ప్రస్తుత ఆధునిక కాలంలో యుక్తవయస్సులో ఉన్న పిల్లలు (అడోలెసెంట్స్ – Adolescents) తీవ్రమైన ఆరోగ్య సవాళ్లను ఎదుర్కొంటున్నారని దేశంలోనే ప్రతిష్టాత్మక వైద్య సంస్థ ఆల్ ఇండియా ఇన్స్టిట్యూట్ ఆఫ్ మెడికల్ సైన్సెస్ (AIIMS) వైద్య నిపుణులు హెచ్చరించారు. ముఖ్యంగా టీనేజ్ వయసున్న బాలికలు, యువతులలో ఊబకాయం (Obesity), పిసిఓఎస్ (PCOS – పాలీసిస్టిక్ ఓవరీ సిండ్రోమ్) కేసులు విపరీతంగా పెరుగుతున్నాయని వారు ఆందోళన వ్యక్తం చేశారు. ఈ పరిస్థితి ఇలాగే కొనసాగితే భవిష్యత్తులో చిన్న వయసులోనే మధుమేహం (షుగర్), గుండె జబ్బులు, థైరాయిడ్ వంటి సమస్యల బారిన పడే ప్రమాదం ఉందని వైద్యులు స్పష్టం చేశారు.
ఎయిమ్స్ నిర్వహించిన ఒక అధ్యయనంలో కౌమార బాలికలలో ఊబకాయం, జీవనశైలి సంబంధిత ఆరోగ్య సమస్యలు, PCOS ప్రాబల్యం పెరుగుతున్నట్లు కనుగొన్నారు.. ఎయిమ్స్ న్యూ ఢిల్లీలోని పీడియాట్రిక్ ఎండోక్రినాలజీ విభాగానికి చెందిన ప్రొఫెసర్ రజనీ శర్మ మాట్లాడుతూ.. తమ సంస్థ ‘సొసైటీ ఆఫ్ ఎండోక్రైన్ హెల్త్ ఇన్ ఎల్డర్లీ, అడోలసెంట్, అండ్ చిల్డ్రన్’ అనే ఎన్జీవో సహకారంతో, పాఠశాలల వ్యాప్తంగా విద్యార్థులకు జీవక్రియ సమస్యలు, పోషకాహార ఆరోగ్య సమస్యలు, పీసీఓఎస్ కోసం స్క్రీనింగ్ నిర్వహిస్తోందని తెలిపారు. ఈ అధ్యయనం గత మూడేళ్లుగా కొనసాగుతోందని, తదుపరి అధ్యయనంగా ఇది ఇంకా కొనసాగుతోందని ఆమె అన్నారు.
“స్థూలకాయం అధికంగా ప్రబలి ఉండటాన్ని మనం చూస్తున్నాం. ప్రైవేట్ పాఠశాలల్లో 40 నుంచి 45 శాతం మంది బాలికలు స్థూలకాయంతో లేదా అధిక బరువుతో ఉన్నారు. ప్రభుత్వ పాఠశాలల్లో కూడా ఇది పెరుగుతోంది.. 15 శాతం వరకు విద్యార్థులు అధిక బరువుతో లేదా స్థూలకాయంతో ఉన్నారు. ఇలాంటి గణాంకాలు ఎన్నో ఏళ్ల క్రితం ఊహకు అందనివి” అని ఆమె అన్నారు. జీవనశైలి సంబంధిత ఊబకాయం పెరుగుతోందని, అలాగే కౌమార బాలికలలో క్రమరహిత ఋతుచక్రాలకు సంబంధించిన అనేక కేసులను కూడా తమ సంస్థ గమనించిందని శర్మ అన్నారు.
ఎయిమ్స్ వైద్యుల విశ్లేషణ ప్రకారం.. ఈ ఆరోగ్య సమస్యల తీవ్రతకు ప్రధాన కారణాలు:
శారీరక శ్రమ లేకపోవడం: గంటల తరబడి ఒకేచోట కూర్చోవడం, వ్యాయామం లేదా ఆటపాటలకు దూరంగా ఉండటం.
అనారోగ్యకరమైన ఆహారపు అలవాట్లు: జంక్ ఫుడ్, ప్రాసెస్ చేసిన ఆహారాలు, అధిక కేలరీలు ఉండే స్వీట్లు/కూల్ డ్రింక్స్ ఎక్కువగా తీసుకోవడం.
అధిక డిజిటల్ స్క్రీన్ టైమ్: స్మార్ట్ఫోన్లు, టీవీలు, ల్యాప్టాప్లతో గంటల తరబడి గడపడం వల్ల శారీరక శ్రమ తగ్గడమే కాకుండా తీవ్రమైన ఒత్తిడి, నిద్రలేమి సమస్యలు ఉత్పన్నమవుతున్నాయి.
ఎయిమ్స్ నిపుణులు సూచిస్తున్న కీలక పరిష్కారాలు:
యుక్తవయస్కుల ఆరోగ్యాన్ని కాపాడుకోవడానికి మూడు ప్రధానమైన అంశాలపై దృష్టి పెట్టాలని ఎయిమ్స్ వైద్యులు తల్లిదండ్రులకు, ఉపాధ్యాయులకు, యువతకు పిలుపునిచ్చారు:
పోషకాహార నియమాలు (Nutrition): జంక్ ఫుడ్ను సంపూర్ణంగా పక్కనబెట్టి, ఇంట్లో వండిన సమతుల్య ఆహారాన్ని (Balanced Diet) అందించాలి. పీచు పదార్థాలు (ఫైబర్), పండ్లు, ఆకుకూరలు, నాణ్యమైన ప్రోటీన్ ఉండేలా చూసుకోవాలి.
రోజూ వ్యాయామం (Physical Exercise): ప్రతిరోజూ కనీసం 45 నుండి 60 నిమిషాల పాటు ఏదో ఒక శారీరక శ్రమ లేదా క్రీడలు, ఈత, నడక, యోగా వంటి వ్యాయామాలు క్రమం తప్పకుండా చేయాలి.
డిజిటల్ వెల్బీయింగ్ (Digital Wellbeing): స్క్రీన్ టైమ్ను బాగా తగ్గించాలి. రాత్రి పడుకునే ముందు ఫోన్లు లేదా గాడ్జెట్లకు దూరంగా ఉండటం ద్వారా నాణ్యమైన నిద్రను పొందవచ్చు. ఇది హార్మోన్ల సమతుల్యతను సరిచేయడంలో కీలక పాత్ర పోషిస్తుంది.
పిసిఓఎస్, ఊబకాయం అనేవి కేవలం మందులతోనే తగ్గేవి కాదని, సమగ్రమైన జీవనశైలి మార్పుల (Lifestyle Changes) ద్వారా మాత్రమే వీటిని నియంత్రించవచ్చని ఎయిమ్స్ నిపుణులు నొక్కి చెప్పారు. చిన్నతనం నుంచే సరైన ఆహారం, వ్యాయామం, క్రమశిక్షణతో కూడిన అలవాట్లను నూరిపోయడం అత్యవసరమని హెచ్చరించారు.
మరిన్ని హెల్త్ వార్తల కోసం ఇక్కడ క్లిక్ చేయండి..