హిందీ టెలివిజన్, బాలీవుడ్ రంగాల్లో తనకంటూ ప్రత్యేక గుర్తింపు సంపాదించుకున్న నటి కరిష్మా తన్నా 9Karishma Tanna) అభిమానులతో గుడ్ న్యూస్ పంచుకుంది. తన జీవితంలో కొత్త అధ్యాయం మొదలైందని వెల్లడించింది. బుధవారం గురు పౌర్ణమి పర్వదినమైన జూలై 29, 2026న పండంటి మగబిడ్డకు జన్మనిచ్చినట్లు ఇన్స్టాగ్రామ్ వేదికగా ప్రకటించింది.
ఈ సందర్భంగా తన ఇన్స్టాగ్రామ్ పోస్ట్లో కరిష్మా తన్నా భావోద్వేగ సందేశాన్ని పంచుకుంది. ‘‘ పవిత్రమైన గురు పౌర్ణమి రోజున మా జీవితంలోకి మా అతిపెద్ద ఆశీర్వాదం వచ్చింది. జూలై 29, 2026న మా చిన్నారికి స్వాగతం. మా ప్రపంచంలోకి స్వాగతం బుజ్జాయి’’ అంటూ తన ఆనందాన్ని వ్యక్తం చేసింది.
ఈ శుభవార్త తెలిసిన వెంటనే అభిమానులతో పాటు సినీ ప్రముఖులు సోషల్ మీడియాలో శుభాకాంక్షలు తెలిపారు. వారిలో ఖుషీ కపూర్, అంజలి ఆనంద్, సోనాల్ చౌహాన్, అనుష్కా రంజన్, వామికా గబ్బి తదితరులు కరిష్మా-వరుణ్ దంపతులకు బెస్ట్ విషెష్ అందించారు.
కరిష్మా తన్నా 2022 ఫిబ్రవరిలో వ్యాపారవేత్త వరుణ్ బంగేరాను వివాహం చేసుకుంది. పెళ్లి తర్వాత నాలుగేళ్లకు ఈ జంట తమ తొలి బిడ్డను ఆహ్వానించడంతో కుటుంబలో సంబరాలు మొదలయ్యాయి ఇకపోతే, 2022లో వరుణ్ బంగేరాను వివాహం చేసుకున్న కరిష్మా, ఈ ఏడాది ఏప్రిల్లో తన ప్రెగ్నెన్సీని ప్రకటించిన సంగతి తెలిసిందే.
ప్రేమ నుంచి వివాహం వరకు
కరిష్మా–వరుణ్ ప్రేమకథ 2021లో ప్రారంభమైంది. అదే సంవత్సరం నిశ్చితార్థం జరగగా, 2022 ఫిబ్రవరి 5న ముంబైలో వివాహం జరిగింది. ఈ వివాహ వేడుకకు సినీ రంగానికి చెందిన పలువురు ప్రముఖులు హాజరయ్యారు.
కరిష్మా కెరీర్ విషయానికి వస్తే, టెలివిజన్ & సినీ రంగాల్లో రెండు దశాబ్దాలుగా కొనసాగుతుంది. క్యుంకీ సాస్ భీ కభీ బహు థీ, నాగిన్ 3, ఖయామత్ కీ రాత్ వంటి షోలతో ప్రేక్షకులకి దగ్గరైంది. ‘గ్రాండ్ మస్తీ, సంజు, సూరజ్ పే మంగళ్ భారీ వంటి భారీ ప్రాజెక్టుల్లో నటించి గుర్తింపు పొందింది. అలాగే OTT ప్లాట్ఫార్మ్లలో కూడా Hush Hush, Scoop వంటి ప్రాజెక్ట్లతో తనదైన ముద్ర వేసుకుంది.