పాలు విరిగిపోవడానికి ప్రధాన కారణం అందులో చేరే బ్యాక్టీరియా, అధిక వేడి. సరైన పాత్రలను ఎంచుకోవడం నుండి, మరిగించే పద్ధతి వరకు మనం చేసే చిన్న చిన్న మార్పులు పాలను ఎక్కువ కాలం నిల్వ ఉంచుతాయి. ఒకవేళ మీ ఇంట్లో ఫ్రిజ్ లేకపోతే, పాలను చల్లగా ఉంచడానికి ఐస్ ప్యాక్స్ లేదా చల్లని నీటి కుండలను ఎలా ఉపయోగించాలి? పాల నాణ్యతను కాపాడుకోవడానికి పాటించాల్సిన ఆ టిప్స్ ఏంటో చూసేయండి.
సరిగ్గా మరిగించడం : పాలు కొన్న వెంటనే అలాగే వదిలేయకుండా త్వరగా మరిగించాలి. అధిక ఉష్ణోగ్రత వద్ద మరిగించడం వల్ల అందులోని హానికర బ్యాక్టీరియా చనిపోతుంది. పాలు మరిగాక స్టవ్ ఆపి, చల్లబరిచిన తర్వాతే మూత పెట్టాలి.
పరిశుభ్రమైన పాత్రలు: పాలు పోసే గిన్నె పూర్తిగా పొడిగా, శుభ్రంగా ఉండాలి. ఇదివరకే వాడిన గిన్నెలో పాలు పోయకండి. అలాగే, పాలలో తడి చెంచాలు వేయడం లేదా చేతులు ముంచడం వల్ల బ్యాక్టీరియా వేగంగా చేరి పాలు పాడవుతాయి.
ఫ్రిజ్ లేని వారికి ‘వాటర్ బాత్’ చిట్కా: ఫ్రిజ్ అందుబాటులో లేకపోతే, ఒక పెద్ద వెడల్పాటి గిన్నెలో చల్లని నీటిని పోసి, ఆ నీటి మధ్యలో పాల గిన్నెను ఉంచండి. ఇది పాలను గది ఉష్ణోగ్రత కంటే తక్కువ వేడిలో ఉంచుతుంది. వీలైతే ఆ నీటిలో ఐస్ ముక్కలు వేయండి.
గాలి తగలకుండా మూత: పాలు మరిగించి చల్లారిన తర్వాత గాలి చొరబడకుండా గట్టిగా మూత పెట్టండి. దీనివల్ల వాతావరణంలోని బ్యాక్టీరియా పాలపై దాడి చేయదు.
ఫ్రిజ్ ఉన్నవారు ఇక్కడ పెట్టకండి: ఒకవేళ ఫ్రిజ్ ఉంటే, పాలను డోర్ షెల్ఫ్స్లో పెట్టకండి. ఫ్రిజ్ తలుపు మాటిమాటికీ తీయడం వల్ల అక్కడ ఉష్ణోగ్రత మారుతుంటుంది. పాలను ఎప్పుడూ మధ్యలో లేదా కింది షెల్ఫ్లో ఉంచడం వల్ల అవి ఎక్కువ సేపు తాజాగా ఉంటాయి.
వేసవిలో పాలను జాగ్రత్తగా చూసుకోవడం వల్ల వృధాను అరికట్టవచ్చు. పైన చెప్పిన చిన్న చిన్న జాగ్రత్తలు పాటిస్తే మీ పాలు విరగకుండా, తాజాగా ఉండి మీ టీ లేదా కాఫీ రుచిని రెట్టింపు చేస్తాయి.
చిన్న చిట్కా: పాలు మరిగించేటప్పుడు అందులో చిటికెడు వంట సోడా వేస్తే, అవి త్వరగా విరిగిపోకుండా ఉంటాయని పాతకాలం నాటి వారు చెబుతుంటారు. అయితే, పాలను ఎప్పటికప్పుడు మరిగించడం అన్నిటికంటే సురక్షితమైన పద్ధతి.