టాలీవుడ్లో పొడవాటి రూపంతో ప్రత్యేక గుర్తింపు తెచ్చుకున్న నటి ఫరియా అబ్దుల్లా. కేవలం వెండితెరపైనే కాదు, నిజ జీవితంలోనూ ఆమె నేపథ్యం చాలా విభిన్నంగా, ఆసక్తికరంగా ఉంటుంది. తాజాగా ఆమె తన కుటుంబం, మతం మరియు తన కెరీర్ గురించి పంచుకున్న విషయాలు ఇప్పుడు సోషల్ మీడియాలో వైరల్ అవుతున్నాయి. ఎందుకంటే ఫరియా ఇంట్లో జరిగిన మార్పులు చాలా అరుదైనవి. ఫరియా తండ్రి పుట్టుకతో హిందూ అయినప్పటికీ, తర్వాత ఇస్లాం మతాన్ని స్వీకరించారు. అలాగే ఆమె తల్లి ముస్లిం కుటుంబంలో జన్మించినా, తదనంతర కాలంలో హిందూ మతానికి మారారు.
ఒకే ఇంట్లో భిన్నమైన సంస్కృతులు, మత మార్పిడిల మధ్య పెరిగిన ఫరియా, మతాల కంటే మానవత్వానికి, కళలకు ఎక్కువ ప్రాధాన్యత ఇస్తుంటారు. ఈ విభిన్నమైన వాతావరణమే తనను ఓ ఓపెన్ మైండెడ్ వ్యక్తిగా తీర్చిదిద్దిందని ఆమె గర్వంగా చెబుతుంటారు.
ఫరియా అచ్చమైన హైదరాబాదీ. ఈ నగరంపై, ఇక్కడి సంస్కృతిపై ఆమెకు విడదీయలేని అనుబంధం ఉంది. కేవలం నటనకే పరిమితం కాకుండా డాన్స్, పెయింటింగ్ వంటి విభిన్న కళల్లో ఆమెకు ప్రవేశం ఉంది. తనలోని ఆ కళాత్మక దృక్పథమే తనను ప్రతి పాత్రలోనూ కొత్తగా ఉండేలా చూస్తుందని ఆమె నమ్ముతారు. ఇప్పటివరకు ఫరియా అంటే కేవలం ‘క్విర్కీ’ పాత్రలకు మాత్రమే సెట్ అవుతుందని అందరూ అనుకునేవారు. కానీ ‘గాయపడ్డ సింహం’ సినిమాలో ఆమె పోషించిన ‘షాలిని’ పాత్ర ఆ అంచనాలను తలకిందులు చేయబోతోందని చెబుతోంది. ఈ పాత్రలో ఫరియా మునుపెన్నడూ చూడని విధంగా చాలా సీరియస్ లుక్లో కనిపించనున్నారు. కేవలం గ్లామర్కో, కామెడీకో పరిమితం కాకుండా తనలోని అసలైన నటిని బయటకు తీసే పాత్ర ఇది అని ఆమె ధీమా వ్యక్తం చేస్తున్నారు.