ఆంధ్రప్రదేశ్ ట్రాఫిక్ ఈ-చలానాల నిధుల మళ్లింపు వ్యవహారంలో సుప్రీంకోర్టు వెలువరించిన తాజా ఆదేశాలు రాష్ట్రవ్యాప్తంగా సంచలనం సృష్టిస్తున్నాయి. ప్రభుత్వ ఒప్పందాలను అడ్డం పెట్టుకుని ప్రైవేట్ సంస్థలు ఏ విధంగా అక్రమాలకు పాల్పడుతున్నాయనే అంశాన్ని ఈ కేసు మరోసారి తెరపైకి తెచ్చింది.
ఆంధ్రప్రదేశ్ రాష్ట్రంలో ట్రాఫిక్ నిబంధనలు ఉల్లంఘించిన వారి నుంచి ఈ-చలానాల రూపంలో జరిమానాలు వసూలు చేసే బాధ్యతను గతంలో ‘డేటా ఎవాల్వ్’ (Data Evolve) అనే సంస్థకు అప్పగించారు. ఈ సంస్థ ప్రముఖంగా ‘డిజియాత్ర’ యాప్ను రూపొందించిన సంస్థగా గుర్తింపు పొందింది. ఏపీ ప్రభుత్వంతో ఈ సంస్థకు 2018 నుంచి 2021 వరకు మూడేళ్ల పాటు ఒప్పందం ఉంది. అయితే, ఈ ఒప్పందం ముగిసిన తర్వాత కూడా సదరు సంస్థ అక్రమంగా చలాన్ల వసూళ్లు కొనసాగించిందని ప్రభుత్వం ఆరోపిస్తోంది.
సుప్రీంకోర్టులో విచారణ..
రాష్ట్ర ప్రభుత్వం దాఖలు చేసిన పిటిషన్ ప్రకారం, ‘డేటా ఎవాల్వ్’ సంస్థ సుమారు రూ.37 కోట్ల చలాన్ల నిధులను ప్రభుత్వ ఖజానాకు జమ చేయకుండా తమ సొంత ఖాతాలకు మళ్లించుకుంది. ఆర్బిట్రేషన్ ప్రక్రియలో గతంలో ఈ సంస్థకు అనుకూలంగా వచ్చిన ఆదేశాలపై ప్రభుత్వం సుప్రీంకోర్టును ఆశ్రయించింది. విచారణ చేపట్టిన అత్యున్నత న్యాయస్థానం ఆర్బిట్రేషన్ ఆదేశాలపై స్టే విధిస్తూ ఉత్తర్వులు జారీ చేసింది.
నిధుల మళ్లింపు ఆరోపణలపై వివరణ ఇవ్వాలని డేటా ఎవాల్వ్ సంస్థకు నోటీసులు పంపింది. తదుపరి పూర్తిస్థాయి విచారణను మే 25వ తేదీకి వాయిదా వేసింది. సాధారణంగా ప్రభుత్వ సేవలకు సంబంధించిన నిధులు ‘ఎస్క్రో’ ఖాతాల ద్వారా ప్రభుత్వ ఖజానాకు చేరాలి. కానీ, ఈ కేసులో సాంకేతిక లొసుగులను వాడుకుని ప్రైవేట్ సంస్థ నేరుగా ప్రజల సొమ్మును దారి మళ్లించినట్లు ప్రాథమిక ఆధారాలు లభించాయి.