పెద్ద సినిమాల వరుస వాయిదాలు చిత్ర పరిశ్రమకు తీవ్ర తలనొప్పిగా మారాయి. ఆఖరి నిమిషం వరకు వాయిదా ప్రకటనలు చేయకపోవడం వల్ల నష్టాలు మరింత పెరుగుతున్నాయి. ఒక పెద్ద సినిమా వాయిదా పడితే థియేటర్లు ఖాళీ అవుతాయి. స్టార్ హీరోల చిత్రాల కోసం వందలాది థియేటర్లు బుక్ అవుతాయి. ఇవి ఖాళీ అయినప్పుడు, ఆ తేదీకి విడుదలయ్యే చిన్న చిత్రాలు వాటిని నింపలేవు, వాటికి ప్రమోషన్ కూడా సరిపోదు. స్టార్ హీరోల సినిమాలకు ప్రమోషన్ లేకపోయినా ప్రేక్షకులు వస్తారు కానీ, చిన్న సినిమాలకు అది సాధ్యం కాదు. వాయిదా పడుతున్న సినిమాల నిర్మాతలకు కూడా భారీ నష్టాలు తప్పవు. ప్రస్తుతం, రిలీజ్ డేట్ను బట్టి ఓటీటీ డీల్స్ జరుగుతున్నాయి. అనుకున్న సమయం దాటితే ఓటీటీ సంస్థలు ముందు ఒప్పుకున్న మొత్తాన్ని ఇచ్చేందుకు నిరాకరిస్తున్నాయి, దీంతో నిర్మాతలు కూడా నష్టపోతున్నారు. ఈ పరిస్థితి మెరుగుపడాలంటే నిర్మాతలు మెరుగైన ప్రణాళికతో చిత్రాలను సిద్ధం చేయాలని అభిమానులు కోరుతున్నారు.