మన వంటింట్లో పోపుల పెట్టెలో తప్పనిసరిగా ఉండే పదార్థం జీలకర్ర. కేవలం రుచి కోసమే కాకుండా అరుగుదల కోసం పూర్వం నుండి దీనిని వాడుతున్నాం. అయితే ఇటీవల బయోఇంటెలిజెన్స్, ఫ్రాంటియర్స్ ఇన్ న్యూట్రిషన్ నివేదికల ప్రకారం.. జీలకర్ర బరువు తగ్గడంలో కీలక పాత్ర పోషిస్తుందని తేలింది. రాత్రి భోజనం తర్వాత జీలకర్ర తీసుకోవడం వల్ల కలిగే ఆశ్చర్యకరమైన మార్పులేంటో ఇప్పుడు చూద్దాం.
జీలకర్రతో బరువు ఎలా తగ్గుతారు?
కేవలం జీలకర్ర తినడం వల్లే బరువు తగ్గిపోతారని అనుకోవడం పొరపాటే కానీ, ఇది బరువు తగ్గే ప్రక్రియను వేగవంతం చేస్తుందని పరిశోధనలు వెల్లడిస్తున్నాయి.
మెరుగైన జీర్ణక్రియ: జీలకర్ర తినడం వల్ల శరీరంలో జీర్ణ ఎంజైమ్లు ఉత్తేజితమవుతాయి. దీనివల్ల మనం తిన్న ఆహారం త్వరగా జీర్ణమై, శక్తిగా మారుతుంది. ఇది ఉబ్బరం మరియు గ్యాస్ వంటి సమస్యలను తగ్గిస్తుంది.
మెటబాలిజం బూస్టర్: జీలకర్రలోని కొన్ని సమ్మేళనాలు శరీరంలో పేరుకుపోయిన కొవ్వును, ముఖ్యంగా బెల్లీ ఫ్యాట్ను కరిగించడంలో ప్రభావవంతంగా పనిచేస్తాయి.
బ్లడ్ షుగర్ కంట్రోల్: భోజనం తర్వాత రక్తంలో ఇన్సులిన్ స్థాయిలు అకస్మాత్తుగా పెరగకుండా జీలకర్ర నియంత్రిస్తుంది. ఇన్సులిన్ అదుపులో ఉంటే శరీరంలో కొవ్వు నిల్వలు పెరగవు.
ఆకలిపై నియంత్రణ: రాత్రి పూట అనవసరంగా ఏదైనా తినాలనిపించే క్రేవింగ్స్ను జీలకర్ర తగ్గిస్తుంది. ఇది కడుపు నిండిన భావనను కలిగిస్తుంది.
ఎలా తీసుకోవాలి?
పరిశోధనల ప్రకారం.. జీలకర్రను రెండు రకాలుగా తీసుకోవచ్చు:
- రాత్రి భోజనం తర్వాత కొన్ని వేయించిన జీలకర్ర గింజలను నమలడం వల్ల మంచి ఫలితం ఉంటుంది.
- ఒక స్పూన్ జీలకర్రను నీటిలో మరిగించి లేదా రాత్రంతా నానబెట్టి, భోజనం తర్వాత ఆ నీటిని తాగవచ్చు.
జాగ్రత్తలు కూడా అవసరమే
జీలకర్ర ఆరోగ్యానికి మంచిదే అయినా, కొన్ని విషయాల్లో జాగ్రత్తగా ఉండాలని నిపుణులు హెచ్చరిస్తున్నారు..
- ఎక్కువ మొత్తంలో తీసుకోవడం వల్ల గుండెల్లో మంట లేదా రక్తంలో చక్కెర స్థాయిలు పడిపోయే ప్రమాదం ఉంది.
- గర్భవతులు తమ ఆహారంలో ఇలాంటి మార్పులు చేసే ముందు తప్పనిసరిగా డాక్టర్ను సంప్రదించాలి.
- డయాబెటిస్ లేదా బీపీ మందులు వాడే వారు కూడా వైద్య సలహా తీసుకోవడం ముఖ్యం.
బరువు తగ్గడానికి జీలకర్ర ఒక గొప్ప సహాయకారి మాత్రమే. కానీ అది పూర్తి పరిష్కారం కాదు. సరైన ఆహారం, క్రమం తప్పకుండా వ్యాయామంతో పాటు జీలకర్రను మీ జీవనశైలిలో భాగం చేసుకుంటే స్లిమ్గా మారడం ఖాయం.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..