చలికి గజగజ వణికిపోయేలా.. గడ్డ కట్టుకు పోయేలా.. లో టెంపరేచర్ ఉండే యూరప్.. హీట్ వేవ్ తో నిప్పుల కుంపటిలా మారిపోయింది. వేడి తట్టుకోలేక జనా పిట్టల్లా రాలిపోతున్నారు. ఎండ వేడికి వేలల్లో ప్రజలు చనిపోవడం ఆందోళన కలిగించే అంశం. ఇదిలా ఉంటే అక్కడి రోడ్లపై ఉన్న డాంబర్ కరిగి పోయి.. రవాణాకు వీలు లేకుండా మారిపోతోంది. వెహికిల్ రోడ్డెక్కితే.. కరిగిన డాంబర్ వీల్స్ కు అట్టలు అట్టలుగా అతుక్కోవడంతో జనాలు వాహనాలను బయటకు తీసే పరిస్థితి లేదు.
అక్కడ ఎండ తీవ్రత అంతగా ఉందా అంటే.. అక్కడ నమోదవుతున్న హైయెస్ట్ టెంపరేచర్ 40 డిగ్రీల సెల్సియస్ మాత్రమే. మన దగ్గర 45 డిగ్రీలు దాటినా రోడ్లు చెక్కు చెదరకుండా ఉంటాయి కదా.. అదేంటి ఆ మాత్రం హీట్ కే రోడ్లు కరిగిపోతున్నాయి అనే ప్రశ్న ప్రతి భారతీయుడిలో కలగక మానదు. ఎందుకిలా అనే విషయం గురించి తెలుసుకుందాం.
రోడ్లు ఆ మాత్రం వేడికే కరగటం వెనుక కారణం.. అక్కడి ఇంజినీరింగ్ విధానం. లోకల్ వాతావరణ పరిస్థితులకు అనుకూలంగా రోడ్లు నిర్మిస్తారు. కానీ క్లైమేట్ పూర్తిగా చేంజ్ కావడం.. హీట్ కాస్త ఎక్కువ కావడంతో ఈ పరిస్థితి వస్తుంది.
నిర్మాణ లోపమా.. దీని వెనుక సైన్స్ ఏమైనా ఉందా..?
యూకేతో సహా యూరప్ అంతటా ఉన్న రోడ్లు, చాలా కాలం వరకు, గడ్డకట్టే చలికాలాలను తట్టుకునేలా వేస్తారు. అక్కడ ఎక్కువ శాతం తక్కువ ఉష్ణోగ్రతలు ఉండటం కామన్. అందుకోసం పదేపదే గడ్డకట్టే పరిస్థితులను తట్టుకోవడానికి, ఇంజనీర్లు సాఫ్ట్ గ్రేడ్ల బిటుమెన్ను కలిగిన డాంబర్ (తారు) ను ఉపయోగిస్తారు. ఈ డాంబర్ చల్లని వాతావరణంలో సాగే గుణాన్ని కలిగి ఉంటుంది, దీంతో ఉష్ణోగ్రతలు గడ్డకట్టే స్థాయికి పడిపోయినప్పుడు పగుళ్లు ఏర్పడకుండా సాగుతూ.. రోడ్డు ఎక్కువ రోజులు వచ్చేలా సహాయపడుతుంది.
►ALSO READ | దెబ్బకు దెబ్బ తీసిన ఆప్ఘాన్.. పాకిస్తాన్పై మెరుపు దాడులు
కోల్డ్ వెదర్ కు అనుకూలంగా రోడ్లను సాగేలా తయారు చేస్తారు కదా. అయితే వేడి ఎక్కువైతే ఈ సాగే గుణం ప్రతికూలంగా తయారవుతుంది. అంటే చిన్నపాటి వేడికే రోడ్లు కరిగి.. డాంబర్ అతుక్కునే పరిస్థితి ఏర్పడుతుంది. ఉష్ణోగ్రతలు 40°Cకి చేరుకున్నప్పుడు లేదా దాన్ని మించినప్పుడు, బిటుమెన్ మెత్తబడుతుంది. దీనివల్ల వాహనాల బరువుతో రోడ్డు కుంగిపోవడం.. సాగడం, డాంబర్ అంటుకోవడం వంటి పరిస్థితులు ఎదురవుతాయి.
మన ఇండియాలో ఎలా తట్టుకుంటున్నాయి..?
ఇండియాలో రోడ్లను తీవ్రమైన వేడిని దృష్టిలో ఉంచుకుని తయారు చేస్తారు. కాంట్రాక్టర్లు సాధారణంగా VG-30, VG-40 వంటి గట్టి VG-గ్రేడ్ బిటుమెన్ను, పెద్ద కంకరలు కలిగిన డాంబర్ తో కలిపి ఉపయోగిస్తారు. అధిక ఉష్ణోగ్రతల దగ్గర కూడా బలంగా.. సాగకుండా ఉండేలా మన దగ్గర రోడ్లు తయారు చేస్తారు. ఇవి తీవ్రమైన వడగాలులు, హీట్ వేవ్ సమయంలో కూడా మెత్తబడకుండా పనిచేస్తాయి.
మన దగ్గర ఉపయోగించే తారు (డాంబర్) రోడ్లు గుంతలు పడకుండా లేదా ఉపరితలం కుంగకుండా నిరంతర భారీ ట్రాఫిక్ను తట్టుకోవడానికి కూడా సహాయపడుతుంది. దీంతో ఉష్ణోగ్రతలు 45 డిగ్రీల సెల్సియస్ దాటి పెరిగినప్పుడు కూడా రోడ్లు బాగా పనిచేసేలా తయారు చేస్తారు ఇంజినీర్లు.
యూరప్, ఇండియా మధ్య ఉన్న తేడా.. మౌలిక సదుపాయాలు ప్రాంతీయ వాతావరణానికి అనుగుణంగా తయారు చేయడం జరుగుతుంది. యూరోపియన్ రోడ్లు కఠినమైన శీతాకాలాలను తట్టుకోవడానికి అనువుగా ఉండేలా తయారు చేస్తారు. అదే సమయంలో ఇండియాలో తీవ్రమైన వేసవిని తట్టుకోవడానికి ప్రాధాన్యమిస్తూ తయారు చేస్తారు. అందువలన యూరప్ లో ఉష్ణోగ్రత కొంత మాత్రం పెరిగినా.. రోడ్లు మెత్తబడి కరిగి పోతుంటాయి.