Jana Nayagan: ‘అంబేడ్కర్ చట్టం’ డైలాగ్ సెన్సార్ తొలగింపు.. అసలు కారణం చెప్పిన ‘జన నాయగన్’ నిర్మాత

ఎన్నో అడ్డంకులు, సెన్సార్ వివాదాల తర్వాత దళపతి విజయ్ నటించిన చివరి చిత్రం ‘జన నాయగన్’ విడుదలకు సిద్ధమైంది. అభిమానులు ఎంతో ఆసక్తిగా ఎదురుచూస్తున్న ఈ సినిమాను జూలై 23, 2026న ప్రపంచవ్యాప్తంగా విడుదల కానుంది. నెలల తరబడి సాగిన సెన్సార్ వివాదాల అనంతరం సినిమాకు సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) సర్టిఫికేట్ లభించింది.

ఇక ఎట్టకేలకు సినిమా రిలీజ్ దగ్గర పడటంతో మేకర్స్ ప్రమోషన్స్లో వేగం పెంచారు. ఈ సందర్భంగా ఓ ఇంటర్వ్యూలో జన నాయగన్ (Jana Nayagan) నిర్మాత కె.వెంకట నారాయణ తొలిసారిగా సెన్సార్ బోర్డు సూచించిన మార్పులపై స్పందించారు. ముఖ్యంగా సినిమాలోని ‘అంబేడ్కర్ చట్టం’ అనే డైలాగ్‌ను ‘టీవీకే చట్టం’గా మార్చాలని సెన్సార్ బోర్డు సూచించడంతో దీనిపై పెద్ద చర్చ జరిగిందని వెల్లడించారు. 

ఓ ఇంటర్వ్యూలో నిర్మాత మాట్లాడుతూ.. సినిమాలోని డాక్టర్ బీఆర్ అంబేడ్కర్ రాజ్యాంగం మరియు విజయ్ పార్టీ తమిళగ వెట్రి కళగం (TVK) రాజ్యాంగాన్ని ప్రస్తావించిన డైలాగ్‌నే ప్రధానంగా మార్చాల్సి వచ్చిందని వెల్లడించారు. అసలు డైలాగ్‌లో ‘‘అంబేడ్కర్ రాజ్యాంగాన్ని అనుసరించకపోతే, టీవీకే రాజ్యాంగం అమల్లోకి వస్తుంది’’ అనే భావం ఉందని తెలిపారు. అయితే ఆ డైలాగ్‌ను రాజకీయ కోణంలో కాకుండా, ప్రజలకు సులభంగా అర్థమయ్యే ఉదాహరణగా మాత్రమే రాశామని నిర్మాత వివరించారు.

‘‘ఇంట్లో పెద్దలు చెప్పిన నియమాలను పిల్లలు పాటించకపోతే వచ్చే పరిణామాలను ఎలా వివరిస్తామో, అదే తరహాలో రాజ్యాంగాన్ని పాటించకపోతే ఏమవుతుందో చెప్పే ప్రయత్నమే చేశాం. అయితే అందులో రాజకీయ వ్యాఖ్య కనిపిస్తోందని సెన్సార్ బోర్డు భావించి మార్పులు సూచించింది. మేము దేశ చట్టాలను గౌరవిస్తాం. వారు సూచించిన చోట్ల అవసరమైన మార్పులన్నీ చేశాం’’ అని వెంకట నారాయణ తెలిపారు.

సెన్సార్ బోర్డు సూచించిన ఇతర మార్పులు..

అంబేడ్కర్-టీవీకే డైలాగ్‌తో పాటు, డాక్టర్ అంబేడ్కర్ చిత్రంతో ఉన్న ఓ పుస్తక కవర్‌ను కూడా మార్చాలని సెన్సార్ బోర్డు సూచించింది. అలాగే సినిమాలో వినిపించే ‘భగవతన్’, ‘రంగనాథర్’, ‘ఓం’ వంటి మతపరమైన పదాలను మ్యూట్ చేశారు. ‘ఆపరేషన్ మేలుహా’ గురించి చెప్పే ఓ డైలాగ్‌లో ఉన్న ‘ఓం’ పదాన్ని కూడా తొలగించారు. మొత్తంగా సినిమాకు దాదాపు 20 సెకన్ల కట్స్, మరో 10 సెకన్ల రీప్లేస్‌మెంట్స్ చేయాలని సీబీఎఫ్‌సీ ఆదేశించింది.

►ALSO READ | Mouni Roy: హద్దులు దాటిన ఫొటోగ్రాఫర్లు.. కారులోనూ వదల్లేదు.. చిర్రెత్తిపోయిన ‘విశ్వంభర’బ్యూటీ మౌనీ రాయ్

ఏడు నెలల సెన్సార్ పోరాటం..

‘జన నాయగన్’ సెన్సార్ ప్రక్రియ ఏడు నెలలు సాగింది. తొలుత U/A 16+ సర్టిఫికేట్ సూచించిన సీబీఎఫ్‌సీ, తర్వాత సినిమాను రివైజింగ్ కమిటీకి పంపడంతో ఆలస్యమైంది. అనంతరం మేకర్స్ మద్రాస్ హైకోర్టును ఆశ్రయించి, చివరకు అవసరమైన మార్పులు చేసిన తర్వాత సినిమాకు ‘A’ సర్టిఫికేట్ లభించింది.

ఇదిలా ఉంటే.. హెచ్ వినోద్ దర్శకత్వంలో కెవిఎన్ ప్రొడక్షన్స్ నిర్మించిన ఈ మూవీ పొలిటికల్ యాక్షన్ థ్రిల్లర్ గా వస్తోంది. ఈ భారీ చిత్రంలో పూజా హెగ్డే హీరోయిన్‌గా నటించగా, బాబీ డియోల్, ప్రకాశ్ రాజ్, గౌతమ్ వాసుదేవ్ మీనన్, ప్రియమణి తదితరులు కీలక పాత్రలు పోషించారు. అనిరుధ్ రవిచందర్ సంగీతం అందిస్తున్న ఈ సినిమా విజయ్ సినీ కెరీర్‌లో చివరి చిత్రం కావడంతో అంచనాలు మరింత పెరిగాయి.