హైదరాబాద్లోని ప్రముఖ ప్రాంతమైన ఆర్టీసీ క్రాస్ రోడ్స్లో ఒక్కసారిగా హైడ్రామా నెలకొంది. కేవలం రూ.199లకే కిలో స్వీట్లు, అదనంగా రాఖీ, కీ చైన్ ఉచితం అంటూ ఓ స్వీట్ షాప్ యాజమాన్యం ప్రకటించిన బంపర్ ఆఫర్ స్థానికంగా భారీ కలకలం రేపింది.
‘స్వీట్ టోన్’ మిఠాయి షాపు యాజమాన్యం సోషల్ మీడియాలో ఇచ్చిన ఈ ప్రకటన చూసి జనం ఎగబడ్డారు. తక్కువ ధరకే స్వీట్లు, ఉచితంగా రాఖీలు వస్తాయన్న ఆశతో ఉదయం నుంచి జనం ఎగరగబడి షాప్ ముందు బారులు తీరారు. దీంతో ఒక్కసారిగా అక్కడ భారీ జనసమూహం చేరింది.
ఈ భారీ జనాల కారణంగా ఆర్టీసీ క్రాస్ రోడ్స్ నుండి నారాయణగూడ వరకు రోడ్డంతా కిక్కిరిసిపోయి భారీ ట్రాఫిక్ జామ్ ఏర్పడింది. వాహనదారులు తీవ్ర ఇబ్బందులు పడ్డారు. పరిస్థితి చేయి దాటడంతో వెంటనే రంగంలోకి దిగిన పోలీసులు… ట్రాఫిక్కు తీవ్ర అంతరాయం కలిగిస్తున్న ఆ స్వీట్ షాపును బలవంతంగా మూసివేయించారు. గుమిగూడిన జనాలను చెదరగొట్టి పరిస్థితిని అదుపులోకి తెచ్చారు. సరైన అనుమతులు లేకుండా, ఇలా రోడ్లపై ట్రాఫిక్కు విఘాతం కలిగించేలా ఆఫర్లు ప్రకటించిన షాపు యాజమాన్యంపై పోలీసులు ఆగ్రహం వ్యక్తం చేశారు.