IND W vs HKC W: మహిళల ఆసియా కప్ 2026 టోర్నీలో భారత మహిళల జట్టు విజయభేరి మోగించింది. హాంకాంగ్తో జరిగిన మ్యాచ్లో ఏకంగా 137 పరుగుల తేడాతో భారీ విజయం సాధించి సెమీఫైనల్ బెర్తును అధికారికంగా ఖాయం చేసుకుంది. స్మృతి మంధాన విధ్వంసకర సెంచరీతో పాటు బౌలర్ల ధాటికి హాంకాంగ్ చేతులెత్తేసింది. దుబాయ్ ఇంటర్నేషనల్ క్రికెట్ స్టేడియంలో టాస్ ఓడి ముందుగా బ్యాటింగ్కు దిగిన టీమిండియాకు ఓపెనర్లు షఫాలీ వర్మ, స్మృతి మంధాన అద్భుతమైన ఆరంభాన్ని ఇచ్చారు. పవర్ప్లేలోనే వికెట్ నష్టపోకుండా 60 పరుగులు చేసి ప్రత్యర్థి బౌలర్లపై విరుచుకుపడ్డారు. షఫాలీ వర్మ 17 బంతుల్లో 28 పరుగులు చేసి అవుటైనప్పటికీ, స్మృతి మంధాన మైదానం నలుమూలలా బౌండరీల వర్షం కురిపించింది. కేవలం 57 బంతుల్లో సెంచరీ పూర్తి చేసుకున్న మంధాన, మొత్తం 64 బంతుల్లో 14 ఫోర్లు, 7 సిక్సర్లతో 124 పరుగులు చేసింది. ఈ విధ్వంసకర సెంచరీ సాయంతో భారత్ నిర్ణీత 20 ఓవర్లలో 5 వికెట్ల నష్టానికి 193 పరుగుల కొండంత స్కోరును నమోదు చేసింది.
194 పరుగుల భారీ లక్ష్యంతో బరిలోకి దిగిన హాంకాంగ్ జట్టును భారత బౌలర్లు ఆరంభం నుంచే వణికించారు. రెండో ఓవర్లోనే ఓపెనర్ మారిషో హిల్ను డకౌట్గా పెవిలియన్కు పంపి నందిని శర్మ వికెట్ల వేటను ప్రారంభించింది. భారత కచ్చితమైన లైన్ అండ్ లెంగ్త్ బౌలింగ్ ముందర హాంకాంగ్ బ్యాటర్లు కనీసం పోరాటం కూడా చేయలేకపోయారు. కెప్టెన్ నటాషా మైల్స్ 15 పరుగులు, యాస్మిన్ దాస్వాని 11 పరుగులు తప్ప మిగిలిన వారంతా పట్టుమని పది పరుగులు కూడా చేయలేకపోయారు.
భారత బౌలర్లు కంబైన్డ్ ప్రదర్శనతో హాంకాంగ్ ఇన్నింగ్స్ను కుప్పకూల్చారు. ప్రేమా రావత్ 2 వికెట్లతో మెరవగా, నందిని శర్మ సహా ఇతర బౌలర్లు క్రమం తప్పకుండా వికెట్లు తీస్తూ ప్రత్యర్థిపై ఒత్తిడి పెంచారు. దాంతో హాంకాంగ్ జట్టు 16.2 ఓవర్లలోనే కేవలం 56 పరుగులకే కుప్పకూలింది. దాంతో భారత్ 137 పరుగుల భారీ తేడాతో అద్భుత విజయాన్ని అందుకుంది.
తొలి మ్యాచ్లో థాయ్లాండ్ను 94 పరుగుల తేడాతో ఓడించిన భారత జట్టు, ఇప్పుడు హాంకాంగ్ను చిత్తు చేసి టోర్నీలో వరుసగా రెండో విజయాన్ని అందుకుంది. ఈ లీగ్ దశలో భారత్ ఆడబోయే తదుపరి మ్యాచ్ శనివారం చిరకాల ప్రత్యర్థి పాకిస్తాన్తో జరగనుంది. ఈ క్రమంలో సెమీస్ బెర్త్ ఖాయం చేసుకున్న హర్మాన్ప్రీత్ సేన పాకిస్తాన్పై కూడా విజయం సాధించి గ్రూప్ అగ్రస్థానంలో నిలవాలని పట్టుదలతో ఉంది.
మరిన్ని క్రీడా వార్తల కోసం ఇక్కడ క్లిక్ చేయండి..