ఆంధ్రప్రదేశ్లో డబుల్ ఇంజన్ సర్కార్ అత్యంత ఉత్సాహంగా, జెట్ స్పీడ్తో ముందుకు వెళ్తోందని ముఖ్యమంత్రి నారా చంద్రబాబు నాయుడు స్పష్టం చేశారు. రాష్ట్ర క్యాడర్లో కనిపిస్తున్న జోష్ను బట్టి చూస్తే, ఏపీలో ఎన్డీయే (NDA) హవా రాబోయే కాలంలోనూ ఇలాగే కొనసాగుతుందని ఆయన ధీమా వ్యక్తం చేశారు. రానున్న పంచాయతీ ఎన్నికల్లో కూడా కార్యకర్తలు ఇదే ఉత్సాహాన్ని ప్రదర్శించాలని పిలుపునిచ్చారు. మహిళలు సైతం పంచాయతీ ఎన్నికలకు తాము పూర్తిగా సిద్ధంగా ఉన్నామని చెబుతున్నారని ఆయన పేర్కొన్నారు.
2024 ఎన్నికల సమయంలో ప్రజలకు ఇచ్చిన మాటకు కట్టుబడి అన్ని శాఖల్లోనూ మార్పులు తీసుకువచ్చామని సీఎం చంద్రబాబు తెలిపారు. నాటి గత ప్రభుత్వం రాష్ట్రాన్ని సర్వనాశనం చేసిందని, గత పాలనలో రోడ్లు పూర్తిగా దారుణంగా ఉండేవని, కనీసం బ్లీచింగ్ పౌడర్ కూడా దొరకని దుస్థితి ఉండేదని ఆయన తీవ్రంగా విమర్శించారు. గత ప్రభుత్వం చేసిన విధ్వంసం నుంచి రాష్ట్రాన్ని గాడిలో పెట్టేందుకు నిరంతరం కృషి చేస్తున్నామన్నారు.
ప్రస్తుతం తన సుదీర్ఘ అనుభవం, డిప్యూటీ సీఎం పవన్ కళ్యాణ్ హుషారు, కేంద్ర ప్రభుత్వ పూర్తి సహకారంతో రాష్ట్రాన్ని అభివృద్ధి పథంలో నడిపిస్తున్నామని చంద్రబాబు వెల్లడించారు. పంచాయతీ రాజ్ శాఖలో పవన్ కళ్యాణ్ ప్రత్యేక ముద్ర వేసి విప్లవాత్మక మార్పులు తెచ్చారని ప్రశంసించారు. పవన్ కళ్యాణ్ నాయకత్వంలో చేపట్టిన ‘పల్లె పండుగ’ కార్యక్రమం గ్రాండ్ సక్సెస్ అయిందని కొనియాడారు.
రాష్ట్రంలో ఏకంగా రూ.11 వేల కోట్లకు పైగా అభివృద్ధి పనులను ప్రారంభించుకున్నామని సీఎం తెలిపారు. ప్రజలు ఎన్డీయే కూటమికి వేసిన ప్రతి ఒక్క ఓటు కూడా వృథా కాలేదని, ప్రజలు తమపై ఉంచిన నమ్మకాన్ని వంద శాతం నిలబెట్టుకున్నామని ఆయన స్పష్టం చేశారు. ప్రజల ఆశీస్సులతో ప్రజా ప్రభుత్వం మరింత వేగంగా సంక్షేమ, అభివృద్ధి కార్యక్రమాలను అమలు చేస్తుందని చంద్రబాబు పేర్కొన్నారు.