మొబైల్ యూజర్లకు ముఖ్య గమనిక.. TRAI పెద్ద విషయమే చెప్పిందిగా..!
1600, 140 సిరీస్ల నుంచి వచ్చే కాల్స్పై టెలికాం రెగ్యులేటరీ అథారిటీ ఆఫ్ ఇండియా (TRAI) స్పష్టత ఇచ్చింది. స్పామ్ డిటెక్షన్ అప్లికేషన్లు, కాల్ ఫిల్టరింగ్ ఇకపై ఈ నంబర్లను స్పామ్ లేదా మోసపూరితమైనవిగా ఆటోమేటిక్గా బ్లాక్ చేయవు లేదా లేబుల్ చేయవు.
బ్యాంకులు, ప్రభుత్వ విభాగాలు, నమ్మదగిన వ్యాపార సంస్థల నుంచి వెలువడే ముఖ్యమైన సమాచారాలు అనవసర అంతరాయాలు లేకుండా వినియోగదారులకు చేరేలా చూసేందుకు ఈ నిర్ణయం తీసుకున్నట్లు ట్రాయ్ తెలిపింది.
1600 నంబర్ సిరీస్ ప్రత్యేకంగా అత్యవసర సేవలకు సంబంధించిన కమ్యూనికేషన్ కోసం కేటాయించినట్లు ట్రాయ్ పేర్కొంది. బ్యాంకులు, బీమా కంపెనీలు, ఆర్థిక సంస్థలు, ప్రభుత్వ వ్యవస్థలోని పలు ముఖ్య శాఖలు ఈ 1600 సిరీస్ నుంచి కాల్స్ చేస్తాయని.. వీటి ద్వారానే అత్యవసర అకౌంట్ అలర్ట్లు, OTPలు, పాలసీ అప్డేట్లు, ఇతర ముఖ్యమైన సమాచారాన్ని పొందుతారని ట్రాయ్ వివరణ ఇచ్చింది.
►ALSO READ | మన దేశంలో మొబైల్ ఫోన్ల తయారీ పథకం: 62 వేల కోట్ల బడ్జెట్ కూడా ఇచ్చేశారు..!
స్పామ్ డిటెక్షన్ యాప్లు పొరపాటున ఈ కాల్స్ను బ్లాక్ చేస్తుండటం వల్ల చాలా మంది వీటిని మిస్ అవుతున్నారని ట్రాయ్ తేల్చింది. 140 సిరీస్ నుంచి కూడా కేవలం రిజిస్టర్డ్ టెలిమార్కెటర్ల నుంచి మాత్రమే కాల్స్ వస్తాయని.. ఇవి స్పామ్ కాదని ట్రాయ్ తెలిపింది. అవి ప్రకటనలే అయినప్పటికీ టెలికాం నిబంధనలను పాటిస్తున్నారని.. అందువల్ల ఇకపై యాప్లు వాటంతట అవే వాటిని పూర్తిగా నిషేధించలేవు లేదా స్పామ్గా గుర్తించలేవని ట్రాయ్ తేల్చి చెప్పింది.
అయితే.. మార్కెటింగ్ కాల్స్తో విసిగిపోయి ఉంటే స్పామ్ యాప్లను వాడటం మానేసి, మీ ఆపరేటర్తో గానీ లేదా TRAI DND యాప్ ద్వారా గానీ ‘డు నాట్ డిస్టర్బ్’ (DND)ను యాక్టివేట్ చేసుకోవాలని వినియోగదారులకు ట్రాయ్ సలహా ఇచ్చింది.
