నేటి డిజిటల్ యుగంలో ఇన్స్టాగ్రామ్ రీల్స్ చూడటం చాలామందికి వ్యసనంగా మారింది. గంటల తరబడి నిరంతరం రీల్స్ స్క్రోల్ చేయడం వల్ల శారీరక, మానసిక ఆరోగ్యం తీవ్రంగా దెబ్బతింటుంది. అంతేకాకుండా, వ్యాయామం లేకుండా గంటల తరబడి ఒకే చోట కూర్చోవడం వల్ల శరీర బరువు పెరగడం, మెడ, వెన్నునొప్పులు వస్తాయి. ఈ అలవాటును అదుపులో ఉంచుకోవడం ఆరోగ్యానికి ఎంతో ముఖ్యం. నిపుణులు ఏం చెబుతున్నారో ఇప్పుడు చూద్దాం..
కంటి సమస్యలు, కంటిపై తీవ్రమైన ఒత్తిడి:
నిరంతరం నిలువుగా ఉండే మొబైల్ స్క్రీన్ను చూడటం వల్ల కంటి రెప్పలు మూయడం తగ్గిపోతుంది. దీనివల్ల కళ్లు పొడిబారడం, కళ్లలో మంటలు, నీరు కారడం, చూపు మందగించడం వంటి సమస్యలు ఏర్పడతాయి. బ్లూ లైట్ ప్రభావం వల్ల తీవ్రమైన తలనొప్పి వస్తుంది.
మానసిక ఒత్తిడి,నిద్రలేమి:
రాత్రి పడుకునే ముందు రీల్స్ చూడటం వల్ల మెదడులో మెలటోనిన్ అనే నిద్రను ప్రేరేపించే హార్మోన్ ఉత్పత్తి తగ్గిపోతుంది. ఫలితంగా తీవ్రమైన నిద్రలేమి సమస్య ఎదురవుతుంది. క్రమంగా ఇది మానసిక ఆందోళన, ఒత్తిడి డిప్రెషన్కు దారితీస్తుంది.
ఏకాగ్రత లోపించడం, జ్ఞాపకశక్తి తగ్గడం:
ప్రతి కొన్ని సెకన్లకు కొత్త రీల్ మార్చడం వల్ల మెదడు యొక్క దృష్టి నిలిపే సమయం బాగా తగ్గిపోతుంది. దీర్ఘకాలికంగా ఒకే పనిపై శ్రద్ధ పెట్టడం సాధ్యపడదు. ముఖ్యంగా విద్యార్థులలో జ్ఞాపకశక్తి మందగించి, చదువుపై ఏకాగ్రత దెబ్బతింటుంది.
శారీరక సమస్యలు, బరువు పెరగడం:
గంటల తరబడి ఒకే భంగిమలో వంగి కూర్చుని లేదా పడుకుని ఫోన్ చూడటం వల్ల టెక్స్ట్ నెక్ సమస్య వచ్చి మెడ, నడుము మరియు భుజాల నొప్పులు వస్తాయి. వ్యాయామం లేకుండా ఒకే చోట కూర్చోవడం వల్ల శరీరంలో కొవ్వు పెరిగి ఊబకాయం వస్తుంది.
ఈ సమస్య నుండి బయటపడే మార్గాలు:
రోజువారీ స్క్రీన్ టైమ్పై పరిమితి విధించుకోండి. రాత్రి పడుకోవడానికి గంట ముందు ఫోన్ను పక్కన పెట్టండి. ప్రతి 20 నిమిషాలకు ఒకసారి 20 సెకన్ల పాటు 20 అడుగుల దూరంలో ఉన్న వస్తువును చూడటం అలవాటు చేసుకోండి. డిజిటల్ వినోదం పరిమితిలో ఉన్నంతవరకే మంచిది. అతిగా రీల్స్ చూడటం మాని శారీరక ఆరోగ్యానికి ప్రాధాన్యత ఇవ్వడం అవసరం.