CM Revanth Reddy: తెలంగాణ రాజధాని హైదరాబాద్ గ్లోబల్ ఇన్వెస్ట్మెంట్స్కు తిరుగులేని అడ్డాగా మారుతోంది. ప్రపంచవ్యాప్తంగా పేరెన్నికగన్న బహుళజాతి సంస్థలు భాగ్యనగరంలో తమ కార్యకలాపాలను విస్తరించేందుకు పోటీ పడుతున్నాయి. ఈ క్రమంలో రాష్ట్ర ప్రభుత్వం నిర్దేశించుకున్న భారీ లక్ష్యాన్ని నిర్దేశిత గడువు కంటే ముందే ఛేదించి సరికొత్త రికార్డు సృష్టించినట్లు ముఖ్యమంత్రి రేవంత్ రెడ్డి అధికారికంగా ప్రకటించారు. ఈ ఏడాది హైదరాబాద్లో 100 సరికొత్త గ్లోబల్ క్యాపబిలిటీ సెంటర్ల (GCC) ఏర్పాటును టార్గెట్గా పెట్టుకోగా, ఆ మైలురాయిని గడువు కంటే ముందే పూర్తి చేయడం ఇప్పుడు జాతీయ స్థాయిలో హాట్ టాపిక్గా మారింది. రాష్ట్రంలో అమలవుతున్న పారదర్శక పాలన, శరవేగంగా తీసుకుంటున్న నిర్ణయాలే ఈ స్థాయి అంతర్జాతీయ పెట్టుబడుల వెల్లువకు కారణమని సీఎం రేవంత్ రెడ్డి స్పష్టం చేశారు. వినోదం, ఫార్మా, ఎఫ్ఎంసీజీ రంగాల అగ్రగామి సంస్థలైన నెట్ఫ్లిక్స్, వార్నర్ బ్రదర్స్, ఆమ్జెన్, యూనిలీవర్ వంటి ప్రముఖ అంతర్జాతీయ బ్రాండ్లు భాగ్యనగరాన్ని తమ కీలక కేంద్రంగా ఎంచుకున్నాయని వెల్లడించారు. అంతర్జాతీయ దిగ్గజ సంస్థల ఎంట్రీతో భాగ్యనగరం ప్రపంచ స్థాయి వాణిజ్య, సాంకేతిక హబ్గా అవతరించిందని పేర్కొన్నారు.
తెలంగాణను మరింత ఉన్నత స్థాయికి తీసుకెళ్లేందుకు ప్రతిష్టాత్మకంగా చేపడుతున్న ‘భారత్ ఫ్యూచర్ సిటీ’ ద్వారా అంతర్జాతీయ ప్రమాణాలతో కూడిన పారిశ్రామిక వ్యవస్థకు రూపకల్పన చేస్తున్నట్లు సీఎం తెలిపారు. ప్రపంచ స్థాయి మౌలిక వసతులు, ఆధునిక సాంకేతిక వనరులతో నిర్మిస్తున్న ఈ సిటీ గ్లోబల్ ఇన్వెస్టర్లకు ప్రధాన ఆకర్షణగా నిలవనుందని వివరించారు. విదేశీ పెట్టుబడులు, తెలంగాణలోని స్థానిక నైపుణ్యాల అద్భుత కలయికతో దేశ ఆర్థిక ప్రగతిని రాష్ట్రం ముందుండి నడిపిస్తోందని సీఎం రేవంత్ రెడ్డి గర్వంగా ప్రకటించారు. పెట్టుబడుల ఆకర్షణలో తెలంగాణ సరికొత్త బెంచ్మార్క్ సృష్టిస్తోందని సీఎం చేసిన ఈ ట్వీట్ ప్రస్తుతం సోషల్ మీడియా, పారిశ్రామిక వర్గాల్లో ట్రెండ్ అవుతోంది.
I appreciate @Bloomberg for highlighting the momentum we are building here in Hyderabad, Telangana.
Transformation on this scale is the direct result of purposeful governance and decisive execution. Over the past two years, our administration has brought in dozens of…
— Revanth Reddy (@revanth_anumula) September 21, 2026