మార్కెట్‌లో సంచలనానికి శాంసంగ్ మరోసారి రెడీ..! ఈసారి కొత్త ప్రొడక్ట్‌తో..

స్మార్ట్ ఫోన్ల తర్వాత వేరబుల్స్ విభాగంలో మరో కీలక అడుగు పడింది. గూగుల్ సదస్సులో కొన్ని మోడళ్లను ప్రదర్శించిన శాంసంగ్, ఇప్పుడు పూర్తిగా గెలాక్సీ గ్లాసెస్ రూపంలో వినియోగదారులను ఆశ్చర్యపరచనుంది. తాజాగా ఇంటర్నెట్‌లో లీక్ అయిన యాప్ స్క్రీన్‌షాట్లు ఈ కొత్త గ్యాడ్జెట్ పనితీరుపై క్లారిటీ ఇచ్చాయి. స్టైలిష్ లుక్, అత్యాధునిక ఫీచర్లతో వస్తున్న ఈ స్మార్ట్ గ్లాసెస్ గురించి తెలుసుకుందాం.

గెలాక్సీ గ్లాసెస్ మేనేజర్

శాంసంగ్ తమ కొత్త స్మార్ట్ గ్లాసెస్‌ను సులభంగా కంట్రోల్ చేయడానికి ‘గెలాక్సీ గ్లాసెస్ మేనేజర్’ అనే ప్రత్యేక యాప్‌ను రూపొందించింది. ఈ యాప్ ద్వారా వినియోగదారులు తమ స్మార్ట్‌ఫోన్‌కు గ్లాసెస్‌ను కనెక్ట్ చేసుకోవచ్చు. గ్లాసెస్ నోస్ బ్రిడ్జ్ మీద ఉన్న ప్రొటెక్టివ్ ఫిలిమ్ తొలగించి, పవర్ స్విచ్ ఆన్ చేయాలి. అనంతరం గ్లాసెస్‌ను ఛార్జింగ్ కేస్‌లో ఉంచితే, బ్లూటూత్ ద్వారా ఫోన్‌తో కనెక్ట్ అవుతాయి. స్టైలిష్ బ్లాక్ కలర్ ఛార్జింగ్ కేస్‌తో వస్తున్న ఈ గ్లాసెస్, చూడటానికి చాలా ఆకర్షణీయంగా ఉన్నాయి. యాప్ ద్వారా సాఫ్ట్‌వేర్ అప్‌డేట్స్ పొందడం, ఫీచర్లను నియంత్రించడం చాలా సులభం.

అద్భుతమైన ఫీచర్లు

ఈ స్మార్ట్ గ్లాసెస్ One UI XR సాఫ్ట్‌వేర్‌పై పనిచేస్తాయని సమాచారం. వీటి ద్వారా తీసిన ఫోటోలు, వీడియోలను నేరుగా ఫోన్‌లోకి ఇంపోర్ట్ చేసుకోవచ్చు. అలాగే, గ్లాసెస్ ఎక్కడైనా పోతే వెతకడానికి ‘ఫైండ్ మై గ్లాసెస్’ అనే ఆప్షన్ కూడా ఇందులో ఉంది. జులై 22న లండన్‌లో జరగబోయే గెలాక్సీ అన్‌ప్యాక్డ్ ఈవెంట్‌లో శాంసంగ్ వీటిని అధికారికంగా లాంచ్ చేసే అవకాశం ఉంది. వార్బీ పార్కర్, జెంటిల్ మాన్‌స్టర్‌లతో కలిసి రూపొందించిన ఈ గ్లాసెస్, కేవలం టెక్ పరికరం మాత్రమే కాదు, ఒక ఫ్యాషన్ స్టేట్‌మెంట్‌గా కూడా నిలుస్తాయి. AI ఫీచర్లతో రానున్న ఈ స్మార్ట్ గ్లాసెస్ మార్కెట్లో ఎలాంటి సంచలనాలు సృష్టిస్తాయో వేచి చూడాలి. ఆధునిక కాలానికి తగ్గట్టుగా రూపొందించిన ఈ పరికరం, భవిష్యత్తులో మన దైనందిన జీవితంలో ఒక భాగంగా మారడం ఖాయంగా కనిపిస్తోంది. టెక్ ప్రియులు మరియు గ్యాడ్జెట్ లవర్స్ ఈ లాంచ్ కోసం ఎంతో ఆతృతగా ఎదురుచూస్తున్నారు.