ప్రేమ, స్నేహం పేరుతో ఎదుటివారిని మానసికంగా వేధించే పద్ధతులు రోజురోజుకూ మారిపోతున్నాయి. ఒకప్పుడు ‘ఘోస్టింగ్’ (చెప్పాపెట్టకుండా మాయమవ్వడం) గురించి విన్నాం, కానీ ఇప్పుడు అంతకంటే భయంకరమైన ‘ఘోస్ట్లైటింగ్’ (Ghostlighting) అనే కొత్త ట్రెండ్ మొదలైంది. ఇది కేవలం సంబంధాన్ని తెంచుకోవడం మాత్రమే కాదు, ఎదుటి వ్యక్తి తన మీద తనకే నమ్మకం పోయేలా చేసే మానసిక దాడి. అసలు ఈ ఘోస్ట్లైటింగ్ అంటే ఏమిటి? డేటింగ్ ప్రపంచంలో ఇది ఎంతటి అలజడి సృష్టిస్తోందో ఇప్పుడు వివరంగా తెలుసుకుందాం..
ఘోస్ట్లైటింగ్ అంటే అసలు ఏంటి?: ఘోస్ట్లైటింగ్ అనేది రెండు పదాల కలయిక.. ఒకటి ‘ఘోస్టింగ్’, రెండోది ‘గ్యాస్లైటింగ్’. ఎటువంటి కారణం చెప్పకుండా కమ్యూనికేషన్ కట్ చేయడాన్ని ఘోస్టింగ్ అంటారు. అయితే, మాయమవ్వడమే కాకుండా, తాము చేసిన తప్పును ఎదుటివారి మీదకు నెట్టేసి, వారు తప్పుగా ఆలోచిస్తున్నారని భ్రమ కలిగించడాన్ని గ్యాస్లైటింగ్ అంటారు. ఈ రెండూ కలిస్తేనే ఘోస్ట్లైటింగ్! ఇది బాధితులను మానసికంగా తీవ్రంగా కృంగదీస్తుంది.
నిందను ఎదుటివారిపైకి నెట్టేయడం: ఈ రకమైన ధోరణి ఉన్నవారు సంబంధం నుండి తప్పుకోవడానికి ముందు, మెల్లగా నిందను తమ భాగస్వామిపైకి నెట్టేస్తారు. “నువ్వే సరిగ్గా మాట్లాడటం లేదు”, “నీ వల్లే గొడవలు అవుతున్నాయి” అని నమ్మిస్తారు. దీనివల్ల వారు మాట్లాడటం మానేసినప్పుడు, బాధితులే తాము ఏదో తప్పు చేశామని భావించి అపరాధ భావంతో కుంగిపోతారు. ఇక ఇలా ఒక వ్యక్తి ఆత్మవిశ్వాసాన్ని దెబ్బతీయడమే ఈ ట్రెండ్ వెనకున్న అసలు కుట్ర.
మళ్లీ వచ్చి ఏమీ ఎరగనట్టు నటించడం: ఘోస్ట్లైటింగ్ చేసేవారు కొన్నాళ్ల తర్వాత మళ్లీ తిరిగి వస్తారు. అయితే వారు వెళ్లినందుకు క్షమాపణలు చెప్పరు కదా, అసలు తాము మాయమైనట్టు కూడా ఒప్పుకోరు. “నేను ఎక్కడికి వెళ్లాను? నువ్వే బిజీగా ఉన్నావనుకొని డిస్టర్బ్ చేయలేదు” అని వితండవాదం చేస్తారు. “నువ్వు ఏదో ఊహించుకుంటున్నావు” అని బాధితులను గందరగోళానికి గురిచేస్తారు. ఈ రకమైన ప్రవర్తన వల్ల బాధితులు తమ జ్ఞాపకశక్తిని, ఆలోచనలను తామే అనుమానించే పరిస్థితి వస్తుంది.
దీనివల్ల కలిగే మానసిక నష్టం: సాధారణ ఘోస్టింగ్ కంటే ఘోస్ట్లైటింగ్ చాలా ప్రమాదకరమైంది. ఎందుకంటే ఘోస్టింగ్లో కేవలం అవతలి వ్యక్తి కనిపించకుండా పోతాడు. కానీ ఇక్కడ, వాస్తవాలను వక్రీకరించి మిమ్మల్ని మానసిక అస్థిరతకు గురిచేస్తారు. ఇది నమ్మకాన్ని పూర్తిగా చంపేస్తుంది. ఒకరిని మానసికంగా కంట్రోల్ చేస్తూ, వాళ్లను అయోమయంలో నెట్టేయడం వల్ల వారు భవిష్యత్తులో వేరే ఏ సంబంధంలోనైనా ఉండటానికి భయపడుతుంటారు.
మరి దీనిని గుర్తించడం ఎలా?: డేటింగ్ ప్రారంభంలో మాటల కంటే ప్రవర్తనపైనే ఎక్కువ శ్రద్ధ పెట్టాలని నిపుణులు సూచిస్తున్నారు. మీ భాగస్వామి చెప్పిన సమయానికి ఉంటున్నారా? మీతో సమాచారాన్ని నిలకడగా పంచుకుంటున్నారా? లేక ఎప్పుడు పడితే అప్పుడు మాయమై మళ్లీ వస్తున్నారా? అని ప్రశ్నించుకోవాలి. ఎవరైనా మీ వాస్తవాలను తప్పుగా చూపిస్తూ మిమ్మల్ని తక్కువ చేసి మాట్లాడుతుంటే, అది డేంజర్ సిగ్నల్ అని గ్రహించాలి. మీ ప్రశాంతత కంటే ఏ బంధం ముఖ్యం కాదు అని గుర్తుంచుకోండి.
ప్రేమలో నమ్మకం, స్పష్టత ఉండాలి కానీ ఇలాంటి మానసిక కుతంత్రాలు కాదు. ఘోస్ట్లైటింగ్ వంటి విషపూరితమైన ధోరణుల పట్ల అవగాహన కలిగి ఉండటం వల్ల మిమ్మల్ని మీరు కాపాడుకోవచ్చు. ఎవరైనా మిమ్మల్ని తక్కువ చేసి మాట్లాడుతున్నప్పుడు లేదా గందరగోళానికి గురిచేస్తున్నప్పుడు, వెంటనే ఆ సంబంధం నుండి తప్పుకోవడం మీ మానసిక ఆరోగ్యానికి ఎంతో శ్రేయస్కరం!
గమనిక: పైన ఇచ్చిన సమాచారం కేవలం అవగహన కోసం మాత్రమే, సంబంధాలలో ఇలాంటి సమస్యలు ఎదురైనప్పుడు లేదా మానసికంగా కుంగుబాటుకు గురైనప్పుడు సన్నిహితులతో చర్చించండి లేదా కౌన్సిలింగ్ నిపుణుల సహాయం తీసుకోండి.
The post ఘోస్టింగ్ తర్వాత మరో షాక్… ‘ఘోస్ట్లైటింగ్’ ట్రెండ్పై నిపుణుల హెచ్చరిక appeared first on Manalokam – Latest Telugu News & Updates.