సిరిపోంగ్ ఆగస్టు 21న ఫేస్బుక్లో కంపెనీ విక్రయానికి సంబంధించిన ప్రకటన చేశారు. తాను అడుగుతున్న ధరకు కంపెనీని కొనుగోలు చేసే వ్యక్తిని పరిచయం చేసిన వారికి 5 మిలియన్ బాట్ (సుమారు రూ.1.4 కోట్లు) రిఫరల్ ఫీజుగా ఇస్తానని ప్రకటించారు. ఈ డీల్లో కేవలం ఐస్క్రీమ్ బ్రాండ్ మాత్రమే కాకుండా.. సుమారు 2.77 ఎకరాల భూమి, కార్యాలయం, యంత్రాలతో కూడిన ఫ్యాక్టరీ, అవసరమైన లైసెన్సులు, Hawell’s Ice Cream and Fast Food ఔట్లెట్, ట్రేడ్మార్క్, ఐస్క్రీమ్ తయారీకి సంబంధించిన రెసిపీల సేకరణ కూడా ఉన్నాయి.
షాపింగ్ మాల్స్లో ఫేమస్ బ్రాండ్
1999లో Hawell’s ప్రారంభమైంది. అదే ఏడాది డిసెంబర్లో Central Pinklaoలో తొలి ఔట్లెట్ను ఏర్పాటు చేశారు. తక్కువ ధరల్లో మంచి నాణ్యత కలిగిన ఐస్క్రీమ్ అందించడంతో బ్రాండ్ త్వరగా ప్రజాదరణ పొందింది. కేవలం మూడేళ్లలోనే Hawell’s 22 బ్రాంచ్లకు విస్తరించింది. Y2K కాలంలో థాయ్లాండ్లో గుర్తింపు పొందిన బ్రాండ్లలో ఇది కూడా ఒకటిగా నిలిచింది. సిరిపోంగ్కు చిన్నప్పటి నుంచే ఐస్క్రీమ్ అంటే ఎంతో ఇష్టం. తన కెరీర్ను కూడా ఐస్క్రీమ్ విక్రేతగా ప్రారంభించారు. ఆ తర్వాత వ్యాపారవేత్తలపై ప్రసారమయ్యే థాయ్ టెలివిజన్ కార్యక్రమాల్లో కనిపిస్తూ మరింత పరిచయం సంపాదించారు. అయితే కాలక్రమంలో ఐస్క్రీమ్ రంగంలో పోటీ పెరిగింది. పెద్ద కంపెనీలు షాపింగ్ మాల్స్తో ప్రత్యేక ఒప్పందాలు చేసుకోవడంతో ఇతర ఐస్క్రీమ్ బ్రాండ్లకు అదే ప్రాంతాల్లో ఔట్లెట్లు ఏర్పాటు చేసే అవకాశం లేకుండా పోయింది. దీంతో Hawell’s బ్రాంచ్లు ఒక్కొక్కటిగా మూతపడటం ప్రారంభించాయి.
చివరకు Central Pinklaoలోని తొలి ఔట్లెట్ కూడా 2014లో మూసివేశారు. బ్రాండ్ను తిరిగి నిలబెట్టేందుకు సిరిపోంగ్ చాలా సంవత్సరాలు ప్రయత్నించారు. గత రెండేళ్లుగా షాపింగ్ మాల్స్లో కొత్త బ్రాంచ్లు ఏర్పాటు చేసేందుకు చర్చలు జరిపినప్పటికీ.. స్థలం లేదనే సమాధానం పదేపదే వచ్చిందని ఆయన తెలిపారు. ఫ్రాంచైజీ విధానంలో విస్తరించే ఆలోచన కూడా చేసినప్పటికీ, వేగంగా విస్తరించడం వల్ల భవిష్యత్తులో సమస్యలు వచ్చి బ్రాండ్ ప్రతిష్ఠ దెబ్బతినే అవకాశం ఉందని భావించి ఆ నిర్ణయాన్ని విరమించుకున్నారు. 2023లో Nonthaburiలోని Bang Bua Thongలో ప్రత్యేకంగా నిర్వహించే ఔట్లెట్తో Hawell’s మళ్లీ ప్రారంభమైంది. ప్రస్తుతం అదే సంస్థకు ఉన్న ఏకైక కార్యకలాపాల బ్రాంచ్.
