అంతర్జాతీయ అంతరిక్ష కేంద్రం (ISS)లో గాలి లీకేజీ సమస్య మరింత తీవ్రతరమవుతున్న నేపథ్యంలో అమెరికా అంతరిక్ష సంస్థ నాసా అప్రమత్తమైంది. రష్యాకు చెందిన జ్వెజ్డా (Zvezda) సర్వీస్ మాడ్యూల్లోని ట్రాన్స్ఫర్ టన్నెల్ ప్రాంతంలో గాలి లీకేజీ పెరిగినట్లు గుర్తించిన నాసా, అక్కడ విధులు నిర్వహిస్తున్న వ్యోమగాములకు ప్రత్యేక హెచ్చరికలు జారీ చేసింది. ISSలో ఉన్న వ్యోమగాములు అవసరమైతే అత్యవసర తరలింపునకు సిద్ధంగా ఉండాలని నాసా సూచించింది. ఇందుకోసం వారు తమకు అనుసంధానించబడిన అంతరిక్ష నౌకల్లోనే ఉండాలని, స్పేస్సూట్లను సిద్ధంగా ఉంచుకోవాలని ఆదేశించింది.
నాసా క్రూ-12 మిషన్లో భాగంగా అంతరిక్ష కేంద్రంలో ఉన్న నలుగురు వ్యోమగాములు.. అమెరికాకు చెందిన ఇద్దరు, ఫ్రాన్స్కు చెందిన ఒకరు, రష్యాకు చెందిన ఒకరు.. తమ క్రూ డ్రాగన్ అంతరిక్ష నౌకలోకి ప్రవేశించి అవసరమైన భద్రతా చర్యలు చేపట్టినట్లు సమాచారం. గాలి లీకేజీ మరింత పెరిగి అత్యవసర పరిస్థితి ఏర్పడితే వెంటనే తరలించేందుకు వీలుగా ఈ చర్యలు తీసుకున్నట్లు నాసా అధికారులు వెల్లడించారు.
కారణం గుర్తించేందుకు ప్రయత్నాలు
గత కొన్ని నెలలుగా నాసా, రష్యా అంతరిక్ష సంస్థ రోస్కోస్మోస్ ఈ గాలి లీకేజీకి కారణాలను గుర్తించేందుకు సంయుక్తంగా ప్రయత్నిస్తున్నాయి. అయితే ఇప్పటివరకు సమస్యకు ఖచ్చితమైన కారణం నిర్ధారణ కాలేదు.
ఇటీవలి వరకు లీకేజీ స్థాయి చాలా స్వల్పంగానే ఉన్నప్పటికీ, తాజాగా అది పెరిగినట్లు అధికారులు గుర్తించారు. ముఖ్యంగా సోమవారం నుంచి గాలి లీకేజీ రోజుకు ఒకటి నుంచి రెండు పౌండ్ల మేర పెరిగినట్లు నివేదికలు సూచిస్తున్నాయి. దీంతో అంతరిక్ష కేంద్రం భద్రతపై నాసా మరింత అప్రమత్తంగా వ్యవహరిస్తోంది.
వ్యోమగాముల భద్రతకు ప్రాధాన్యం
ప్రస్తుతం వ్యోమగాములందరూ సురక్షితంగానే ఉన్నారని నాసా తెలిపింది. అయితే పరిస్థితిని నిరంతరం పర్యవేక్షిస్తూ, అవసరమైతే అత్యవసర చర్యలు తీసుకునేందుకు సిద్ధంగా ఉన్నట్లు వెల్లడించింది. గాలి లీకేజీ సమస్యను పరిష్కరించేందుకు రష్యన్ ఇంజినీరింగ్ బృందం కక్ష్యలోని తమ విభాగంలో మరమ్మతు పనులు కొనసాగిస్తోంది.