Hantavirus: ప్రపంచాన్ని కలవరపెడుతున్న కొత్త వైరస్.. ఒకే కుటుంబంలో ముగ్గురు మృతి!
Hantavirus: ప్రపంచంలోకి మరో కొత్త వైరస్ ఎంట్రీ ఇచ్చింది. వెనుజువెలా దేశంలోని తూర్పు రాష్ట్రమైన అంజోటెగుయ్లో హంటావైరస్ ఇన్ఫెక్షన్ వల్ల ఒకే కుటుంబానికి చెందిన ముగ్గురు వ్యక్తులు మరణించినట్లు ఆ దేశ ఆరోగ్య మంత్రిత్వ శాఖ ధృవీకరించింది. దీనికి తోడు నైరుతి రాష్ట్రమైన బారీనాస్లో ఇద్దరు ఆరోగ్య కార్యకర్తల అనుమానాస్పద మరణాలపై విచారణ జరుగుతోంది. అయితే ఈ ఘటనల వల్ల సాధారణ ప్రజలకు ఎలాంటి ప్రమాదం లేదని, ఇవి విడివిడిగా జరిగిన సంఘటనలేనని అధికారులు తెలిపారు. అలాగే ఒకరి నుంచి మరొకరికి ఈ వైరస్ వ్యాపించినట్లు ఆధారాలు ఏవీ లభించలేదని స్పష్టం చేశారు.
హంటావైరస్ ఎలా వ్యాపిస్తుంది?
హంటావైరస్ అనేది ప్రధానంగా ఎలుకలు, పెంపుడు ఎలుకలు (rodents) ద్వారా వ్యాపించే ఒక అరుదైన వ్యాధి. సాధారణంగా మానవుల మధ్య ఇది వ్యాప్తి చెందడం చాలా అరుదు. తీవ్రమైన సందర్భాల్లో ఈ వైరస్ ఊపిరితిత్తుల ఇన్ఫెక్షన్ (Hantavirus Pulmonary Syndrome) లేదా మూత్రపిండాల వైఫల్యానికి దారితీసి ప్రాణాంతకంగా మారుతుంది.
ఇతర దేశాల్లోనూ కలకలం..
అత్యంత అరుదైన సందర్భాల్లో మనుషుల మధ్య కూడా వ్యాపించే ‘ఆండీస్ హంటావైరస్’ (Andes hantavirus) ఇటీవల ‘ఎమ్వి హోండియస్’ అనే క్రూయిజ్ షిప్లో ముగ్గురు ప్రయాణికుల మరణానికి కారణమై ప్రపంచవ్యాప్తంగా ఆందోళన రేకెత్తించింది. ఈ వైరస్ మరణాల రేటు దాదాపు 30% వరకు ఉండటం, దీనికి నిర్దిష్ట టీకా లేదా చికిత్స లేకపోవడం ప్రధాన ఆందోళనగా మారింది. అర్జెంటీనాలోని ఉషువాయా, మెండోజా వంటి ప్రాంతాల్లో ఈ వైరస్ మూలాల కోసం శాస్త్రవేత్తలు, సీడీసీ (CDC) బృందాలు గాలించినప్పటికీ అక్కడ ఎలుకలలో ఎలాంటి హంటావైరస్ ఆవాసాలు లభించలేదు.