కంపెనీ అమ్మకానికి అసలు కారణం ఇదే..
అయితే వ్యాపారాన్ని విస్తరించడంలో ఎదురవుతున్న ఇబ్బందులే కంపెనీ విక్రయానికి ప్రధాన కారణం కాదని సిరిపోంగ్ స్పష్టం చేశారు. ప్రాపంచిక జీవితాన్ని విడిచిపెట్టి ఆధ్యాత్మిక జీవితంలోకి వెళ్లాలన్నదే తన ప్రధాన లక్ష్యమని ఆయన చెప్పారు. ఎన్నో సంవత్సరాలుగా బౌద్ధ ధర్మంపై ఆసక్తి ఉన్న సిరిపోంగ్.. 15 ఏళ్లకు పైగా సన్యాసిగా మారాలని ఆలోచిస్తున్నట్లు వెల్లడించారు. తాను, తన కుటుంబం నిర్ణయించుకున్న జీవిత ప్రణాళిక ప్రకారం మరో రెండేళ్ల సమయం మాత్రమే ఉందని ఆయన తెలిపారు. సన్యాసిగా మారే ముందు భూమిని కొనుగోలు చేసి, అక్కడ అడవిని పోలిన ప్రశాంతమైన ప్రదేశంలో ధ్యాన కేంద్రాన్ని ఏర్పాటు చేయాలని సిరిపోంగ్ భావిస్తున్నారు. అక్కడ కొంతకాలం ధ్యానం, ఆధ్యాత్మిక సాధన చేసిన అనంతరం బౌద్ధ సన్యాసిగా మారాలని ఆయన లక్ష్యంగా పెట్టుకున్నారు. బౌద్ధ ధర్మంపై ఆయనకు ఉన్న ఆసక్తి కొత్తది కాదు. 2016లో Success Derived from the Buddha అనే పుస్తకాన్ని కూడా రచించారు. బౌద్ధ బోధనలపై ప్రసంగాలు కూడా చేశారు. దీర్ఘకాలంలో ప్రాపంచిక జీవితానికి పూర్తిగా దూరమై ఆధ్యాత్మిక సాధనకు తన జీవితాన్ని అంకితం చేయాలని ఆయన కోరుకుంటున్నారు. చివరికి అరహంతుడిగా జ్ఞానోదయం పొందడమే తన లక్ష్యమని ఆయన పేర్కొన్నారు.
కంపెనీని విక్రయిస్తున్నప్పటికీ Hawell’s భవిష్యత్తులో మరింత ఎదగాలని సిరిపోంగ్ కోరుకుంటున్నారు. ‘Hawell’s నేను నిర్మించిన వ్యాపారం మాత్రమే కాదు.. అది నా జీవితంలో, నా కుటుంబ జీవితంలో ఒక భాగం’ అని ఆయన పేర్కొన్నారు. తాను ఒకరోజు ఆ వ్యాపారం నుంచి పూర్తిగా దూరమైనా.. Hawell’s మాత్రం ముందుకు సాగాలని కోరుకుంటున్నట్లు చెప్పారు. కోట్ల విలువైన వ్యాపార సామ్రాజ్యాన్ని నిర్మించిన ఓ పారిశ్రామికవేత్త.. చివరికి సంపద, వ్యాపారాన్ని పక్కనపెట్టి ఆధ్యాత్మిక మార్గాన్ని ఎంచుకోవడం ఇప్పుడు ఆసక్తికరంగా మారింది.