దర్శకుడు హను రాఘవపూడి నటుడు జూనియర్ ఎన్టీఆర్ పై తన ప్రశంసలను కురిపించారు. జూనియర్ ఎన్టీఆర్ ను “సునామీ” వంటి నటుడు అని అన్నారు. ఆయనతో ఇప్పటివరకు సినిమా చేయకపోవడానికి ప్రధాన కారణం సరైన కథ కుదరకపోవడమేనని వెల్లడించారు. జూనియర్ ఎన్టీఆర్ తో కలిసి పనిచేయాలని తనకు చాలా ఆసక్తి ఉందని, ఆయనతో అప్పుడప్పుడూ కలుస్తూ ఉంటానని తెలిపారు. ఇప్పటివరకు కథ చర్చల దశకు రాలేదని పేర్కొన్నారు.
ప్రస్తుతం జూనియర్ ఎన్టీఆర్ ఎంతో బిజీగా ఉన్నారని కూడా హను తెలిపారు. సీతారామం సినిమా విజయవంతమైన తర్వాత జూనియర్ ఎన్టీఆర్ అభిమానుల్లో తమ కాంబినేషన్ పై ఆసక్తి విపరీతంగా పెరిగిందని హను రాఘవపూడి అంగీకరించారు. “హను గారు స్టేట్మెంట్లు ఇస్తాడు కానీ మా హీరోకి కథ చెప్పడండి” అని అభిమానులు తనను ప్రశ్నించినట్లు చెప్పారు.
జూనియర్ ఎన్టీఆర్ వంటి గొప్ప నటుడి కోసం ఎలాంటి కథను ఎంచుకోవాలని అడిగినప్పుడు, “ఆయన ఇలాంటిది అని అనుకోవడానికి ఆయన ఏమైనా చిన్న యాక్టర్ ఆ అండి” అంటూ ఆయన స్థాయిని ప్రశంసించారు. జూనియర్ ఎన్టీఆర్ ఒక నటుడిగా పూర్తి భిన్నమైన స్థాయిలో ఉన్నారని, ఆయన సామర్థ్యం భౌతికం లేదా స్టార్ డమ్ కు సంబంధించినది కాదని స్పష్టం చేశారు.
జూనియర్ ఎన్టీఆర్ ఆయన ఏ పాత్రలోనైనా, ఏ కథలోనైనా ఒదిగిపోగలరని పేర్కొన్నారు. “ఆయన చేయలేని పాత్ర అంటే ఏముంది? ఆయన చేయలేని కథ ఏంటి అసలు?” అని ప్రశ్నించారు. పురాణం, జానపదం, యాక్షన్, వినోదం, కామెడీ వంటి అన్ని రకాల పాత్రలను చేయగలడని అన్నారు. దివంగత నటుడు ఎన్టీ రామారావు గారికి ఎన్ని అంశాలు ఉన్నాయో అన్నీ జూనియర్ ఎన్టీఆర్ లో ఉన్నాయని హను రాఘవపూడి సిన్సియర్ గా నమ్ముతున్నట్లు తెలిపారు.
అద్భుతమైన సమతుల్యతతో డైలాగులను చెప్పగలిగే అతి తక్కువ మంది హీరోలలో జూనియర్ ఎన్టీఆర్ ఒకరని ప్రశంసించారు. వేటూరి కూడా జూనియర్ ఎన్టీఆర్ ఫోనెటిక్స్ బాగా పలుకుతాడని చెప్పేవారని గుర్తు చేసుకున్నారు. తనకు జూనియర్ ఎన్టీఆర్ తో చేయాలనిపించిన కథలు, ఆలోచనలు చాలా ఉన్నాయని, అయితే అవి కేవలం ఆలోచనల దశలోనే ఉన్నాయని, పూర్తి స్క్రిప్ట్ గా మారలేదని హను రాఘవపూడి వెల్లడించారు. ప్రస్తుతానికి వాటిని ఇంకా ఆలోచించలేదని పేర్కొన్నారు.