Abhishek Sharma Breaks Chris Gayle Record: టీ20 క్రికెట్ అంటేనే బంతిని బాదడం. బ్యాటర్లు తమ దూకుడు, భారీ షాట్లతో ప్రేక్షకులను అలరిస్తుంటారు. పొట్టి ఫార్మాట్లో 50, 100 పరుగులు చేయడమే గొప్ప విషయం. అలాంటిది 130కు పైగా స్కోర్లు నమోదు చేయడం అంటే మామూలు విషయం కాదు. ఎంతో దూకుడు, ప్రతిభ ఉంటేనే ఇది సాధ్యమవుతుంది. ఈ జాబితాలో కొద్ది మంది స్టార్ బ్యాటర్లు మాత్రమే చోటు దక్కించుకున్నారు. అందులో యువ ఆటగాడు అభిషేక్ శర్మ ఉండడం, అందులోనూ టాప్లో ఉండడం విశేషం.
టీ20 ఫార్మాట్లో అత్యధికసార్లు 130+ స్కోర్లు నమోదు చేసిన బ్యాటర్గా సన్రైజర్స్ హైదరాబాద్ ఓపెనర్ అభిషేక్ శర్మ నిలిచాడు. ఐపీఎల్ 2026లో భాగంగా మంగళవారం ఉప్పల్ స్టేడియంలో ఢిల్లీ క్యాపిటల్స్తో జరిగిన మ్యాచ్లో అభిషేక్ (135 నాటౌట్; 68 బంతుల్లో 10×4, 10×6) మెరుపు ఇన్నింగ్స్ ఆడడంతో ఈ రికార్డు ఖాతాలో వేసుకున్నాడు. ఇప్పటివరకు టీ20ల్లో నాలుగు సార్లు 130కి పైగా పరుగులు చేశాడు. అభి దూకుడైన బ్యాటింగ్, పవర్ హిట్టింగ్, టైమింగ్.. ఇలా అన్ని కలిసి అతడిని ప్రత్యేక ఆటగాడిగా నిలబెట్టాయి. ఐపీఎల్ 2026లో అతడి ఫామ్ చూస్తే ఈ సంఖ్య పెరగడం ఖాయం అనిపిస్తోంది.
టీ20 ఫార్మాట్లో అత్యధికసార్లు 130+ స్కోర్లు నమోదు చేసిన బ్యాటర్గా ఇప్పటివరకు యూనివర్సల్ బాస్, వెస్టిండీస్ దిగ్గజం క్రిస్ గేల్ ఉన్నాడు. గేల్ మూడు సార్లు 130+ స్కోర్లు నమోదు చేశాడు. తాజాగా ఇన్నింగ్స్తో గేల్ రికార్డును అభిషేక్ శర్మ బ్రేక్ చేశాడు. ఆసీస్ మాజీ కెప్టెన్ ఆరోన్ ఫించ్ కూడా మూడు సార్లు 130+ స్కోర్ చేశాడు. ఫించ్ తన ఆగ్రెసివ్ స్ట్రోక్ ప్లేకు ప్రసిద్ధి కాగా.. గేల్ తన విధ్వంసకర బ్యాటింగ్తో టీ20లకు కొత్త నిర్వచనం ఇచ్చాడు. ఇప్పుడు అభిషేక్ డేంజరస్ హిట్టర్గా బౌలర్లను బెంబేలెత్తిస్తున్నాడు. ఐపీఎల్ కారణంగా భవిష్యత్తులో ఈ జాబితాలో మరిన్ని పేర్లు చేరినా ఆశ్చర్యపోనక్కర్లేదు.