Morning Habit: ఉదయం కళ్లు తెరిచిన వెంటనే చాలా మంది చేసే మొదటి పని మొబైల్ ఫోన్ తీసుకోవడమే. అలారం ఆపిన వెంటనే వాట్సాప్ సందేశాలు, సోషల్ మీడియా నోటిఫికేషన్లు, వార్తలు, వీడియోలు చూడటం ఇప్పుడు సాధారణ అలవాటుగా మారిపోయింది. కొందరికి అయితే మంచం మీద నుంచి లేవకముందే ఫోన్ చూడడం రోజువారీ కార్యక్రమంలో భాగమైపోయింది. అయితే ఈ చిన్న అలవాటు రోజంతా మన మానసిక స్థితి, ఏకాగ్రతపై ప్రభావం చూపే అవకాశం ఉందని డాక్టర్లు చెబుతున్నారు.
నిద్రలేచిన వెంటనే మన మెదడు పూర్తిగా చురుకుగా ఉండదు. నిద్ర నుంచి మేల్కొనే ప్రక్రియకు కొంత సమయం అవసరం. ఈ సమయంలో ఒక్కసారిగా వందలాది సమాచారం కళ్ల ముందు కనిపిస్తే మెదడు ఒత్తిడికి గురయ్యే అవకాశం ఉంటుంది. ముఖ్యంగా పనికి సంబంధించిన సందేశాలు, ప్రతికూల వార్తలు కొంతమందిలో ఆందోళనను పెంచవచ్చు. దీంతో రోజు ప్రారంభం కాకముందే మనసు ఒత్తిడికి లోనయ్యే పరిస్థితి ఏర్పడుతుంది.
మరో ఆసక్తికరమైన విషయం ఏమిటంటే, చాలామంది ఫోన్ను ఐదు నిమిషాల కోసం మాత్రమే చూస్తామని అనుకుంటారు. కానీ ఒక నోటిఫికేషన్ నుంచి మరో నోటిఫికేషన్, ఒక వీడియో నుంచి మరో వీడియోకి వెళ్లడం వల్ల తెలియకుండానే 20 నుంచి 30 నిమిషాలు గడిచిపోతాయి. ఫలితంగా ఉదయం చేయాల్సిన ముఖ్యమైన పనులు ఆలస్యమవుతాయి. కొందరు వ్యాయామాన్ని వాయిదా వేస్తారు. మరికొందరు అల్పాహారాన్ని కూడా నిర్లక్ష్యం చేస్తారు. అంతేకాదు ఫోన్ ను ముందుగా చూడటం వల్ల మీ రోజువారి కార్యక్రమాలు కూడా దెబ్బతినే అవకాశం ఉంటుంది.
సోషల్ మీడియా ప్రభావం కూడా ఇక్కడ కీలకంగా ఉంటుంది. ఇతరుల విజయాలు, విలాసవంతమైన జీవనశైలిని చూస్తూ మీ రోజు మొదలైతే, దాని ప్రభావం మీకు తెలీకుండానే మీ మైండ్ పై పడుతుంది. ఇది ఒకరకంగా ఆత్మవిశ్వాసాన్ని ప్రభావితం చేసే అవకాశం ఉందని మానసిక ఆరోగ్య నిపుణులు చెబుతున్నారు. ముఖ్యంగా యువతలో ఈ ప్రభావం ఎక్కువగా కనిపిస్తుందని పలువురు పరిశోధకులు అభిప్రాయపడుతున్నారు. అందుకే చాలామంది నిపుణులు నిద్రలేచిన తర్వాత కనీసం 20 నుంచి 30 నిమిషాల వరకు ఫోన్కు దూరంగా ఉండాలని సూచిస్తున్నారు. ఆ సమయాన్ని నీరు తాగడానికి, కొద్దిసేపు నడవడానికి, ధ్యానం చేయడానికి లేదా రోజువారీ పనులను ప్రణాళిక చేసుకోవడానికి ఉపయోగించవచ్చు. ఇలా చేయడం వల్ల రోజు ప్రశాంతంగా ప్రారంభమయ్యే అవకాశం ఉంటుంది.
ఫోన్ను పూర్తిగా దూరం పెట్టడం ఈ కాలంలో సాధ్యం కాకపోవచ్చు. కానీ దానిని ఎప్పుడు ఉపయోగించాలి, ఎంతసేపు ఉపయోగించాలి అనేది మన చేతుల్లోనే ఉంటుంది. నిద్రలేవగానే ఫోన్ చూడటం చిన్న అలవాటులా కనిపించినా, అది రోజంతా మన ఆలోచనలు, మూడ్, పనితీరుపై ప్రభావం చూపే అవకాశం ఉంది. అందుకే ఉదయం లేచిన వెంటనే సమయం ఫోన్కు కాకుండా మనకోసం కేటాయించడం మంచిదని నిపుణులు సూచిస్తున్నారు.