలేదు కానీ భారతదేశంలో అత్యంత ప్రజాదరణ పొందిన బ్రాండ్లలో ఒకటి)
ఇప్పటికీ వీటి ఎందుకు డిమాండ్ తగ్గలేదు?
ఈ బ్రాండ్లు దశాబ్దాలుగా నాణ్యతలో రాజీ పడకుండా ఉత్పత్తులను అందిస్తున్నాయి. వినియోగదారుల అవసరాలకు అనుగుణంగా కాలానికి తగ్గ మార్పులు చేసుకుంటూనే తమ అసలు నాణ్యతను కాపాడుకున్నాయి. అందుబాటు ధరలు, విస్తృత పంపిణీ వ్యవస్థ, గ్రామీణ ప్రాంతాల వరకు చేరుకోవడం, విశ్వసనీయ సేవలు, బలమైన బ్రాండ్ ఇమేజ్ వీటి విజయానికి ప్రధాన కారణాలు. తరతరాలుగా ఒకే ఉత్పత్తిని ఉపయోగిస్తున్న కుటుంబాలు ఉండటంతో భావోద్వేగ అనుబంధం కూడా ఏర్పడింది.
ఏ కంపెనీ ఏ ఉత్పత్తులు తయారు చేస్తుంది?
టాటా గ్రూప్ ఉక్కు, కార్లు, ఉప్పు, టీ, కాఫీ, హోటళ్లు, సాఫ్ట్వేర్, ఎలక్ట్రానిక్స్, ఎయిర్లైన్స్, నగలు, వినియోగ వస్తువులు వంటి వందలాది రంగాల్లో కార్యకలాపాలు నిర్వహిస్తోంది.
డాబర్ తేనె, చ్యవన్ప్రాష్, టూత్పేస్ట్, హెయిర్ ఆయిల్, జ్యూస్, ఆరోగ్య ఉత్పత్తులు, ఆయుర్వేద మందులు తయారు చేస్తోంది.
గోద్రేజ్ ఫర్నిచర్, తాళాలు, అల్మారాలు, గృహోపకరణాలు, రియల్ ఎస్టేట్, వ్యక్తిగత సంరక్షణ ఉత్పత్తులు, గృహోపయోగ వస్తువులు, వ్యవసాయ ఉత్పత్తులను అందిస్తోంది.
మారికో ప్యారచూట్ కొబ్బరి నూనెతో పాటు సఫోలా ఆయిల్స్, హెయిర్ కేర్, పురుషుల గ్రూమింగ్ ఉత్పత్తులు విక్రయిస్తోంది.
బొరోలీన్ యాంటిసెప్టిక్ క్రీమ్, స్కిన్ కేర్ ఉత్పత్తులను అందిస్తుండగా, వీకో టర్మరిక్ క్రీమ్, టూత్పేస్ట్, ఆయుర్వేద సౌందర్య ఉత్పత్తులను తయారు చేస్తోంది.
రూహ్ అఫ్జా హెర్బల్ సిరప్, పానీయాలు, ఫుడ్ ప్రొడక్ట్స్ను అందిస్తోంది. మైసూర్ శాండల్ చందన సబ్బులు, చందన నూనె, సుగంధ ద్రవ్యాలు, వ్యక్తిగత సంరక్షణ ఉత్పత్తులను తయారు చేస్తోంది. కిర్లోస్కర్ పంపులు, ఇంజిన్లు, వ్యవసాయ యంత్రాలు, పారిశ్రామిక పరికరాలు, ఇంజినీరింగ్ ఉత్పత్తుల తయారీలో అగ్రగామిగా ఉంది.
బ్రాండ్ విలువే అసలు బలం
ఈ కంపెనీలు కేవలం ఉత్పత్తులను మాత్రమే విక్రయించడం కాదు.. దశాబ్దాలుగా వినియోగదారుల విశ్వాసాన్ని సంపాదించాయి. అందుకే కొత్త బ్రాండ్ల నుంచి తీవ్రమైన పోటీ ఉన్నప్పటికీ మార్కెట్లో తమ స్థానాన్ని నిలబెట్టుకుంటున్నాయి. నాణ్యత, విశ్వసనీయత, వినియోగదారుల సంతృప్తి, నిరంతర ఆవిష్కరణలే ఈ శతాబ్దాల నాటి భారతీయ బ్రాండ్ల విజయానికి అసలైన రహస్యమని మార్కెట్ నిపుణులు పేర్కొంటున్నారు.