India-Pakistan: తీవ్ర ఉద్రిక్తతలు, సైనిక ఘర్షణల అనంతరం దాయాది దేశం పాకిస్థాన్ రాజధాని ఇస్లామాబాద్లో అనూహ్య పరిణామం చోటుచేసుకుంది. పరస్పర వైరం కొనసాగుతున్న వేళ, ఒకే టేబుల్పై ఎదురెదురుగా కూర్చుని భారత్-పాకిస్థాన్ అధికారులు సమావేశమయ్యారు. 2025లో భారత సైన్యం చేపట్టిన ‘ఆపరేషన్ సింధూర్’తో సరిహద్దు ఆవల ఉన్న ఉగ్రవాద శిబిరాలను భారత్ నేలమట్టం చేసిన సంగతి తెలిసిందే. ఆ కీలక సైనిక చర్య, తీవ్ర ఘర్షణల తర్వాత ఒక భారతీయ అధికారిక ప్రతినిధి బృందం పాక్ గడ్డపై అడుగుపెట్టడం ఇదే మొదటిసారి కావడంతో ఈ భేటీ అంతర్జాతీయంగా తీవ్ర ఆసక్తి రేకెత్తిస్తోంది.
షాంఘై సహకార సంస్థ (SCO) నేషనల్ కోఆర్డినేటర్ల సమావేశం నిమిత్తం భారత బృందం ఇస్లామాబాద్ చేరుకుంది. భారత తరఫున ఎస్సీవో నేషనల్ కోఆర్డినేటర్ అలోక్ దిమ్రీ ఈ బృందానికి నేతృత్వం వహిస్తుండగా, పాకిస్థాన్ ప్రతినిధి మహమ్మద్ ఫైసల్ ఈ సమావేశానికి అధ్యక్షత వహిస్తున్నారు. సెప్టెంబర్ 28 నుంచి 30 వరకు మూడు రోజుల పాటు సాగే ఈ ఉన్నత స్థాయి సమావేశంలో భారత్, పాకిస్థాన్లతో పాటు రష్యా, చైనా, ఇరాన్, బెలారస్ సహా సభ్య దేశాల ప్రతినిధులు పాల్గొంటున్నారు. ఎస్సీవో హెడ్స్ ఆఫ్ స్టేట్ కౌన్సిల్ అధ్యక్ష బాధ్యతలను ప్రస్తుతం పాకిస్థాన్ (2026-27 కాలానికి) నిర్వహిస్తోంది. వచ్చే ఏడాది (2027 ఆగస్టు)లో ఇస్లామాబాద్లోనే ఎస్సీవో దేశాధినేతల శిఖరాగ్ర సదస్సు జరగాల్సి ఉంది. ఆ భారీ అంతర్జాతీయ సదస్సు సన్నాహకాలు, కూటమి ఎజెండా, వివిధ దేశాల మధ్య సమన్వయంపై ఈ కోఆర్డినేటర్ల భేటీలో చర్చిస్తున్నారు.
గతంలో అక్టోబర్ 2024లో భారత విదేశాంగ మంత్రి ఎస్.జైశంకర్ ఎస్సీవో సమావేశం నిమిత్తం ఇస్లామాబాద్ వెళ్లినప్పటికీ, ఆ తర్వాత చోటుచేసుకున్న తీవ్ర ఉద్రిక్తతలు, ఆపరేషన్ సింధూర్ చర్యలతో ఇరు దేశాల సంబంధాలు పూర్తిగా క్షీణించాయి. ద్వైపాక్షిక చర్చలు లేనప్పటికీ, అంతర్జాతీయ బహుపాక్షిక వేదికలపై భారత్ తన వ్యూహాత్మక ప్రయోజనాలను కాపాడుకుంటూనే తన గళాన్ని వినిపించేందుకే పాక్ భూభాగంలో ఈ కీలక సదస్సుకు హాజరైనట్లు విశ్లేషకులు స్పష్టం చేస్తున్నారు.