Ind vs Aus: భారత అండర్-19 క్రికెట్ జట్టు ఆస్ట్రేలియా యువ జట్టుతో జరిగిన మూడు మ్యాచ్ల వన్డే సిరీస్ను అద్భుతమైన రీతిలో కైవసం చేసుకుంది. రాజ్కోట్లోని నిరంజన్ షా స్టేడియంలో జరిగిన మూడో, చివరి వన్డే మ్యాచ్లోనూ భారత్ 6 వికెట్ల తేడాతో ఘన విజయం సాధించింది. ఈ విజయంతో మూడు మ్యాచ్ల సిరీస్ను భారత్ 3-0 తేడాతో క్లీన్స్వీప్ చేసి ఆస్ట్రేలియాపై తన ఆధిపత్యాన్ని మరోసారి చాటుకుంది. అంతకుముందు జరిగిన తొలి మ్యాచ్లో 7 పరుగుల తేడాతో, రెండో మ్యాచ్లో 103 పరుగుల భారీ తేడాతో భారత్ విజయం సాధించిన విషయం తెలిసిందే.
పోరాడిన ఆస్ట్రేలియా అండర్-19 జట్టు
ఈ మ్యాచ్లో టాస్ గెలిచి ముందుగా బ్యాటింగ్ ఎంచుకున్న ఆస్ట్రేలియా అండర్-19 జట్టు నిర్ణీత 49.3 ఓవర్లలో 254 పరుగులకు ఆలౌట్ అయింది. ఆసీస్ ఓపెనర్ జెడ్ హాలిక్ అద్భుతంగా ఆడి 88 బంతుల్లో 87 పరుగులు చేసి జట్టును ఆదుకున్నాడు. ఆయనతో పాటు నీల్ పటేల్ (51 పరుగులు), బ్లేక్ కేటిల్ (38 పరుగులు) రాణించడంతో ఆస్ట్రేలియా జట్టు సవాల్ విసిరే స్కోరును సాధించగలిగింది. భారత బౌలర్లలో మోహిత్ ఉల్వా, మనల్ చౌహాన్ అత్యద్భుతంగా బౌలింగ్ చేసి చెరో 3 వికెట్లు పడగొట్టగా, కావ్య పటేల్, ఆర్యన్ సవసాని తలా ఒక వికెట్ దక్కించుకున్నారు.
కెప్టెన్ లక్ష్య రాయ్చందాని సెంచరీ
ఆస్ట్రేలియా నిర్దేశించిన 255 పరుగుల లక్ష్యంతో బరిలోకి దిగిన భారత అండర్-19 జట్టు ప్రశాంతంగా లక్ష్యం వైపు అడుగులు వేసింది. కెప్టెన్ లక్ష్య రాయ్చందాని అద్భుతమైన ఇన్నింగ్స్తో జట్టును విజయతీరాలకు చేర్చాడు. ఆర్యవీర్ సెహ్వాగ్ తో (34 పరుగులు) కలిసి ఇన్నింగ్స్ ప్రారంభించిన లక్ష్య, ఆ తర్వాత కుషాగ్ర ఓజా (45 పరుగులు)తో కలిసి కీలక భాగస్వామ్యాలు నెలకొల్పాడు. ప్రత్యర్థి బౌలర్లను సమర్థవంతంగా ఎదుర్కొంటూ భారత్ను విజయానికి చేరువ చేశారు.
భారత యువ జట్టుకు అఖండ విజయం
ఒక దశలో భారత్ కొన్ని వికెట్లు కోల్పోయినా, కెప్టెన్ లక్ష్య రాయ్చందాని మాత్రం ఒత్తిడికి లోనవకుండా అద్భుతమైన బ్యాటింగ్ను కొనసాగించారు. లక్ష్య 106 బంతుల్లో 3 సిక్సర్లు, 9 ఫోర్ల సహాయంతో అజేయంగా 110 పరుగులు సాధించి జట్టును గెలిపించారు. ఆయనకు తోడుగా రజత్ బఘేల్ కూడా కేవలం 34 బంతుల్లో 7 బౌండరీలతో 44 పరుగులు చేసి నాటౌట్గా నిలిచారు. దీంతో భారత జట్టు 41.2 ఓవర్లలోనే కేవలం 4 వికెట్లు కోల్పోయి 255 పరుగులు చేసి సులభంగా విజయాన్ని అందుకుంది. ఈ విజయంతో భారత యువ ఆటగాళ్లు సర్వత్రా ప్రశంసలు అందుకుంటున్నారు.
మరిన్ని క్రికెట్ వార్తల కోసం ఇక్కడ క్లిక్ చేయండి..