మనం ఆరోగ్యంగా ఉండాలంటే మంచి ఆహారం ఎంత ముఖ్యమో, కంటి నిండా నిద్ర కూడా అంతే అవసరం. మన జీవిత కాలంలో దాదాపు మూడో వంతు సమయాన్ని నిద్రలోనే గడుపుతామంటే, అది మన శరీరానికి ఎంతటి రీఛార్జ్ ఇస్తుందో అర్థం చేసుకోవచ్చు. కానీ నేటి ఉరుకుల పరుగుల జీవితంలో, నైట్ షిఫ్టులు మరియు నిద్రపై ఉన్న కొన్ని తప్పుడు అవగాహనల వల్ల మనకు తెలియకుండానే అనారోగ్యాల బారిన పడుతున్నాం. ఆరోగ్యకరమైన రేపటి కోసం నిద్ర గురించి మీకు తెలిసిన కొన్ని విషయాలు అపోహలో కాదో ఇప్పుడు సరిచూసుకోండి..
ఐదు గంటల నిద్ర సరిపోతుందా?: చాలామంది పని ఒత్తిడిలో ఉండి “నాకు ఐదు గంటల నిద్ర చాలు, నేను యాక్టివ్గానే ఉన్నాను” అని భ్రమపడుతుంటారు. ఇది ముమ్మాటికీ అపోహే! పెద్దవారికి రోజుకు కనీసం 7 నుంచి 8 గంటల నిద్ర ఖచ్చితంగా అవసరమని నిపుణులు చెబుతున్నారు. తక్కువ సమయం నిద్రపోవడం వల్ల రక్తపోటు (బిపి), గుండె జబ్బులు మరియు మానసిక కుంగుబాటు వంటి సమస్యలు వచ్చే ప్రమాదం ఉంది. ఇక మీ శరీరానికి కావాల్సిన విశ్రాంతిని ఇవ్వకపోతే, అది దీర్ఘకాలంలో మీ ఆరోగ్యంపై దెబ్బకొడుతుంది.
ఎప్పుడు పడుకున్నా ఎనిమిది గంటలు లెక్కేనా?: రాత్రి పనులు ముగించుకుని తెల్లవారుజామున పడుకుని, మధ్యాహ్నం వరకు నిద్రపోతే ఎనిమిది గంటలు పూర్తవుతాయని కొందరు అనుకుంటారు. కానీ, ప్రకృతి సిద్ధంగా రాత్రి నిద్రకు ఉన్న శక్తి పగటి నిద్రకు ఉండదు. ఇక మన శరీరంలోని అంతర్గత గడియారం (Circadian Rhythm) రాత్రి వేళలోనే మెదడును, అవయవాలను సరిగ్గా రిపేర్ చేస్తుంది. ఎప్పుడో ఒకసారి పగలు నిద్రపోతే పర్వాలేదు కానీ, దీన్నే అలవాటుగా మార్చుకుంటే మాత్రం జీవక్రియలు దెబ్బతినే అవకాశం ఉంది.
కేవలం కళ్లు మూసుకుంటే విశ్రాంతి దొరుకుతుందా?: నిద్ర రాకపోయినా అలా కళ్లు మూసుకుని పడుకుంటే శరీరానికి విశ్రాంతి దొరుకుతుందని చాలామంది భావిస్తారు. అయితే, మేల్కొని కళ్లు మూసుకోవడానికి, గాఢ నిద్రకు చాలా తేడా ఉంది. మనం నిద్రలో ఉన్నప్పుడు మాత్రమే మెదడు తనలోని వ్యర్థాలను శుభ్రం చేసుకుంటుంది. ఇక ఆలోచనా శక్తి, నిర్ణయాలు తీసుకునే సామర్థ్యం పెరగాలంటే మెదడుకు కావాల్సింది కేవలం నిశ్శబ్దం కాదు, గాఢమైన నిద్ర. అందుకే విశ్రాంతి సమయంలో వీలైతే ఒక చిన్న కునుకు తీయడం మేలు.
జీవనశైలి మార్పులతోనే ప్రశాంతత: మన ఆహారపు అలవాట్లు, పడుకునే ముందు మొబైల్ వాడటం వంటివి మన నిద్రను దూరం చేస్తున్నాయి. నిద్రకు కూడా ఒక క్రమశిక్షణ అవసరం. ప్రతిరోజూ ఒకే సమయానికి పడుకోవడం, పడుకునే గది ప్రశాంతంగా ఉంచుకోవడం వంటి చిన్న చిన్న మార్పులు అద్భుతమైన ఫలితాలను ఇస్తాయి. నిద్ర అనేది సమయం వృధా చేయడం కాదు, అది రేపటి పని కోసం మిమ్మల్ని మీరు సిద్ధం చేసుకోవడం. ఇక మీ నిద్ర సమయాన్ని త్యాగం చేయడం అంటే మీ ఆరోగ్యాన్ని పణంగా పెట్టడమే.
నిద్ర లేమి తెచ్చే ముప్పులు: నిద్ర సరిగ్గా లేకపోతే కేవలం అలసట మాత్రమే కాదు, అది మన రోగనిరోధక శక్తిని కూడా తగ్గిస్తుంది. దీనివల్ల తరచూ అనారోగ్యాలకు గురికావడం, కోపం, చిరాకు పెరగడం వంటివి జరుగుతాయి. మీ మేధస్సు చురుగ్గా ఉండాలన్నా, చర్మం కాంతివంతంగా మెరవాలన్నా నిద్రకు మించిన మందు లేదు. ఇక అందుకే అపోహలను పక్కన పెట్టి, రాత్రి వేళ కంటి నిండా నిద్రపోవడానికి ప్రాధాన్యం ఇవ్వండి. ఆరోగ్యంగా ఉండటం మీ చేతుల్లోనే ఉంది!
నిద్ర అనేది మన శరీరానికి లభించే ప్రకృతి సిద్ధమైన వరం. అపోహల కారణంగా దాన్ని నిర్లక్ష్యం చేయకుండా, కనీసం 7-8 గంటల గాఢ నిద్రపోయేలా ప్లాన్ చేసుకోండి. అప్పుడే మీరు శారీరకంగా, మానసికంగ పూర్తి ఆరోగ్యంగా ఉండగలరు. గుర్తుందిగా.. మంచి నిద్ర, మంచి ఆరోగ్యానికి తొలి మెట్టు!
గమనిక: పైన ఇచ్చిన సమాచారం కేవలం అవగహన కోసం మాత్రమే, మీకు దీర్ఘకాలంగా నిద్ర పట్టకపోవడం లేదా ఇన్సోమ్నియా వంటి సమస్యలు ఉంటే, వెంటనే నిపుణులైన వైద్యులను సంప్రదించి సలహా తీసుకోవడం మంచిది.
The post బాగా నిద్రపోవాలంటే ముందుగా ఈ అపోహలు విడిచేయాలి! appeared first on Manalokam – Latest Telugu News & Updates.