చిన్న పొదుపు పథకాలలో పెట్టుబడులు పెట్టే లక్షలాది మంది పెట్టుబడిదారులకు కేంద్ర ప్రభుత్వం శుభవార్త చెప్పింది. 2026-27 ఆర్థిక సంవత్సరం రెండో త్రైమాసికం (జూలై 1, 2026 నుంచి సెప్టెంబర్ 30, 2026 వరకు) కోసం స్మాల్ సేవింగ్స్ స్కీమ్స్పై వడ్డీ రేట్లను కేంద్రం ప్రకటించింది. ఈసారి కూడా వడ్డీ రేట్లలో ఎలాంటి మార్పులు చేయకుండా యథాతథంగా కొనసాగించాలని నిర్ణయించింది.
ఆర్థిక మంత్రిత్వ శాఖ విడుదల చేసిన ప్రకటన ప్రకారం, పబ్లిక్ ప్రావిడెంట్ ఫండ్ (PPF), నేషనల్ సేవింగ్స్ సర్టిఫికేట్ (NSC), కిసాన్ వికాస్ పత్ర (KVP), సుకన్య సమృద్ధి యోజన (SSY), సీనియర్ సిటిజన్ సేవింగ్స్ స్కీమ్ (SCSS)తో పాటు అన్ని చిన్న పొదుపు పథకాలపై ప్రస్తుతం అమలులో ఉన్న వడ్డీ రేట్లే కొనసాగనున్నాయి. కొత్త వడ్డీ రేట్లు జూలై 1, 2026 నుంచి అమల్లోకి వచ్చాయి.
ఏ పథకానికి ఎంత వడ్డీ?
సుకన్య సమృద్ధి యోజన (SSY): బాలికల భవిష్యత్ కోసం రూపొందించిన ఈ పథకంపై 8.20 శాతం వార్షిక వడ్డీ కొనసాగుతుంది.
పబ్లిక్ ప్రావిడెంట్ ఫండ్ (PPF): దీర్ఘకాలిక పొదుపు కోసం అత్యంత ప్రజాదరణ పొందిన ఈ పథకంపై 7.10 శాతం వార్షిక వడ్డీ యథాతథంగా ఉంది.
నేషనల్ సేవింగ్స్ సర్టిఫికేట్ (NSC): ఈ పథకంలో పెట్టుబడి పెట్టేవారికి 7.70 శాతం వడ్డీ లభిస్తుంది.
కిసాన్ వికాస్ పత్ర (KVP): ఈ పథకంపై 7.50 శాతం వార్షిక వడ్డీ కొనసాగుతుంది.
సీనియర్ సిటిజన్ సేవింగ్స్ స్కీమ్ (SCSS): వయోవృద్ధులకు అత్యధిక రాబడిని అందించే ఈ పథకంపై 8.20 శాతం వడ్డీ యథాతథంగా ఉంది.
పోస్ట్ ఆఫీస్ మంత్లీ ఇన్కమ్ స్కీమ్ (MIS): ఈ పథకంపై 7.40 శాతం వార్షిక వడ్డీ అందుతుంది.
పోస్ట్ ఆఫీస్ సేవింగ్స్ అకౌంట్: పొదుపు ఖాతాలపై 4.00 శాతం వార్షిక వడ్డీ కొనసాగుతుంది.
ఫిక్స్డ్ డిపాజిట్లు, రికరింగ్ డిపాజిట్లపై వడ్డీ
పోస్ట్ ఆఫీస్ టైమ్ డిపాజిట్లపై కూడా ఎలాంటి మార్పు లేదు.
1 సంవత్సరం FD -6.90%
2 సంవత్సరాల FD – 7.00%
3 సంవత్సరాల FD – 7.10%
5 సంవత్సరాల FD – 7.50%
5 సంవత్సరాల రికరింగ్ డిపాజిట్ (RD) – 6.70%
పెట్టుబడిదారులకు ఊరట
వరుసగా మరో త్రైమాసికం కూడా వడ్డీ రేట్లను మార్చకపోవడంతో చిన్న పొదుపు పథకాలలో పెట్టుబడులు పెట్టే వారికి స్థిరమైన రాబడిపై స్పష్టత లభించింది. ముఖ్యంగా పీపీఎఫ్, సుకన్య సమృద్ధి యోజన, సీనియర్ సిటిజన్ సేవింగ్స్ స్కీమ్ వంటి దీర్ఘకాలిక పెట్టుబడి పథకాల్లో పెట్టుబడి పెట్టే వారికి ఈ నిర్ణయం ప్రయోజనకరంగా మారనుంది.