ఐరన్ టాబ్లెట్స్ వాడే వారికి ముఖ్యమైన జాగ్రత్తలు ఇవే

శరీరంలో రక్తం తక్కువగా ఉన్నప్పుడు లేదా నీరసంగా అనిపించినప్పుడు డాక్టర్లు ఐరన్ మాత్రలు వాడుకోమని సూచిస్తుంటారు. అయితే, ఈ మాత్రలు వేసుకున్నంత మాత్రాన ఫలితం ఉండదు అవి మన శరీరం సరిగ్గా గ్రహించినప్పుడే రక్తం పెరుగుతుంది. ఐరన్ మాత్రలు వేసుకునే సమయంలో మనం చేసే చిన్న చిన్న పొరపాట్ల వల్ల అవి ఒంటికి పట్టవు. అందుకే ఐరన్ టాబ్లెట్స్ ఎలా వాడాలి, ఏ వస్తువులకు దూరంగా ఉండాలో ఇప్పుడు వివరంగా తెలుసుకుందాం.

ఎప్పుడు వేసుకుంటే మంచిది?: ఐరన్ మాత్రలను సాధారణంగా ఉదయం  తీసుకుంటే శరీరం వాటిని చాలా వేగంగా గ్రహిస్తుంది. అయితే ఇక కొంతమందికి ఖాళీ కడుపున వేసుకోవడం వల్ల వికారం లేదా కడుపులో అసౌకర్యంగా అనిపించవచ్చు. అలాంటి వారు భయం పడాల్సిన అవసరం లేదు లైట్‌గా ఆహారం తీసుకున్న తర్వాత కూడా ఈ మాత్రలు వేసుకోవచ్చు. లేదంటే నైట్ పాడుకొనే ఒక గంట ముందు వేసుకోవచ్చు, దీనివల్ల కడుపులో మంట వంటి సమస్యలు తగ్గుతాయి.

విటమిన్-సి తో తోడైతేనే బలం: ఐరన్ మన శరీరానికి బాగా పట్టాలంటే దానికి విటమిన్-సి తోడు కావాలి. అందుకే ఐరన్ మాత్రలను నీళ్లతో కాకుండా నిమ్మరసం లేదా ఆరెంజ్ జ్యూస్ వంటి సిట్రస్ రసాలతో తీసుకుంటే ఫలితం రెట్టింపు ఉంటుంది. ఇక ఇలా చేయడం వల్ల ఐరన్ శోషణ మెరుగుపడి రక్తం త్వరగా పెరుగుతుంది. కాబట్టి టాబ్లెట్ వేసుకునేటప్పుడు ఒక నిమ్మకాయ నీళ్ల గ్లాసు వెంట ఉంచుకోవడం మంచి అలవాటు.

పాలు, క్యాల్షియంతో వద్దు: చాలామంది చేసే అతిపెద్ద తప్పు ఐరన్ మాత్రలను పాలు లేదా పెరుగుతో తీసుకోవడం. పాలలో ఉండే క్యాల్షియం ఐరన్‌ను అడ్డుకుంటుంది. దీనివల్ల మీరు ఎంత ఖరీదైన ఐరన్ మాత్రలు వాడినా ప్రయోజనం సున్నా. అలాగే ఇక క్యాల్షియం టాబ్లెట్స్ కూడా ఐరన్ మాత్రలతో కలిపి అస్సలు వేసుకోకూడదు. ఈ రెండింటి మధ్య కనీసం రెండు గంటల వ్యవధి ఉండేలా ప్లాన్ చేసుకోవాలి.

కాఫీ, టీలకు దూరంగా ఉండండి: ఐరన్ మాత్రలు వేసుకున్న వెంటనే కాఫీ లేదా టీ తాగడం వల్ల అందులో ఉండే టానిన్లు ఐరన్ శరీరంలో కలవకుండా చేస్తాయి. కనీసం గంట లేదా రెండు గంటల వరకు వీటికి దూరంగా ఉండటం ఉత్తమం. ఇలాంటి చిన్న చిన్న జాగ్రత్తలు పాటించడం వల్ల తక్కువ సమయంలోనే మీ హిమోగ్లోబిన్ లెవల్స్ పెరిగి, శరీరం ఉత్సాహంగా తయారవుతుంది.

ఐరన్ మాత్రలు వాడటం ఎంత ముఖ్యమో, వాటిని సరైన పద్ధతిలో వేసుకోవడం కూడా అంతే ముఖ్యం. సరైన ఆహారం తీసుకుంటూ, క్యాల్షియం వంటి వాటికి గ్యాప్ ఇస్తూ ఐరన్ టాబ్లెట్స్ వాడితే రక్తహీనత సమస్య నుంచి త్వరగా బయటపడవచ్చు.

గమనిక: పైన అందించిన సమాచారం ప్రాథమిక అవగాహన కోసం మాత్రమే. మీరు ఐరన్ మాత్రలు వాడుతున్నట్లయితే, మీ ఆరోగ్య పరిస్థితిని బట్టి మీ డాక్టర్ సూచించిన మోతాదును, సమయాన్ని పాటించడం అత్యవసరం. ఏవైనా సైడ్ ఎఫెక్ట్స్ కనిపిస్తే వెంటనే వైద్యుడిని సంప్రదించండి.

The post ఐరన్ టాబ్లెట్స్ వాడే వారికి ముఖ్యమైన జాగ్రత్తలు ఇవే appeared first on Manalokam – Latest Telugu News & Updates.